Pampachanakuyqa ancha allinmi

Jesusqa qatiqninkunamanmi yachachirqa piwanpas ima sasachakuy kaptinqa sapallankupi rimasparaq puntata allichanankumanta, chaymi Pedroqa yachayta munarqa haykakama chayta ruwananmanta.

Chaymi Jesusta nirqa: “Señor, ¿hayka kutikamataq pampachanay ñuqapa contraypi wawqiy huchallikuptin? ¿Qanchis kutikamachu?”, nispa. Chay tiempopi religionkunapi punta apaqkunaqa, kimsa kutikamalla pitapas pampachanankumantam yachachiqku. Chaychusmi Pedroqa allin sunquyuqpaq hapikuspan nirqa qanchis kutikama pampachananmanta (Mateo 18:21).

Ichaqa manam Jesusqa hayka kutikama pampachasqankuta yupanankupaqchu yachachirqa. Chaymi Pedrota nirqa: “Manam qanchis kutikamallachu, aswanqa qanchis chunka qanchisniyuq kutikamam”, nispa (Mateo 18:22). Chayqa mana yupaspa hayka kutikamapas pampachaymi. Chaytam Pedroqa ruwanan karqa.

Chaymantam Jesusqa pampachanakunankumanta aswanraq yachachinanpaq llapankuman willarqa mana allin huk sirvientemanta. Chay sirvientepa patronninqa kamachiq runas kasqa. Paysi sirvientenkunamanta cuentata mañasqa, hinaptinsi pusamusqaku chunka waranqa talento nisqa achkallay-achka qullqi debeqnin sirvienteta. Pagapunanpaq qullqin mana kaptinñataqsi patronqa kamachisqa chay sirvienteta, warminta chaynataq churinkunatapas rantikunankupaq, chaynapi pagapunanpaq. Chaysi sirvienteqa patronninpa qayllanpi pitukuykuspan nisqa: “Suyaykullawayyá, lliwtam pagapullasqayki”, nispa (Mateo 18:26).

Chay patronñataqsi llakipayarikuykuspan lliw manunta pampachaykusqa. Chaymantañataqsi chay sirvienteqa pachak denario nisqa aslla qullqi debeqnin sirvientemasinwan tuparusqa. Hinaspansi kunkamanta hapiruspan nisqa: “Lliw debewasqaykita pagapuway”, nispa. Chay sirvientemasinñataqsi pitukuykuspan nisqa: “Suyaykullaway, pagapullasqaykim”, nispa (Mateo 18:28, 29). Ichaqa patronpa pampachasqan sirvienteqa manas patronnin hinachu ruwasqa. Aswanqa debesqanta pagapunankamas sirvientemasintaqa carcelpi wichqarachisqa.

Wakin sirvientekunañataqsi chayta rikuspanku patronman willaykusqaku. Chaysi patronqa llumpayta piñakuspan chay mana llakipayakuq sirvienteta qayarachimuspan nisqa: “Yaw mana allin sirviente, ruegakuwaptikim ñuqaqa lliw debewasqaykita pampachaykurqayki. Chaynaqa, ¿manachu qampas sirvientemasikitaqa llakipayarikuwaq karqa ñuqapas qamta llakipayasqayman hina?”, nispa. Hinaspas patronqa kamachisqa debesqanta pagapunankama carcelpi wichqamunankupaq. Chayta willaruspanmi Jesusqa nirqa: “Chaynallatataqmi hanaq pachapi taytaypas qamkunata ruwasunkichik, wawqikichikta sapakama sunqumanta mana pampachaptikichikqa”, nispa (Mateo 18:32-35).

Jesuspa chay willakusqanqa ñuqanchikpaqpas ancha allinmi. Jehova Diosqa huchanchiktaqa pampachan achka qullqi manutapas pampachachkanman hinam. Ñuqanchikñataqmi iñiqmasinchikkunata pampachaspaqa aslla manutapas pampachachkaq hina pampachanchik. Jehova Diosqa manam huk kutillatachu pampachawanchik, aswanqa sapa kutim. Chaynaqa, ¿manachu ñuqanchikpas iñiqmasinchikkunataqa mana yupaspa haykakamapas pampachananchik? Ñawpaqtapas Jesuspa yachachisqanpi hinam Jehova Diosqa ‘huchanchikta pampachaykuwasun ñuqanchikpas hukkunapa huchanta pampachasqanchikman hina’ (Mateo 6:12).