7 KAQ YACHACHIKUY

Imamantapas imam kaqtam yachachina

Lucas 1:3

Uyariwaqninchikkunata yanapanapaqqa imam kaqtam kikinchikraq yachananchik, chaynapi mana iskayrayanankupaq.

Allintam imamantapas yachaykuna. Imapas yachachisqanchikqa bibliamantam kanan, chaymi atikuptinqa bibliamantapuni ñawinchapuna. Sichu yachaysapa runakunapa qillqasqankumanta, imapas willakuymanta utaq imapas pasakusqanmanta willaspaqa, puntatam imam kaqta yachananchik.
Qillqakunataqa allintam servichikuna. Bibliapa nisqanta ñawinchapuspaqa, qawananchikmi qallariyninpi hinaspa tukuyninpi imamanta rimasqanta. Yachananchiktaqmi qillqanchikkunapa ima nisqantapas (Mat. 24:45). Huk qillqakunamanta rimaspaqa chay qillqapa nisqanman hinam willana.

Ama yaparispaqa rimasunchu. Ima qillqapipas “wakin runakuna” niptinqa, manam “llapallan runakuna” ninachu. “Wakinpi” niptinqa, manam “llapanpi” ninachu utaq “ichapas” niptinqa, manam “chaynam karqa” ninachu.
Uyariwaqninchikkunatam yuyaymanachina. Bibliamanta utaq qillqanchikmanta ñawincharuspaqa, allinmi kanman chayman hina tapuyninchik utaq huk rikchanachiyta ruwayninchik chaynapi allinta entiendenankupaq.