Punta Apaqkunapa cartan

Jehová Diosta kuyaqkunaman:

Jesusmi nirqa: “Yachankichikmi cheqap kaqmanta, chay cheqapmi libreyachisunkichik”, nispa (Juan 8:32). ¡Mayna kusikunapaqmi kayna nisqanqa! Kay ‘tukupay tiempokunapi’ runakuna llullakuqllaña kaptinkupas cheqap kaqmantaqa yachachwanmi (2 Timoteo 3:1). Yuyachkanchikchá cheqapmanta yachaspa kusikusqanchiktaqa. ¡Mayna sumaqmi chayqa karqa!

Ichaqa manam cheqapmanta allinta yachayllachu hinaspa chay yachasqanchikmanta willakuyllachu. Aswanqa yachasqanchikman hinam kawsananchik. Arí, Diospa kuyakuyninpim takyananchik. ¿Imaynatm kuyakuyninpiqa takyachwan? Huk tutallaña wañukunanpaq faltachkaptinmi Diosman sonqo apostolninkunaman Jesus kaynata nirqa: “Taytapa kamachikuyninkunata kasukuspaymi takyachkani paypa kuyakuyninpi, chaynayá qamkunapas kamachikuyniykunata kasukuspa kuyakuyniypi takyaychik”, nispa (Juan 15:10).

¿Cuentata qokunchikchu Diospa kuyakuyninpi Jesus imayna takyasqanmanta? Taytanpa kamachikuyninkunata kasukuspanmi. Chaynatamá ñoqanchikpas rurananchik. Diospa kuyakuyninpi takyanapaqqa tukuy ima rurasqanchiktam Diospa nisqanman hina rurana. Chay tutallam Jesusqa nirqa: “Kaykunata entienderuspa ruraspaykichikqa kusisqam kankichik”, nispa (Juan 13:17).

Diospa kamachikuyninkunata kasukunapaq kay libro yanapawananchiktam tukuy sonqoykumanta munaniku, chaynapi ‘wiñay kawsayta [...] suyaspa’ ‘Diospa kuyakuyninpi takyananchikpaq’ (Judas 21).