14 KAQ YACHACHIKUY
¿Imanasqataq pampachakuykuq kananchik?
¿HAYKALLAPIPAS warmamasikikuna imamantapas asikusurqanki utaq maqarusurqanki?... Chaynasuptikiqa, ¿imatam ruwanayki? ¿Kutipakunayki?...
Achka runakunam pipas chaynaruptinqa kutipakuyta yachanku. Jesusmi ichaqa pampachakuq kananchikta munan (Mateo 6:12). ¿Imatataq ruwachwan pipas achka kutita ñuqanchikmanta asikuptinku utaq maqawaptinchik? ¿Hayka kutikamataq pampachaykunanchik?...
Chaymanta yachayta munaspanmi apostol Pedro Jesusta tapukurqa: ‘¿Qanchis kutikamachu pitapas pampachaykunay?’, nispan. Hinaptinmi Jesus nirqa: “Manam qanchis kutikamallachu, aswanqa qanchis chunka qanchisniyuq kutikamam”, nispa.
¿Imamantam Pedroqa tapukuchkan?
Pipas sapa kuti asikusuptikiqa utaq maqasuptikiqa, ¿yupayta atiwaqchu hayka kutikama chaynasusqaykita? Manam ¿aw? Chaymi Jesusqa “qanchis chunka qanchisniyuq” kutikama nispanqa yachachichkarqa pampachananchikpaq mañakuptinqa mana yupaspa hayka kutikamapas pampachanamanta.
Jesusqa pampachakuq kayqa allin kasqanmantam qatiqninkunaman yachachirqa. Chaymi mana pampachakuy munaq huk sirvientemanta willakurqa. ¿Munawaqchu yachayta?... Willasqayki.
Huk kutipim ancha kuyakuq patron karqa. Chay patronqa sirvientenkunamanpas qullqintam prestaq. Ichaqa qullqinta kutichipunanpaq debeqnin sirvientekunata qayachiptinmi pusamurqaku suqta chunka millon qullqi debeqnin sirvienteta.
¿Imatam kay sirvientepa patronnin ruwarqa debesqanmanta suyaykunanpaq mañakuptin?
Chay sirvienteqa chaskisqan qullqitam tukururqa, chaymi mana kutichipuyta atirqachu. Hinaptinmi patronninqa kamachirqa chay sirvienteta, warminta, churinkunata hinaspa imankunatapas rantikunankupaq. Chaynapi chay qullqita patronman kutichipunanpaq. ¿Imaynataq tarikunman karqa chay sirvienteqa?...
Pampaman qunqurakuykuspanmi nirqa: “Suyaykullawayyá, lliwtam pagapullasqayki”, nispan. Qam chay patron kaspaykiqa, ¿imatam ruwawaq karqa?... Chay patronqa llakipayaykuspanmi nirqa amaña pagapunanpaq. Maynatachá chay sirvienteqa kusirikurqa.
Hinaspanmi patronninpa wasinmanta lluqsiruspanñataq debeqnin sirvientemasinwan tuparurqa, hinaspam kunkamanta hapiruspan nirqa: ‘Pachak qullqi debewasqaykita kunachallan kutichipuway’, nispa. Patronnin achka qullqi debesqanta manaña mañachkaptinqa, ¿allinchu karqa sirvientemasinwan chay ruwasqan?...
¿Imatam patronninqa ruwarqa kay mana allin sirvientewan?
Pachak qullqi debekuq runachaqa wakcha runacham karqa. Chaymi mana chaylla kutichipuytaqa atirqachu. Chayraykum qunqurakuykuspan ruegakurqa: “Suyaykullaway pagapullasqaykim”, nispan. Hinaptinqa, qullqi mañaq sirvienteqa ¿llakipayariykunmanchu karqa sirvientemasinta?... ¿Imatam qamqa ruwawaq karqa?...
Ichaqa mana llakipayakuq runam karqa chay sirvientemasinta qullqi mañaq runaqa. Chaymi chaylla qullqinta sirvientemasin mana kutichiptin carcelman hinarachirqa. Chayta qawaq wakin sirvientekunañataqmi patronninman willaykurqaku.
Hinaptinmi chay kuyakuq patronqa sinchi rabiasqa chay sirvienteta qayachimuspan nirqa: ‘Yaw mana allin sirviente, debewasqaykita manaña mañachkaptiyqa, ¿manachu qampas sirvientemasikitaqa llakipayariykuwaq karqa?’, nispa.
¿Imatam ruwanayki pipas pampachaykunaykipaq mañakusuptiki?
Patronnin hinam chay sirvienteqa sirvientemasintaqa llakipayariykunman karqa, ichaqa manam llakipayarqachu. Chaymi patronninqa kamachirqa suqta chunka millon qullqinta kutichipunankama carcelpi wichqanankupaq. Achka qullqi kasqanraykum kutichipuyta mana atispan carcelpi wañukunankama kanan karqa.
Chaymanta willayta tukuruspanmi Jesusqa qatiqninkunaman nirqa: “Chaynallatataqmi hanaq pachapi taytaypas qamkunata ruwasunkichik, wawqikichikta sapakama sunqumanta mana pampachaptikichikqa”, nispa (Mateo 18:21-35).
Llapallanchikmi Dioswanqa manupi hina kanchik imakunapas quwasqanchikmanta. Diospa sunqunta huchanchikkunawan nanachisqanchikqa manam imallanpipas tupanchu runamasinchikpa pantaykuwasqanchikwanqa. Runamasinchikpa pantaykuwasqanchikqa pachak qullqita debewachkanchikmanpas hinallam, Diospa qayllanpi ñuqanchikpa huchallikusqanchikmi ichaqa suqta chunka millon qullqita debekuy hina. Chaymi Dioswan manunchikqa aswan achka kachkan.
Ichaqa llakipayakuq kasqanraykum huchanchikrayku wañurachiwananchikmantaqa pampachaykullawanchik. Chayna kaptinpas Diosqa pampachawasun ñuqanchikpas hukkunata pampachaptillanchikmi. ¿Allinchu kanman chayta ruwayninchik?...
¿Imatam ruwanayki pipas pampachaykunaykipaq mañakusuptiki?
Hinaptinqa, pipas pantaykusuptikiqa, ¿pampachaykuwaqchu pampachaykunaykipaq mañakusuptiki?... ¿Achka kutita kaqlla chaynata ruwasuptikiqa?...
Sichum qam warmamasikita waqarachispaykiqa, munawaqmi pampachaykusunaykita ¿aw?... Chaymi pampachakuykuq kananchik. Ichaqa manam hawa sunqullachu, aswanqa tukuy sunquwanmi. Chayna kaspaqa Jesus qatipakusqanchiktam qawachisun.
Pampachanakuy ancha allin kasqanmanta astawan yachanapaq qawasun Proverbios 19:11; Mateo 6:14, 15 hinaspa Lucas 17:3, 4.