Uyariwaqninchikkunata qawarispa rimanapaq

ÑAWINCHIKMI qawachin imayna tarikusqanchikta otaq imam piensasqanchiktapas. Qawachintaqmi admirasqa kasqanchikta, manchakusqanchikta, kuyapayakuq kasqanchikta, iskayrayasqanchikta otaq llakisqa kasqanchiktapas. Huk yuyaq runam llaqtamasinkuna ñakarisqankumanta nirqa: ‘chayqa ñawiykupim sutilla’, nispan.

Wakinqa imayna kasqanchiktam yachanku huklawta qawaspa rimasqanchikwan. Achka llaqtakunapim uyanta qawaspa rimaqtaqa confianzapaq hapinku, pampata otaq huklawta qawaspan rimaqtam ichaqa mana allinpaqchu hapinku. Wakin llaqtakunapiñataqmi uyariqninta qawarayaspan rimaqtaqa mana allinpaqchu hapinku, chaynata ruraspanqa mana penqakuq kasqanta otaq maqay munasqantam qawachichkanman, astawanraqmi autoridad otaq kamachiqnin kaptinqa. Huklaw llaqtakunapiñataqmi yuyayniyoqpa uyanta qawaspa mozo-sipas rimaptinqa mana respetoyoqpaq hapinku.

Wakin llaqtakunapim ichaqa uyariqninchikpa uyanta qawaspa rimasqanchikqa qawachin willasqanchik allinpuni kasqanta hinaspa tukuy sonqowan rimasqanchiktapas. Reparay Jesuspa discipulonkuna admirasqallaña kayna tapusqankupi: “¿Hinaptinqa pitaq salvakuytaqa atinman?”, nispa. Jesuspa imayna contestasqanmantam Biblia kaynata nin: ‘Paykunata qawarispam nirqa: Runakunaqa manam atinmanchu, Diospaqmi ichaqa tukuy imapas atinallan’, nispa (Mat. 19:25, 26). Bibliaqa nintaqmi apostol Pablopas uyariqninkunata qawarisqanmanta. Huk kutipim uyariqninkunapa kasqanpi karqa nacesqanmantapacha suchu runa. Hechos 14:9, 10 nisqanmi willawanchik: ‘Rimasqanta chay runa uyarichkaptinmi [qawarispan] Pablo musyarurqa sanoyananpaq iñiyniyoq kasqanta. Chaymi Pablo qapariq hina nirqa: ¡Sayariy!’, nispa.

Imaynata predicanapaq consejokuna. Predicaspaykiqa amistadnin hina kuyakuywan rimay. Allin kaptinqa piensarichinaykipaq hina tapuy, ichapas parlariwaqchik yachay munasqanmanta. Kallpanchakuy qallariymantapacha uyarisuqnikita qawarispa respetowan rimanaykipaq. Kusisqa qawariynikiqa ancha allinmi. Chayna kasqaykim uyarisuqnikiman qawachinqa imayna kasqaykita, chaymantapas kallpanchanqam hawkalla uyarisunaykipaq.

Uyanta qawarispaykiqa tanteankim imayna rimanaykipaq. Ichapas musyawaq wasiyoq piñasqa kasqanta, mana uyariy munasqanta otaq mana entiendesusqaykitapas. Musyawaqtaqmi mana tiempoyoq kasqanta otaq yachay munasqantapas. Uyarisuqnikita qawaspaqa tanteawaqmi allillamanta otaq utqayman rimanaykipaq, paypas rimarinanpaq, rimayta tukunaykipaq otaq Bibliata imayna estudianamanta qawachinaykipaqpas.

Predicaspaykiqa otaq Bibliamanta estudiachispaykiqa kallpanchakuy uyarisuqnikita qawarispa respetowan rimanaykipaq. Ichaqa ama qawarayaychu, penqarachiwaqmi (2 Rey. 8:11). Rimasqaykiman hina uyanta qawariy, chayna rurasqankuwanmi wakin nacionkunapiqa tukuy sonqonkumanta rimasqankuta qawachinku. Bibliata otaq mayqen qellqatapas leespaykiqa leesqaykitam qawanayki, leesqaykimanta entiendechinaykipaqmi ichaqa uyarisuqnikita qawarispa rimanayki. Qawarispataqmi musyanki entiendesqanta otaq mana entiendesqantapas.

