¿Diciembre killapichu Jesus nacerqa?

BIBLIAQA manam willawanchikchu haykapipuni Jesus nacesqanmantaqa. Manataqmi willawanchikchu diciembre killapi nacesqantapas.

Jesuspa nacesqan Belen llaqtapi, ¿para tiempochu icha usya tiempochu diciembre killaqa? Judiokunapa kislev sutichasqanku killam noviembre hinaspa diciembre killakunawan tupan, chay killapiqa parakunmi hinaspapas chirikunmi. Qatiqnin tebet sutichasqa killañataq diciembre hinaspa enero killakunawan tupan, chay killapiqa astawanmi chirikuq orqokunapas ritiruqmi. Qawarisun imatam Biblia willawanchik Belen llaqtapi imayna tiempo kasqanmanta.

Bibliata huk kaqnin qellqaq Esdrasmi willawanchik kislev killa chirillaña hinaspa parallaña kasqanta. Willawanchikmi “isqon kaq [kislev] killapa iskay chunka punchawninpi” Jerusalen llaqtaman runakuna huñunasqa kasqankumanta hinaspa ‘parapi kasqankurayku katkatatasqankumantapas’. Willawanchiktaqmi chay killapi imayna tiempo kasqanmanta chay huñunasqa runakuna kayna nisqankumanta: “Paramuchkanraqtaqmi, manataqmi callepiqa kaymankuchu”, nispa (Esdras 10:9, 13; Jeremias 36:22). Chayraykum diciembre killapaqqa Belen lawpi kaq michiqkunaqa ovejankunata huñumuqku purunpi mana achikyanankupaq.

Bibliapa nisqanman hinam ichaqa Jesuspa nacesqan tutaqa hatajonkuta michiqkunaqa purunpi cuidachkasqaku. Jesuspa vidanmanta qellqaq Lucaspas kaynatam willakun: “Chay Belen llaqtapa hichpan purunpim karqa michiqkuna. Paykunam ovejankuta tuta cuidachkarqaku”, nispa. (Lucas 2:8-12). Willawasqanchikman hinaqa manam punchawllapichu chaypiqa karqaku, aswanqa tutantinmi uywankutaqa purunpi cuidachkarqaku. Diciembre killapi nisyuta paranan kaptinqa hinaspa qasanan kaptinqa, ¿yaqachum michiqkuna hatuspi hina purunpi yachanmanku karqa? Manapunimá. Jesuspa necesqan punchawkunapiqa manam chirimurqachu nitaq paramurqapaschu, chaynapim yachanchik mana diciembre killapi nacesqanta.a

Diospa palabranqa willawanchikmi ima punchaw ima killa Jesus wañukusqanmanta, ichaqa manam willawanchikchu haykapipuni nacesqanmantaqa. Rey Salomonpa kayna nisqantam yuyarichiwanchik: “Miski asnaq olormantapas aswan allinqa honorniyoq kaymi. Runapa nacesqan punchawmantapas aswan allinqa wañukusqan punchawmi”, nispa (Eclesiastes 7:1). Chayraykuchiki Bibliaqa Jesuspa Diosmanta willakuyninpi rurasqanmantawan wañukusqanmanta astawan willawanchik haykapipuni nacesqanmantaqa.