¿Imanasqataq Jehova Diospa testigonkunaqa pascua fiestata mana ruwankuchu?
Yanqa hinaspa chiqap kaq
Yanqa rimasqaku: Jehova Diospa testigonkunaqa manam Jesuspa wañusqanpiqa iñinkuchu mana cristianokuna kasqankurayku.
Chiqap kaq: Jesucristotaqa salvawaqniyku kasqantam riqsikuniku hinaspapas kallpanchakunikum ‘qatipakunaykupaq’ (1 Pedro 2:21; Lucas 2:11).
Yanqa rimasqaku: Qamkunaqa manam iñinkichikchu Jesuspa kawsarimusqanpiqa.
Chiqap kaq: Manam Jesuspa kawsarimusqallanpichu iñinikuqa, aswanqa payraykum iñiyta qallaykurqaniku hinaspa willakunikupas (1 Corintios 15:3, 4, 12-15).
Yanqa rimasqaku: Kusirikunankupaqmi wawa-churinkuta mana saqinkuchu.
Chiqap kaq: Wawa-churinkutaqa kuyanikum hinaspapas kallpanchakunikum allinta uywanaykupaq chaynataq kusisqa kawsakunankupaqpas (Tito 2:4).
¿Imanasqataq Jehova Diospa testigonkunaqa mana ruwankuchu pascua fiestata?
Wakin nacionkunapiqa bibliamanta mana yachasqankuraykum pascua fiestataqa ruwanku.
Jesusqa wañukusqanta yuyarinanchikpaqmi kamachiwarqanchik, manam kawsarimusqanta yuyarinanchikpaqchu. Testigokunaqa ñawpa tiempopi calendariopa nisqanman hinam sapa wata Jesuspa wañukusqantaqa yuyariniku (Lucas 22:19, 20).
Yachasqaykuman hinaqa pascua fiestaqa rikurimurqa ñawpa tiempopi kawsaykuna allin qispisqanraykum, manam Dios kamachisqanraykuchu. Diosqa payllata yupaychananchiktam munan hinaspapas piñakunmi chiqnisqan kaqkunata ruwaptinchikqa (Exodo 20:5; 1 Reyes 18:21).
Biblia mana kamachisqanraykum pascua fiestataqa mana ruwanikuchu. Kaymi kallpanchawanku ‘yachaywan allin kaqkunata akllanaykunaykupaq’, ñawsa hina runakunapa costumbrenkuta qatikunaykumantaqa (Proverbios 3:21; Mateo 15:3). Imapi iñisqaykumanta pipas tapuwaptinkuqa kusikuywanmi willaniku, ichaqa kikinku tanteakunankupaqmi saqiniku (1 Pedro 3:15).