Clarota rimanapaq

RIMASQAYKITA allinta entiendenankupaqqa clarotam rimanayki. Yachachisqayki otaq willasqayki allinninkupaq kaptinpas yanqapaqmi kanqa mana entiendekuptinqa.

Mana entiendekuqta rimaspaqa manam pitapas kallpanchasunchu, kallpawan rimaptinchikpas yanqapaqmi kanqa. Uyariwaqninchikkunapaqmi kanman huk idiomapipas rimachkachwan hina (Jer. 5:15). Bibliapas ninmi: “Guerrapi cornetilla mana allinta waqaptinqa manam pipas alistakunmanchu peleananpaq. Chaynam kanman qamkunapipas, mana entiendenata rimaptikichikqa ¿imaynatataq yachanmanku ima nisqaykichiktapas? ¡Yanqachiki rimawaqchik!”, nispa (1 Cor. 14:8, 9).

¿Imanasqataq rimasqanchikqa mana entiendekunmanchu? Ichapas siminchik mana allinta kichakuptin. Kakichunchikpa ankuchankuna mana allinta kuyuriptinqa simipas ñakaytam kichakun hinaptinmi rimasqanchikqa mana entiendekunchu.

Apurawllamanña rimaypas sasachanmanmi entiendeyninkuta. Pipa discursontapas grabadorapi apurawllamanña rimachiymanmi rikchakunman. Rimasqankuna uyarikuptinpas manam entiendekunchu.

Wakinpiqa rimasqankum mana entiendekunchu vozninku mana allin kaptin. Chayna kaptinpas kay yachachikuypi consejokunaman hina ruraspaqa atinmankum allin rimayta.

Manataqmi leesqankuqa entiendekunchu imayna toqyasqanman hina letrakunata mana toqyachiptinku otaq tupasqan puntonkunapi mana sayaykuspa leeptinkuqa. Wakinqa manam imam kaqtachu palabrakunata leenku nitaq imam kaqtachu toqyachinku. Qatinasllanpi mana sayaykuspa rimaptinkuqa uyariqninkunam wakin palabrakunallata entiendenku, wakintañaqmi sasachakuspa entiendenku. Chaymi clarota rimananchik yachachisqanchik allinta entiendekunanpaq.

Imaynatam clarota rimachwan. Clarota rimananchikpaqqa entiendenanchikmi rimasqanchik idiomapi ima letrakunawan qellqasqa kasqanta. Yaqa lliw idiomapim qellqasqa palabrakunaqa sílaba nisqapi rakisqa kachkan, chaymi sapa silabata tupasqanman hina toqyachina. Chay idiomakunapiqa sapa silabatam imayna toqyasqanman hina rimana. Astawan allinta rimayta munaspaykiqa ama apurawmanchu rimay, imam kaqta leenaykipaq kallpanchakuy. Qallariypiqa manapaschá rimasqaykiqa allintachu toqyanqa, practicasqaykiman hinam ichaqa clarotaña rimanki. Leesqayki allinta entiendekunanpaqqa tupasqanman hinam palabrakunata qatinasllanpi leenayki, mana chayqa manam entiendekunqachu.

Rurananchikpaq kaqkuna niqta sapa punchaw rimasqaykiman hinalla clarota rimanaykipaq kallpanchakuspapas imayna rimasqaykiman hinallam rimanayki, mana chayqa hukmanmi uyarikunman.

Rimasqayki mana allinta uyarikuptinqa kallpanchakuy umaykita hoqarinaykipaq hinaspa kakichuyki qasqoykiman mana tupananpaq. Huñunakuypi leespaykiqa Bibliata tumpata hoqarispa leey, chaynata ruraspam mana sasachakunkichu uyarisuqnikikunata qawarinaykipaq. Chaymi rimasqaykiqa allinta uyarikunqa.

Chaymantapas clarota rimanaykipaqqa hawkalla kaytam yachanayki. Mana chayqa rimananchikpaq yanapaq ankuchanchikkuna mana allinta kuyuriptinmi rimaypi sasachakuchwan. Chayna tarikuspanchikqa manam ima piensasqanchikkunamantapas allinta rimaytaqa atichwanchu.

Hawkalla kaptinchikqa kakichunchikpi ankuchanchikkuna chaylla kacharikunanpaqmi cerebronchik kamachinqa. Chaynallataqmi siminchikpi ankuchakunapas allinta kacharikun, kunkanchikmanta vozninchik lloqsiptin chaylla kichakunanpaq otaq wichqakunanpaqpas. Kakichunchik mana allinta kuyuriptinqa siminchikmi mana allintachu kichakunqa, chaymi rimasqanchikqa mana allintachu uyarikunqa manataqmi entiendekunqachu. Chaykunawan sasachakuspaqa kallpanchakunam leesqanchik palabrakunata allinta toqyachinapaq.

Leesqayki imayna kasqanta yachanaykipaqqa allinmi kanman kallpawan leeyniki. Rimananchikpaq kaq ankuchakuna imayna yanapawasqanchikpi reparay. ¿Allintachu simikita kichanki rimasqayki palabrakuna allinta toqyananpaq? Rimanaykipaq qalluyki allinta yanapasuptikipas manam chayraykullachu allintaqa rimanki. Kunkayki, kakichuyki, simiki, tonqoriykipi hinaspa uyaykipi ankuchakunam rimanaykipaq yanapasunki. Chaykuna mana yanapasuptikiqa manapaschá allintachu rimasqaykiqa entiendekunqa.

Grabadorayki kaptinqa rimasqaykita achka minutota grabay predicaspayki imayna rimasqaykiman hina. Grabasqaykita uyarispaykim ichapas cuentata qokunki rimasqaykipi wakin palabrakuna mana entiendekusqanta. Kaykunapi reparay: clarotachu rimanki, uyarikunchu rimasqayki, tipi-tipitachu rimanki, chayman hinam imapi pantasqaykimanta cuentata qokunki. Rimanaykipaq sasachakusqaykitaqa atipawaqmi kay yachachikuypi yanapakuykunata kasukuspaqa.

¿Rimaptikichu qalluyki watakun? Simikita allinta kichariy hinaspa kallpanchakuy clarota rimanaykipaq. Samaynikita huntachispa allillamanta rimay. Kaynata ruraspankum rimaypi sasachakuq achka runakuna astawan allintaña rimachkanku. “S” letrayoq palabrakunata toqyachiyta mana atispaqa punku kiruykimanta qalluykita asuchiy. Chaykunata ruraspapas clarota mana rimaspaqa ama hukmanyaychu. Moisespas yaqapaschá clarota rimananpaqqa sasachakurqa, Jehova Diosmi akllarqa kamachisqanta Israelpa mirayninkunaman hinaspa Egipto nacionpi rey Faraonman willachinanpaq (Ex. 4:10-12). Allinta rimanaykipaq kallpanchakuptikiqa Diosmi yanapasunki hinaspam pay serviynikipipas bendecisunki.