¿Fiestakunachu huk rikchaq fiestakunata?

ALLPANTINPI llaqtakunapa hinaspa religionkunapa fiestankunaqa manam Bibliapa kamachisqanchu. ¿Imaynataq chaynaqa rikurimurqa? Fiestakunamanta willakuq librokuna kapusuptikiqa maskariy llaqtaykipi fiestakuna imayna rikurimusqanmanta. Wakin fiestakunamantayá rimarisun.

Pascua fiesta otaq Semana Santa sutichasqa fiesta. Jesuspa wañukusqantawan kawsarimusqanta yuyarinapaqña chay fiestata rurakuptinpas imaymana rurasqankuqa manam Diospa munasqanman hinachu. Las Grandes Religiones Ilustradas nisqa qellqapa willakusqanman hinaqa manaraq Jesucristo Allpa pachaman hamuchkaptinmi Babilonia llaqtapi runakuna “taytacha-mamachakunata yupaycharqaku [. . .]. Ancha valorniyoq pachakunawanmi pachachiqku, sumaq alhajakunawan churaqku, sumaq altarkunapi tiyachiqku hinaspam procesionpi hombrokuykuspa muyuchiqku”.

Año Nuevo fiesta. Año Nuevo fiestataqa sapakama nacionkunapim huk killakunapi munasqankuman hina fiestakunku. Kay fiesta imayna rikurimusqanmanta yachaykusunchik. The World Book Encyclopedia sutichasqa librom niwanchik: “Roma llaqtata Julio Cesar sutiyoq kamachikuqmi manaraq Jesus nacechkaptin 46 kaq watapi enero killapa 1 kaq punchawninpi qallarichirqa Año Nuevo nisqa fiestataqa. Chay punchawtam akllarqaku Jano sutiyoq diosninkupaq fiestata rurapunankupaq. Enero killatam [latin simipi Januarius nisqa killatam] suticharqaku Jano nisqa diospa sutinwan, chay diosmi iskay uyayoq karqa, huknin uyanmi ñawpaqta qawaq hukninñataq qepata”, nispa. Chaynapim yachanchik Año Nuevo fiestaqa pantasqa religionkunamanta rikurimusqanta.

Carnaval fiesta. Noticiakuna willaq runakunam carnaval fiestamanta kaynata ninku: “Achkallaña runakunam millakuypaq kaqkunata ruranku”. “Tawa punchawmi tukuy tuta mana controlakuspa tomakunku, tusukunku chaynataq chaqwakunata ruraspanku achikyankupas”, nispa. The New Encyclopædia Britannica sutichasqa librom willawanchik Roma llaqtayoq gentilkunapa Inti yupaychasqankuwan carnaval fiesta tupasqanta. Kunan tiempopi carnaval fiestata manaña Intita yupaychanapaq rurakuptinpas hinallam aychapa munayninpaq rurakun, sinkakunapa taytan Baco sutiyoq diospaq Roma runakunapa fiesta rurasqankuman hinam rurakun.

Huk fiestakuna. Manach atichwanchu Allpantinpi llapallan fiestakuna rurakusqanmanta rimaytaqa. Kaypim ichaqa yuyaymanananchik: Jehová Diosqa manapunim munanchu fiestakunawan runakunatawan institucionkunatapas hatunchananchiktaqa (Jeremias 17:5-7; Hechos 10:25, 26). Chaymantapas religionkunapa fiestankuna allin otaq mana allin kasqanta yachanapaqqa imayna rikurimusqanmantam yachanapuni (Isaias 52:11; Apocalipsis 18:4). Kay libropa 16 kaq yachachikuyninpi Bibliapa yachachikuyninkunam yanapasunki imaynatam Dios huk rikchaq fiestakunapi chaqrukuyta qawasqanmanta yachanaykipaq.