Apostolkunam mana manchakuspa willakunku

JESUSPA hanaq pachaman risqanmanta chunka punchaw pasaytam Pentecostes fiestapi, 33 watapi 120 qatiqninkuna Jerusalenpi huñunakurqaku. Qonqayllamantam wayra hina hamuqta uyarirurqaku hinaptinmi qatiqninkunaqa mana yachasqanku idiomakunapi rimayta qallaykurqaku. ¿Imataq pasachkarqa? Diosmi chuya espiritunta qomurqa.

Chay llaqtapim huk nacionkunamanta achka runakuna karqaku Pentecostes fiestapaq. Lliwmi admirakurqaku runakunapa rimayninkupi Jesuspa qatiqninkuna parlasqankuwan. Ima pasasqanmanta ninanpaqmi, Pedroqa yuyarichirqa willakuq Joelpa nisqanta, nirqam serviqninkunaman espiritunta Dios qonanmanta (Joel 2:28, 29). Kay milagrokunam qawachirqa Israel nacionmantaqa cristianokunaña Jehová Diospa favorecesqan kasqankuta. Chaymantapacham Dios serviyta munaqkunaqa cristiano kananku karqa.

Ichaqa, Jesusta cheqniqkunam qatiqninkunata qatikachayta qallaykurqaku. Huk kutipim wakinta presocharurqaku, ichaqa huk angelmi tutapi hamuruspan libraykurqa, hinaspam nirqa hinalla predicanankupaq. Achikyaruptinmi temploman yaykuruspanku Jesusmanta willakurqaku. Religionpi punta apaqkuna piñakuruspankum, mana predicanankupaq kamachirqaku. Apostolkunam ichaqa qarinchakuspanku nirqaku: “Runakunamanta puntataqa Diostam kasukuna”, nispa (Hechos 5:28, 29).

Qatikachayta saqenankumantaqa astawanraqmi rurarqaku. Wakin judiokunam Esteban cristianota yanqamanta tumpaspanku rumikunawan wañuchirqaku. Chaypim kachkarqa cristianokunata cheqniq Tarso llaqtamanta Saulo mozopas. Chay qepatam, Sauloqa Damasco llaqtaman rirqa cristianokunata hapinanpaq. Ichaqa ñanta richkaptinmi llipyay hina kanchaykuptin ñawsayarurqa. Hinaptinmi kayna niqta uyarirqa: “Saulo, Saulo ¿imanasqataq [. . .] qatikachawanki?”, nispa. Payñataqmi nirqa: “¿Pitaq kanki Señor?”, nispa. Hinaptinmi nimurqa: “Ñoqaqa qatikachawasqayki Jesusmi kani”, nispa (Hechos 9:3-5).

Kimsa punchaw pasaytam, Jesusqa Ananias sutiyoq qatiqninta kacharqa Saulota qawarichinanpaq. Saulom bautizakuspan kusikuywan predicayta qallaykurqa. Tiempopa risqanman hinam, apostol Pablo sutiwan reqsichikurqa, payqa mana pisipaq hinam predicarqa.

Qallariypiqa, Jesuspa qatiqninkunaqa judiokunatawan Samariamanta kaqkunallatam Diospa Munaychakuyninmanta predicaqku. Ichaqa huk kutipim, Romamanta iñiyniyoq Cornelio sutiyoq capitanman, huk angel rikuriykuspan nirqa apostol Pedrota qayachimunanpaq. Pedroñataqmi wakin cristianokunawan rispan Corneliotawan familianta predicarqaku. Pedro rimachkaptinmi Corneliowan familianqa Diospa chuya espiritunta chaskirqaku, hinaspam Pedro nirqa Jesuspa sutinpi bautizakunankupaq. Chaymantapacham may nacionniyoq runapas, wiñay kawsayta chaskiyta atinman karqa. Arí, chay allin noticiam lliw nacionkunapi willakusqa kanan karqa.

(Hechos 1:1–11:21.)