Qallariypiqa ichapas uyarisuqniki qawariyta manchapakunki, chayna kaptinpas hinalla kallpanchakuy. Chaynata ruraspaykiqa allintam yachachinki.

Discursota qospa. Bibliam nin Jesucristo Ancha Reqsisqa Yachachikuyninmanta manaraq rimachkaspan ‘discipulonkuna qawarisqanmanta’ (Luc. 6:20). Chayna rurasqanta qatipakuy. Manaraq rimayta qallarichkaspayki huñunakuypi kaqkunata tumpa unaychata qawariy. Wakin llaqtakunapiqa allinmi kanman pitapas qawarispa rimayqa. Chayna rurasqaykiwanmi hawkalla rimayta qallarinki, uyarisuqnikikunapas uyayki imayna kasqanwanmi yachanqaku imayna tarikusqaykita. Yanapanqataqmi atencionwan uyarinankupaqpas.

Rimasqaykiman hina uyarisuqnikikunata qawariy. Llapallanta qawarinaykimantaqa sapakamata qawariy. Yaqa lliw llaqtakunapim allinpaq hapinku pipas rimaspanqa uyariqninkuna qawarisqanta.

Uyariqninchikta qawariyqa manam llutanpi qawariyllachu. Huñunakuypi kaqkunamanta mayqentapas respetowan qawariy, mana hukmanyaptinqa uyanta qawaspa hinalla rimay. Hukkunawanpas chaynata ruray. Ichaqa ama unaytaqa qawaychu, penqarachiwaqmi; amataq wakillantaqa qawaychu. Lliw uyarisuqnikikunata qawariy hinaspa hukkaqninwanpas parlachkawaq hina rimay, hukwan manaraq chaynata rurachkaspayki imayna sientekusqanpi reparay.

Rimanaykipaq qellqasqayki atrilpa hawanpi, makikipi otaq Bibliaykipi kasqanmi qawarispalla rimanaykipaq yanapasunki. Kurkurayaspa rimaspaykiqa uyarisuqnikikuna qawariypim sasachakunki. Rimanaykipaq qellqasqaykita hayka kutikama qawasqaykipi reparay chaynataq imay rato qawasqaykipipas. Rimayta tukunaykipaqña qellqasqaykita qawaspaykiqa manam uyarisuqnikikuna qawariyta atinkichu, manataqmi imayna uyarisqankutapas musyankichu.

Pelotata choqaspaqa pukllaqmasinchik chaskiwananchikpaq hinallam choqana. Chaynallataqmi discursota qospapas “chaskiwananchikpaq” otaq entiendenankupaq hinalla rimana. Rimasqaykita atencionwan uyarispankuqa entiendesqankutam qawachichkanku. Chayna kasqanta yachanaykipaqmi uyarisuqnikikunata qawarinayki.

Huñunakuypi leespaykiqa, ¿kallpanchakuwaqchu uyarisuqnikikunata qawarinaykipaq? Leesqaykita Bibliankupi leespankuqa manapaschá lliwchu musyanqaku qawarisqaykimanta otaq mana qawarisqaykimantaqa, chayna kaptinpas qawarispa leesqaykiqa entiendenankupaqmi yanapanqa hinaptinmi imayna uyarisqankumanta musyanki. Imatapas qawaspanku Bibliankuta wakin mana leeptinkuqa paykunata qawarisqaykim kallpanchanqa leesqaykita hinalla allinta uyarinankupaq. Ichaqa manam unaytachu qawarinayki, leesqaykipim pantaruwaq. Chaymi uyarisuqnikikunata qawarinaykipaq hina Bibliaykita tumpachata hoqarispa hapinayki.

Wakin ancianokunatam ninku kimsa punchawpaq asambleapi discursota leespalla qonankupaq. Leesqankuta allinta entiendechinankupaqmi allinta preparakunanku hinaspam achka kutikama practicananku. Leespalla discursota qoqqa uyariqninkunata qawarinanpaqmi sasachakun, allinta preparakuspanmi ichaqa leesqanpi mana pantaspan qawariyta atinman. Chaynata ruraptinmi uyariqninkunaqa Diospa yachachikuyninkunata allinta entiendenqaku.