Bibliata servichikunankupaq kallpanchay

LLIW runakunatam kallpanchayta munanchik Bibliapa nisqanta qawanankupaq. Diosmanta willakusqanchikqa Bibliapa nisqanman hinam, chaymi yachachispanchikqa Diospa yachachikuynin kasqanta qawachinanchik. Bibliapa yachachisqankunapi confianankupaqmi yachachina.

Predicanapaq. Predicanaykipaq preparakuspaqa akllanaykim huk otaq iskay textokunata uyariy munaqkunaman leepunaykipaq. Mayqen qellqanchikwanpas predicanaykipaq preparakuspaqa huk textollatapas akllay yachachikuywan tupaq kaqta. Ima nisqanchikmantapas Diospa Palabranmi llampu sonqoyoqkunapa sonqonmanqa chayan. Biblia leenaykipaq mana atikuptinqa mayqen textomantapas umallaykimanta willay. Apostolkunapa tiemponpiqa manam llapallan runakunapachu Biblianku karqa. Chayna kaptinpas Jesuspas hinaspa apostolninkunapas Bibliapa nisqanman hinam yachachiqku. Ñoqanchikpas kallpanchakunanchikmi Bibliamanta textokunata umanchikpi takyachinapaq hinaspa predicacionpi allinta servichikunapaq, ichapas wakinpiqa textokunata umallanchikmanta willana kanqa.

Bibliata leespaykiqa wasiyoqman qawachispa leey. Kikinpuni Biblianpi leespanqa yaqapaschá astawanraq uyariyta munanqa.

Ichaqa reparanaykim Biblia tikraqkunamanta wakinqa piensasqankuman hina tikrasqankupi, chaymi chay tikrasqanku Bibliakunaqa mana tupanchu Diospa qellqachisqan ñawpa qellqakunawanqa. Achka Bibliakunapim Diospa sutinqa manaña rikurinñachu, chaymantapas wañusqakuna imayna tarikusqanmanta hinaspa kay Pachapaq Diospa munaynin ima kasqanmantapas manam allintachu entiendekun. Cheqap yachachikuymanta qawachinaykipaqqa yaqapaschá huk Bibliakunapi imayna tikrasqankuta qawachinayki kanqa otaq ñawpa Bibliakunapipas. Razonamiento a partir de las Escrituras nisqa librom achka yachachikuykunamanta yachachin chaynataq reqsisqa wakin textokunata huk Bibliakunapi imayna tikrasqankuta qawachin. Cheqap yachachikuykunamanta yachay munaqkunaqa kusikunqakuchá cheqap kaqmanta yachaspanku.

Huñunakuypi. Huñunakuypi kaqkunatam kallpanchananchik textokunata Bibliankupi maskanankupaq. ¿Imarayku? Yachachisqanchikta atencionwan uyarinankupaq, Bibliankupi leespa astawanraq entiendenankupaq chaynataq huñunakuyman chayllaraq hamuqkunapas Bibliapa nisqanman hina creesqanchikkunamanta cuentata qokunankupaq.

Uyarisuqnikikunaqa imayna kallpanchasqaykiman hinam Bibliankupi textokunata leenqaku. Chaymi Bibliankupi textokunata leenankupaq kallpanchaynikiqa allin kanman.

Discursota qospaykiqa tanteanaykim mayqen textokuna leenaykipaq kasqanta, chayman hinam uyarisuqnikikunata kallpanchanki Bibliankupi leenankupaq. Aswan allinnin kaq yachachikuykunawan tupaq textokunata leey, tiempo haypasuptikiqa yachachisqaykiwan tupaq wakin textokunatapas leewaqmi.

Ichaqa manam Bibliamanta textokunata akllayllachu otaq uyariwaqninchikkuna maskanankupaq kallpanchayllachu. Nisqayki textota manaraq tarichkaptinku leeruspayki huktaña leeptikiqa uyarisuqnikikunam hukmanyaruspan Bibliankupiqa manaña maskanmankuchu. Chaymi uyarisuqnikikunata qawarinayki nisqayki textota tariptinkuña leenaykipaq.

Chaykunapi reparaspa tiempowan niy leenaykipaq textokunamanta, mana chayqa tarinankukama suyaptikim tiempo llallirusunkiman. Pisi rimayllapi yachachinayki kaptinpas Bibliankupi textokunata maskanankupaq kallpanchasqaykim aswan allinqa.