Qawasqanku kaqkunawan yachachinapaq

¿IMANASQATAQ qawasqanku kaqkunawan yachachina? Allinta entiendechinapaqmi yanapawanchik. Jehova Diospas Jesucristopas chaynatam yachachiqku, ñoqanchikpas paykuna hina yachachiytaqa atichwanmi. Manam uyarisqallankuwanchu yachachisqanchiktaqa entiendenku, qawasqankuwanpas entiendenqakum. ¿Imaynatam qawasqanku kaqkunawan Diosmanta allin noticiakunata entiendechichwan? ¿Imaynatam yachachwan chaykunawan yachachisqanchik allin kasqanta?

Allin Yachachiqkunata qatipakunapaq. Serviqninkunamanmi Jehova Diosqa allinta entiendechirqa rikusqanku kaqkunawan. Huk tutam hawaman pusaspan Abrahamta nirqa: “Qaway cielokunapi lucerokunata, yupayá atispaykiqa. Wakna mana yupay atinam kanqa miraynikikunapas”, nispa (Gen. 15:5). Chay prometesqan mana cumplikunanpaq hina kaptinpas Abrahamqa Diospim confiarqa. Huk kutipiñataqmi Jeremiasta kacharqa allpa manka ruraqpa wasinman allpa manka imayna rurasqanta qawamunanpaq. Chaywanmi allinta entiendechirqa runakunata kamachinanpaq Jehova Dioslla derechoyoq kasqanta (Jer. 18:1-6). ¿Yaqachum Jonasqa qonqanman karqa calabazaman rikchakuq arwita wiñachispan Jehova Diospa kuyapayasqanta? (Jon. 4:6-11.) Diosqa kamachirqataqmi wakin profetakunatapas imam pasananmanta imakunata ruraspa otaq runakunapa qawasqanku kaqkunawan willakunankupaq (1 Rey. 11:29-32; Jer. 27:1-8; Ezeq. 4:1-17). Diospa karpanmanta chaynataq templonmanta willakuykunam entiendechiwanchik Diospa kasqan hanaq pacha imayna kasqanta (Heb. 9:9, 23, 24). Revelacionnintakamataqmi willachirqa imapas tanteasqankuna imayna cumplikunanmanta (Ezeq. 1:4-28; 8:2-18; Hech. 10:9-16; 16:9, 10; Apoc. 1:1).

¿Imaynatam Jesuspas qawasqanku kaqkunawan yachachirqa? Huk kutipim fariseokuna hinaspa Herodespa runankuna Jesusta pantarachiyta munarqaku hinaptinmi payqa denario qollqeta mañaspan qawachirqa chay qollqepi rey Cesarpa rikchayninta. Hinaspam nirqa: “Cesarpa kaqtaqa paymanyá qoychik, Diosmanñataq paypa kaqta”, nispa (Mat. 22:19-21). Kapuqninchikwanpas Jehova Diosta hatunchanapaqmi qawachirqa templopi qollqechan churaq viudawan, payqa wakcha kaspanpas lliw kapuqnintam churaykurqa (Luc. 21:1-4). Huk kutipiñataqmi Jesusqa huk warmachata qayaspan qawachirqa hatunchakuyqa mana allin kasqanta (Mat. 18:2-6). Discipulonkunapa chakinta mayllaspanmi mana hatunchakuq kasqanta qawachirqa (Juan 13:14).

Imaynatam qawasqanku kaqkunawan yachachichwan. Ñoqanchikqa manam atichwanchu Jehova Dios hina mosqoyninkupi qawachispa yachachiytaqa. Ichaqa kachkanmi qellqanchikkunapi fotokuna chaynataq dibujokunapas chaykunawan piensarichinapaq. Yachay munaqmanqa chaykunata qawachiy Diospa prometesqan Paraiso imayna kananmanta. Otaq Bibliamanta estudiachisqaykiman qawachiy yachachisqaykiwan tupaq dibujota hinaspa tapuy imakuna rikusqanmanta. Jehova Diosmi profeta Amosman revelacionninpi qawachispan tapurqa: “¿Imatataq hapichkani?”, nispa (Amos 7:7, 8; 8:1, 2). Uyarisuqnikikunata chaynata tapuy yachachisqaykiman hina fotokunata otaq dibujokunata qawachispa.

Imapas hayka kasqanmanta otaq imay watamanta imay watakama profeciakunapa willasqanmanta qellqaspa otaq dibujaspa qawachiptikiqa yachachisqaykitam astawan entiendenqaku, chayqa kanmanmi Daniel 4:16 nisqanpi ‘qanchis watamanta’ otaq Daniel 9:24 nisqanpi ‘qanchis chunka semanamanta’. Chay yachachikuykunaqa estudianapaq kaq qellqanchikkunapim kachkan.

