Imam kaqta rimanapaq

¿IMANASQATAQ mayqenninchikpas pantasqata rimaruchwan? Ichapas mana allinta yachaspa hukkunapa willakusqankuman hinalla rimaspa otaq ima willakuymantapas mana allinta entiendespa. Imam kaqta wakin yachachikuykunamanta willaptinchikqa aswan allinnin kaq yachachikuykunamantapas mana iskayrayaspam allinta uyariwasun.

Predicaspa. Diosmanta manaraq allinta yachasqankupaqmi wakinqa piensanku chaymi predicayta manchapakunku. Ichaqa chayllam cuentata qokunku pisillata yachaspankupas predicay atisqankumanta. ¿Imaynata? Allinta preparakuspankum.

Predicaq manaraq lloqsichkaspa piensay imamanta rimanaykipaq. Runakuna imamanta tapusunaykipaq kasqanpipas piensay hinaspa allinta preparakuy Bibliapa yachachisqanman hina contestanaykipaq. ¿Bibliamanta estudiachiqchu rinayki? Chaynaqa Bibliapa yachachisqanman hina chaynataq tapukuykunaman hina yachachinaykipaq kaqta allinta entiendey.

¿Imatataq rurawaq wasiyoqpas otaq llamkaqmasikipas manaraq yachasqayki kaqkunamanta tapusuptikiqa? Imakunapas imayna pasasqanmanta mana allinta yachaspaqa amaraq contestaychu. Proverbios 15:28 textom nin: “Contestananpaqmi sumaqta piensan allin kawsaq runaqa”, nispa. Ichapas contestanaykipaq kaqta tariwaq Razonamiento a partir de las Escrituras libropi otaq Traducción del Nuevo Mundo de las Santas Escrituras Bibliapa “Temas bíblicos para consideración” nisqanpi. Chay qellqakuna makikipi mana kaptinqa tapusuqnikita niy allinta yachaykuspaña kutinaykipaq. Tapusuqniki yachayta munaspanqa suyasunkim imam kaqmanta yachachinaykipaq. Mana yachasqaykimanta reqsikusqaykiqa yaqapasmi uyarisuqnikita piensarichinqa.

Unay wataña allinta predicaqkunawan predicasqaykipas yanapasunkim Diosmanta allinta yachachinaykipaq. Reparay mayqen textokunawan uyariqninta imayna piensarichisqanpi. Imayna rurasqaykimanta otaq pantarusqaykimanta nisuptikiqa uyarikuy. Apolos sutiyoq cristianom Diosmanta allin willakuq karqa, ichaqa chaskikurqam hukkunapa consejasqantapas. Paymantam Lucas nirqa ‘allin yachachiq hinaspa allin willakuq’ kasqanta. Apolosqa ‘kusikuyllawanñam Jesusmanta haykam yachasqanta willakuq’. Ichaqa manam llapantachu allinta entienderqa. Chayna kasqanmanta cuentata qokuspankum Priscilawan Aquila “wasinkuman pusarqaku hinaspam Jesuswan Diospa rurasqanmanta aswan allintaraq yachachirqaku” (Hech. 18:24-28).

Bibliapa nisqanman hina yachachinapaq. Huñunakuykunapi yachachispaqa ancha respetowanmi yachachinayki wasipa pilarnin hina cheqap kaqta iñiqmasinchikkuna takyachisqankurayku (1 Tim. 3:15). Cheqap kaqkunamanta yachachinaykipaqqa textokunapa ima niy munasqantam allinta entiendenayki. Reparanaykitaqmi qatiqninpi otaq ñawpaqninpi kaq willakuykuna imam nisqanpi chaynataq imarayku qellqasqa kasqanpipas.

