Textokunata allinta servichikunapaq

RUNAMASINCHIKMAN yachachiyqa manam Bibliapa wakin textonkunata leeyllachu. Apostol Pablom Timoteoman qellqarqa: “Kallpanchakuyá Diospa chaskisqan kanaykipaq, allin llamkaq hinayá mana imamantapas penqakuspa Diospa cheqap palabranta allinta yachachiy”, nispa (2 Tim. 2:15).

Kay textopa nisqanmi qawachin imamantapas yachachisqanchikqa Bibliapa nisqanman hina kananmanta, akllasqanchik palabrakunawan entiendesqanchikman hina yachachinamantaqa hananpi otaq uranpi willasqanpim reparananchik. Diosmi llaqtanman Jeremiaswan willachirqa ‘piensasqankuman’ hina rimaq profetakunamanta cuidakunankupaq (Jer. 23:16). Apostol Pablom iñiqmasinkunata consejarqa Jehova Diospa yachachikuyninkunata runapa piensayninwan mana chaqrunankupaq, chaymi nirqa: ‘Saqerunchikñam pakasqallapi penqaypaq ruraykunataqa, manataqmi purinchikchu sacre-sacrellañaqa nitaq Jehova Diospa palabranman [yapaspaqa]’, nispa. Chay tiempopim vinota rantikuqkuna yakuwan yapaspa rantikuqku astawan gananankurayku. Ñoqanchikqa manam runakunapa yachachisqanwanqa chaqrunchikchu Diospa Palabrantaqa. Pablom nirqa: ‘Ñoqanchikqa manam wakinkuna hinachu Diospa palabranwanqa negociota ruranchik. Aswanqa Cristopi kaspam cheqapta rimanchik Diospa qayllanpi hinaspa paypa kamachisqanman hina’, nispa (2 Cor. 2:17; 4:2).

Wakinpiqa ima sasachakuytapas imaynata atipanapaq yachachikuymantapaschá Bibliapi leenayki kanqa (2 Tim. 3:16, 17). Ichaqa textopa imamanta yachachisqanman hinam allinta yachachinayki manam kikikipa piensasqaykiman hinachu (Sal. 91:11, 12; Mat. 4:5, 6). Explicasqaykiqa Jehova Diospa munayninman hinam kanan, tupanantaqmi Palabranpi nisqankunawanpas.

‘Diospa cheqap palabranta allinta yachachinapaqqa’ Bibliapa ima niy munasqantam allinta entiendena. Bibliapa nisqanqa manam runakunata manchachispa hukmanyachinapaqchu. Jesuspa contranpi kaq religiosokunam Diospa Palabranmanta yachachiqku ichaqa manam justo runachu, llakipayakuqchu nitaq Diosman sonqochu karqaku aswanqa Diospa kamachisqanpa contranpim karqaku (Mat. 22:23, 24; 23:23, 24). Jesusqa Diospa Palabranmanta yachachispanmi Taytanpa sumaq kayninkunata qawachirqa. Diosmanta tukuy sonqonwan yachachisqanwanmi qawachirqa runakuna ancha kuyasqanta, chaynaqa payta qatipakunapaqyá kallpanchakusun (Mat. 11:28).

¿Imaynatam cuentata qokuwaq Bibliapa textonkunawan allin yachachisqaykimanta? Bibliata sapa punchaw leesqaykim yanapasunki. Chaninchanaykitaqmi chuya espirituwan Diospa nombrasqan ‘allin yuyayniyoq confianza sirviententa’, Jehova Diosqa llaqtanpi serviqninkunata mikuchichkaq hina iñiyninkupi kallpanchanankupaqmi paykunata valekun (Mat. 24:45). Bibliata estudiaspa, huñunakuyman mana faltakuspa hinaspa chaypi rimarispaqa yanapachikunkim allin yuyayniyoq sirviententakama Diospa yachachisqanwan.

Entiendesqayki idiomapi Razonamiento a partir de las Escrituras sutiyoq libroyki kaptinqa allin servichikuytam yachanayki, chay librom yanapasunki textokunata predicacionpi allintapuni explicanaykipaq. Mana entiendesqayki textota leenaykipaq kaptinqa allintaraq yachaykuy, chaynata ruraspam Diospa Palabranmanta allinta yachachinki (Prov. 11:2).

Yachachisqaykiwan tupaq textokunata leey. Imamanta yachachisqaykiwan leesqayki textokuna imayna tupasqanmantam uyarisuqnikikunaman sutillata qawachinayki. Textota manaraq leechkaspa uyarisuqnikita tapuy hinaspa qawachiy chay texto imayna contestasqanta. Imamantapas yachachiptikiqa uyarisuqnikim reparanan yachachisqaykiqa Bibliapa nisqanman hina kasqanta.

