Rimasqanchikwan kallpanchanapaq

PREDICANAPAQ kamachikuy chaskisqanchikqa allin noticiamanta willakuymi. Jesusmi nirqa: “Manaraq kay tiempo tukuchkaptinmi ñoqamanta allin noticia lliw nacionkunapi willakusqa kanqa”, nispa (Mar. 13:10). Kikinmi chaynata rurarqa ‘Diospa munaychakusqanmanta allin noticiata’ willakuspan (Luc. 4:43). Apostolkunapas willakurqakum “Diosmanta allin noticiata” chaynataq ‘Cristomanta allin noticiatapas’ (1 Tes. 2:2; 2 Cor. 2:12). Chay willakuykunam runakunata kallpanchan.

Wiñaypaq kaq allin noticiamanta angelpa willakusqanman hinam mana iskayrayaspa kaynata predicanchik: “Diostayá manchakuywan alabaychik”, nispa (Apoc. 14:6, 7). Maypi kaspapas willakunchikmi cheqap Diosmanta, sutinmanta, sumaq kayninkunamanta, admirakuypaq unanchasqankunamanta, munayninmanta hinaspa kamachikuyninkuna kasukuymantapas. Allin noticiamanta willakuspaqa willakunchiktaqmi runamasin ñakarichiqkunata Jehova Dios chinkachinanmanta, ichaqa mana juzgaspam predicananchik. Tukuy sonqonchikwanmi munanchik Bibliapa nisqanta lliw runakuna kasukunankuta (Prov. 2:20-22; Juan 5:22).

Mana allin kaqkunamanta llumpayta mana rimanapaq. Yachanchikmi vidanchikpi imapas sasachawasqanchikta. Chaymi runamasinchik imawanpas sasachakusqanmanta pisillata rimaspa predicayta qallarichwan. Sapa punchawmi runakunaqa llumpay llakikuypaq noticiakunata uyarinku, chaykunamanta llumpayta rimaptinchikqa punkuntam wichqaruwachwan otaq manam allintachu uyariwachwan. Chayraykum Diospa Palabranmanta allin noticiakunata willanapaq kallpanchakunanchik (Apoc. 22:17). Wasiyoq mana parlayta munaptinpas allin noticiamanta willaspaqa piensarinanpaqmi yanapachwan, ichapas yapapiqa astawan uyariyta munanman.

Discursota qonayki kaptinpas uyarisuqnikikunata ama hukmanyachinaykipaq kallpanchakuy mana allin kaqkunamanta pisillata rimaspa, chaykunamanta achkallaña willanaykipaq kaptinpas. Gobiernokuna mana allin rurasqankumanta, tukuy mana allin kasqanmanta, wañuchinakuymanta otaq huchapakuymanta llumpayta rimaspaqa uyarisuqnikikunatam hukmanyarachiwaq. Chaykunamanta rimaspaqa yachachisqaykiwan tupaq kaqkunallamanta otaq uyarisuqnikikunata yanapananpaq kaqkunallamantam rimawaq, chaynata yachachispam qawachinki Bibliapa yachachisqanqa sasachakuykunata atipanapaq yanapasqanta.

Discursota qospa imakuna allin kasqanmanta otaq mana allin kasqanmanta qawachinaykipaq sasa kaptinpas kallpanchakunaykim uyarisuqnikikunata yanapananpaq kaqkunallata servichikunaykipaq. Jesusmi Ancha Reqsisqa Yachachikuyninpi uyariqninkunata consejarqa Diospa leynin yachachiqkunapa chaynataq fariseokunapa rurasqankuman hina ama ruranankupaq, chaymi rikchanachiykunawan yachachirqa (Mat. 6:1, 2, 5, 16). Jesusqa manam llumpaytachu rimarqa mana allin rurasqankumantaqa aswanmi yachachirqa Diospa kamachikuyninkunata kasukunankupaq, chaynata yachachispanmi uyariqninkunata kallpancharqa (Mat. 6:3, 4, 6-15, 17-34).

Allin kaqkunamanta astawan rimanapaq. Iñiqmasikikuna imapi astawan kallpanchakunankupaq discursota qonayki kaptinqa kallpanchanaykipaq hina preparakuy ama hukmanyachinaykipaq hinachu. Imata ruranankupaqpas kallpanchaspaykiqa kikikipas chaynata ruranaykipaq kallpanchakuy (Rom. 2:21, 22; Heb. 13:7). Sumaqllatataq rimay ama piñakuchkaq hinachu (2 Cor. 2:4). Jehova Diospa agradonpaq iñiqmasikikuna kallpanchakusqankumanta mana iskayrayasqaykitam imayna rimasqaykiwan qawachinayki, chayna yachachiynikiqa ancha allinmi. Apostol Pablom chayna confiasqanta qawachirqa qatiqnin textokunapi: 1 Tesalonicenses 4:1-12; 2 Tesalonicenses 3: 4, 5 hinaspa Filemon 4, 8-14, 21 nisqanpi.