Huñunakuypi nisqaykitaqa yaqapaschá hukkunapas nisqaykiman hina rimanmanku. Llapallanchikmi rimasqanchikpiqa “pantaq kanchik” (Sant. 3:2). Ichaqa kallpanchakunaykim imam kaqtapuni yachachinaykipaq. Diosmanta Yachachinapaq Escuelapi matriculasqa qarikunam tiempopa risqanman hina wakinqa anciano kanku, paykunaqa astawanmi kallpanchakunanku cheqap kaqmantapuni yachachinankupaq (Luc. 12:48). Yachachisqankupi sapa kutilla pantaspankuqa iñiqmasinkutam hukmanyachinmanku, chaywanqa manañam Diospa favorecesqanchu kanmanku (Mat. 12:36, 37). Chaymi ancianokunaqa kallpanchakunanku Diospa yachachisqanman hina imam kaqta yachachinankupaq (Tito 1:9).

Imamantapas yachachisqaykiqa Bibliapi ‘cheqap yachachikuyninman hinam’ kanan (2 Tim. 1:13). Cantonmanta cantonkama Biblia leeyta manaraq tukuspaykiqa ama hukmanyaychu, aswanqa leeyta tukunaykipaq kallpanchakuy. Chaymantapas qatiqnin parrafopi nisqanman hina yachachinaykipaq preparakuy.

Tapukuy: “¿Tupanchu kay yachachikuykuna Bibliamanta yachasqaykunawan? ¿Jehova Diosta kasukunankupaqchu kallpanchanqa icha runapa yachachisqanta kasukunankupaqchu?”, nispa. Jesusmi nirqa: “Palabraykiqariki cheqapmi”, nispa (Juan 17:17; Deut. 13:1-5; 1 Cor. 1:19-21). Chaymantapas allinta servichikuy allin yuyayniyoq confianza sirvientepa qowasqanchik yanapakuykunata, chay yanapakuykunaqa textokunamanta imam kaqta entiendespa allinta yachachinaykipaqmi yanapasunki. Diospa ‘cheqap yachachikuyninkunaman’ hina chaynataq allin yuyayniyoq confianza sirvientepa nisqanman hina yachachispaqa imam kaqtam yachachinki.

Ima willakuymantapas imam kaqtam yachanayki. Yachachisqaykita entiendechinaykipaqqa servichikuwaqmi imapas pasasqanmanta, pipapas ima nisqanmanta chaynataq experienciakunamanta willakuykunatapas. ¿Imaynatam yachawaq ima willakuypas cheqap kasqanmanta? Confianapaq kaq willakuykunamanta akllaspam. Imapas imayna otaq hayka kasqanmanta willakuykuna, yachaysapa runakunapa nisqankuna chaynataq ñawpa tiempopi imapas imayna pasasqanmanta otaq imayna rimasqankumanta entiendesqankupas tiempopa pasasqanman hinam cambian. Periodicopi, televisionpi, radiopi otaq Internetpi willakuykunatapas servichikuyta munaspaqa allintam tanteanayki. Tapukuy: “¿Cheqaptapunichu willakun? ¿Hukkunapa willakusqankuwanpas tupanchu?”, nispa. Proverbios 14:15 nisqanpim Biblia nin: “Pisi experienciayoq runaqa creerunmi tukuy imapas nisqankuta. Yachayniyoq runam ichaqa entienden imaynam kawsananta”, nispa. Ima willakuykunamantapas iskayrayaspaqa ama rimaychu.

Cheqap kaptinqa tanteanaykitaqmi imamanta yachachisqaykiman hina rimanaykipaq. Pipapas ima nisqanmanta chaynataq imapas imayna kasqanmanta otaq hayka kasqanmanta yacharuspapas reparanaykim wakin nisqankunawan imayna tupasqanpi. Mayqen willakuypipas “wakin runakuna” niptinqa ama niychu “yaqa llapan runakunam” nispaqa, “achka runakuna” niptinpas ama niychu “lliw runakunam” nispaqa otaq “wakin kutipi” niptinqa amataq niychu “sapa kutim” nispaqa. Imamantapas masyarichispa willaptikiqa uyarisuqnikikunam llulla rimaqpaq hapisunkiman.

Imam kaqta rimaspaqa reqsichinkim iñiqmasikikunapas chaynataq kikikipas cheqap rimaq kasqaykita. Chaynapim “cheqap” rimaq Jehova Diosta hatunchanki (Sal. 31:5).