Manam entiendenankupaq hina textokunata leeyllachu. Bibliapa ima yachachisqantam wakinqa mana yachankuchu, chaymi huk kutillata textota leepusqaqa manam entiendenmanchu imamanta yachachisqanchikta. Chaymi leesqayki textopi sutillata qawachinayki yachachisqaykiwan tupaq palabrakunata.

Chaypaqmi yapamanta rimawaq entiendenanpaq kaq palabrakunata. Huk runallawan rimaspaqa tapuwaqmi leesqayki textopi mayqen palabrakuna yachachisqaykiwan imayna tupasqanmanta. Uyarisuqnikikuna achka kaptinqa imamanta yachachisqaykitam yapamanta niwaq, discurso qoqkunam wakinqa chaynata ruranku ichaqa kallpanchakunaykim leesqayki textopi palabrakuna yachachisqaykiwan imayna tupasqanmanta entiendenankupaq.

Entiendechinaykipaq kaq palabrakunapi reparasqaykiqa yanapasunkim allinta yachachinaykipaq. Chaynata reparaspaqa sutillatam qawachinki imanasqa texto leesqaykita. Chaykunata sutillata qawachiy. Imamantapas pisi rimayllapi willaspaqa sutillatam qawachinayki imanasqa texto leesqaykita.

Sasa contestanapaq kasqanta piensaspankum fariseokuna Jesusta tapurqaku: “¿Diospa leyninpi permitinchu casado runa imamantapas tumpaykuspa warminmanta rakikuyta?”, nispa. Genesis 2:24 nisqanman hinam Jesusqa contestarqa, ichaqa manam textopa llapan nisqanwanchu, entiendenankupaq kaqkunallatam sutillata qawachirqa. Casarasqaqa “huk runa hinallaña” kasqanta qawachispanmi nirqa: “Chayraykum runaqa mana rakinmanchu Diospa kuskanchasqantaqa”, nispa (Mat. 19:3-6).

¿Achka rimaykunawanchu explicawaq leesqayki textopi nisqan yachachisqaykiwan imayna tupasqanta? Chayqa kanman pikunaman hinaspa imamanta yachachisqaykiman hinam. Entiendenankupaq hinallayá yachachiy.

Bibliapa nisqanman hina entiendechiy. Tesalonica llaqtapi Pablopa predicasqanmantam Hechos 17:2, 3 nin: “Bibliapi kaqta qawachispanmi [entiendechirqa]”, nispa. Chaynata yachachinapaqmi Diosta serviqkunaqa kallpanchakunanchik. Pabloqa Hebreo Rimaypi Qellqasqa Diospa Palabranwanmi Jesuspa vidanmanta hinaspa predicasqanmanta willaspan allinta entiendechirqa hinaspanmi nirqa: “Qamkunaman willasqay Jesusqa salvawaqninchik Cristopunim”, nispa.

Iñiqmasin judiokunaman cartaspanmi Pabloqa Hebreo Rimaypi Diospa Palabranta sapa kuti servichikurqa. Imamanta yachachisqanta entiendechinanpaqmi sutillata qawachirqa wakin palabrakunawan otaq yachachikuykunawan hinaspam qawachirqa imanasqa allin kasqantapas (Heb. 12:26, 27). Hebreos 3 kaq capitulonpim Salmo 95:7-11 nisqankunawan kimsa yachachikuymanta explicarqa: 1) Runapa sonqon imayna kasqanmanta (Heb. 3:8-12); 2) “Kunan” niq palabramanta (Heb. 3:7, 13-15; 4:6-11); 3) ‘Manam yaykunqakuchu samanay punchawmanqa’ nisqanmantapas (Heb. 3:11, 18, 19; 4:1-11). Pablo hinam textokunamanta entiendechinapaq kallpanchakuna.

Lucas 10:25-37 nisqanpim willawanchik Diospa leynin yachachiq runa Jesusta tapusqanmanta: “Yachachikuq ¿imata ruraspaytaq wiñay kawsayta haypayman?”, nispa. Reparay imayna entiendechisqanpi. Puntatam imayna piensasqanmanta tapurqa hinaspam qawachirqa Diospa Palabran kasukuyqa allin kasqanta. Chay runa mana entiendesqanmanta cuentata qokuspanmi Jesusqa pim ‘runamasin’ kasqanmanta willanallanmantaqa huk rikchanachiywan entiendechirqa.

Tapukuykunata Jesus contestananpaqqa manam textokunapa nisqallanwanchu contestaq. Tapusqankupi allinta reparaspanmi chayman hina yachachiq.

Kawsarimuypi saduceokuna mana creeptinkum Jesusqa Exodo 3:6 nisqanmanta wakin palabrakunata servichikurqa kawsarimuyqa Diospa munaynin kasqanta entiendechinanpaq (Mar. 12:24-27).

Diospa nisqanman hina imamantapas entiendechinapaqqa anchatam kallpanchakuna.