Familiaykiwan Diosta yupaychanaykichikpaq estudiasqaykichikpim Perspicacia para comprender las Escrituras libropi, Traducción del Nuevo Mundo de las Santas Escrituras Bibliapi chaynataq Willakuq revistapi kaq fotokunata, dibujokunata hinaspa mapakunata qawawaqchik Diospa karpanmanta, Jerusalenpi templomanta, Ezequielpa revelacionninpi qawasqan templomanta astawan entiendenaykichikpaq.

Familiaykiwan Bibliata leespaqa mapakunata servichikuy. Qawawaqchikmi Ur llaqtamanta Haran llaqtaman chaynataq Betel llaqtakama Abrahampa viajasqanta. Qawawaqchiktaqmi israelitakuna Egiptomanta Diospa Prometesqan Allpaman maynin risqankuta. Chaynataq Israelpa sapa ayllunkuna maymanta maykama herenciankupaq allpa chaskisqankutapas. Qawawaqchikmi Salomonpa maymanta maykama gobiernasqanta. Jezabel amenazaptin Jezreel llaqtamanta Beerseba qechwakama hayka punchawpi Eliaspa chayasqantapas (1 Rey. 18:46–19:4). Qawawaqchiktaqmi maylaw llaqtakunapi hinaspa llaqtachakunapi Jesuspa predicasqanta chaynataq Hechos libropa willakusqanman hina apostol Pablopa mayninkunata viajasqanmantapas.

Bibliata estudiaqkunapas astawanmi entiendenmanku congregacionninchik imayna organizasqa kasqanmanta qawasqanku kaqkunawan entiendechisqaqa. Ichapas qawachiwaq asambleapi imakunamanta yachananchikpaq kaqkunata. Achka runakunam Huñunakunanchik Salonman otaq Betel wasiman rispanku admirakunku, chaywanmi cuentata qokunku predicasqanchikqa hinaspa Diospa munayninqa allinpaq kasqanmanta. Huñunakuyman pipas hamuptinqa explicay imanasqam Salonninchikqa huk iglesiakuna hina mana kasqanta. Willaytaq Salonninchikqa Diosmanta yachanapaq kasqantapas. Hinaspa qawachiy predicananchikpaq imakuna kasqanta, qellqakuna chaskinanchik sitiota, maymanta maykama predicananchikpaq kaq mapakunata chaynataq imakunapaq qollqe churananchik cajachakunatapas.

Diospa Llaqtanpi Punta Apaqkunapa horqochimusqan videokunata estudianteman qawachispaqa yanapay Bibliapa yachachisqanpi confiananpaq, Jehova Diospa testigonkuna imakuna rurasqankumanta yachananpaq hinaspa kallpanchay Diospa kamachisqanman hina kawsananpaqpas.

Achka runakunaman yachachispa. Achka runakunaman yachachispapas rikusqanku kaqkunawanmi imamanta yachachisqaykita allinta entiendechiwaq. Allin yuyayniyoq confianza sirvientem chaykunawan imaynata yachachinapaq yanapawanchik.

Estudianapaq kaq Willakuq revistapim fotokuna otaq dibujokuna kachkan, chaykunawanmi Willakuq revistamanta yachachiq ancianoqa astawan entiendechinman, chaynatataqmi ruranman Biblia Estudianapaq Huñunakuypipas.

Lliw runakunapaq discursota qospapas qawasqanku kaqkunawanmi wakinpiqa imamanta yachachisqaykita entiendechiwaq. Ichaqa Bibliapa nisqankunawan entiendechiymi aswan allinqa. Aswan allinnin kaq yachachikuykunamanta entiendechinaykipaq dibujokunawan otaq qawasqanku kaqkunawan yachachinaykipaq tanteaspaqa qepa lawpi tiyaqkunapaqpas sutillam kanan. Chaykunawan yachachinaykipaqqa allintam tanteanayki.

Yachachisqanchikta entiendechinapaqmi rikusqanku kaqkunaqa kanan, manam qawanallankupaqchu. Imamanta yachachisqanchikwan tupasqanman hina qawasqanku kaqkunawan yachachisqaqa astawan entiendenankupaqmi yanapan chaynallataq kasukunankupaqpas. Chaynata yachachisqam imamanta yachachisqanchikta yuyanqaku chaynataq qawasqankutapas.

Uyarisqanchikwanmi hinaspa qawasqanchikwanmi runaqa imamantapas astawan yachanchik. Jehova Diospas Jesucristopas uyariqninkunapa rikusqanku kaqkunawanmi yachachirqaku, kallpanchakunanchikmi paykunapa yachachisqanman hina yachachinapaq.