Wakinpiqa allinmi kanman iñiqmasinkunata ancianokuna mana allin ruranankumanta consejayninkuqa ichaqa humildadwanmi sumaqllata consejananku (Gal. 6:1). Imayna rimasqankuwanmi qawachinanku iñiqmasinkuna respetasqankuta (1 Ped. 5:2, 3). Mozollaraq qarikunatapas chaynata rimanankupaqmi Bibliaqa kallpanchan (1 Tim. 4:12; 5:1, 2; 1 Ped. 5:5). Pitapas faltanmanta corregispaqa Bibliapa nisqanman hinallam rurananku (2 Tim. 3:16). Discurso qoqqa Bibliapa nisqanman hinallam yachachinan manam piensasqanman hinachu. Huñunakuypi kaqkunata imamantapas corregispaqa sumaqllatam rimananku ichaqa sutillatam qawachinanku mana allin ruraykunamanta cuidakunankupaq, ima sasachakuytapas allichanankupaq, mana allin rurasqankumanta wanakunankupaq hinaspa Jehova Diospa kamachikuyninkuna kasukunankupaqpas (Sal. 119:1, 9-16).

Yachachinaykipaq kaqta preparakuspaqa yuyaymanay aswan allinnin kaq yachachikuykunamanta rimasqaykita imayna tukunaykipaq chaynataq enteron yachachikuyta imayna tukunaykipaqpas. Tukunallaykipaqña rimasqaykikunatam astawanqa yuyanqaku. ¿Uyarisuqnikikunata kallpanchanaykipaq hinachu tukunallaykipaqña rimasqaykiqa?

Iñiqmasinchikkunawan rimaspa. Jehova Dios serviqkunaqa anchatam chaninchanku huñunakuyninkuta, chaypim iñiqmasinkuwan kallpanchanakunku. Bibliam niwanchik huñunakuykunapi ‘kallpanchanakuyninchik’ ancha allin kasqanta (Heb. 10:25). Kallpanchanakunchikqa manam discursokuna uyarisqallanchikwanchu nitaq imamantapas rimarisqallanchikwanchu, kallpanchanakunchiktaqmi huñunakuy manaraq qallarichkaptin otaq tukuruptinña parlarisqanchikwanpas.

Vidanchikpi imapas pasawasqanchikmanta rimayninchik allin kaptinpas Dios serviyninchikpi experiencianchikmanta rimaymi aswan allinqa. Sientenakusqanchikpas kallpanchawanchiktaqmi.

Kay Pachapi mana allin ruraykuna intuwasqanchikraykum rikchan-rikchanlla kananchik. Efeso llaqtapi kaq cristianokunaman apostol Pablo qellqaspanmi nirqa: “Amaña llullakuspayá cheqaptapuni rimaychik runamasikichikwan”, nispa (Efes. 4:25). Cheqap rimaqkunaqa manam chaninchanchikchu Diosta mana serviqkunapa chaninchasqankutaqa. Jesuspas consejarqam kapuqniyoq kaywan ama ‘engañachikunapaq’ (Mat. 13:22). Chaymi iñiqmasinchikwan otaq piwan rimaspapas Diospi confiasqanchiktam qawachina manam qori-qollqepi confiasqanchiktachu (1 Tim. 6:9, 10).

Apostol Pablom kallpanchawanchik “pisi iñiyniyoq” iñiqmasinchikkunata imapas rurasqankumanta otaq mana rurasqankumantapas mana sientichinapaq, otaq mana juzganapaq. Rimasqanchikwan kallpanchanapaqqa reparananchikmi iñiqmasinchik imayna kasqanpi chaynataq Dios serviyninpi imayna kasqanpipas. Manam allinchu kanman iñiqmasinchikta ‘hukmanyarachiyqa’ otaq ‘huchaman urmachiyqa’ (Rom. 14:1-4, 13, 19).

Imawanpas llumpay sasachakuypi tarikuq iñiqmasinchikqa agradecekunqachá kallpanchaykunapaq hina rimapayaptinchikqa. Ichapas anchata kallpanchakuchkan huñunakuykunaman hamunanpaq. Imawan sasachakusqanta yachaqkunaqa tapunkupaschá imayna sientekusqanta. Agradecekunqachá chayna tapuykusqankumanta ichaqa manapaschá chayllawanqa kallpanchasqachu tarikunqa. Kuyapayakuywan rimasqanchikmi astawanqa kallpanchanman. ¿Reparankichu sasachakuypi kaspanpas Dios serviyninpi kallpanchakusqanta? ¿Kallpanchasunkichu huñunakuykunapi rimarisqan? Imawanpas sasachakusqanmanta rimanaykimantaqa, ¿manachu kallpanchaykuwaq allin rurasqankunamanta? (1 Tes. 5:11.)

Rimasqanchikwan kallpanchanapaqqa Diospa yachachisqanman hinam rimananchik. Israelpa mirayninkunam Diospa nombrasqan runakunapa contranpi rimarqaku chaynataq “maná” sutiyoq mikuyta amirusqankumantapas, chaywanmi Jehova Diosta llumpayta piñachirqaku (Num. 12:1-16; 21:5, 6). Ancianokunata respetaspa hinaspa allin yuyayniyoq confianza sirvientepa qowasqanchikmanta agradecekuspaqa manam israelitakuna hinachu kasun (1 Tim. 5:17).

Manam sasachu kallpanchanakunapaq kaqkunamanta iñiqmasinchikkunawan rimayqa. Pipas mana allin kaqkunamanta rimaptinqa allin kaqkunamanta rimananpaqmi kallpanchana.

Huñunakuypi yachachispapas, iñiqmasinchikkunawan rimarispapas otaq predicaspapas kallpanchanakunapaq hinayá ‘allin kaqkunallata rimasunchik chaynapi allinninkupaq kaptin iñiyninkupi aswan-aswan wiñanankupaq’ (Efes. 4:29).