Congregacionkunaman Pablopa cartasqan

CHAYRAQ qallariq cristiana congregacionqa Jehová Diospa munaynin cumplikunanpaqmi kanan karqa. Ichaqa aguantanankum karqa qatikachasqa kasqankutawan congregacionpi sasachakuykunatapas. ¿Imaynatam allinta takyarqaku? 21 Griego rimaypi qellqasqa cartakunam anchata cristianokunata kallpancharqa, qorqataqmi sumaq consejokunatapas.

Pablom qallariq 14 cartakunata qellqarqa, Romanos cartamanta Hebreos cartakama. Lliwmi sutichasqa kachkan pikunapaq qellqakusqanman hina. Qawasunyá imakunamanta Pablo rimasqanta.

Imayna kawsakunamanta. Huchapakuqkuna, casado kachkaspa pierdekuqkuna hinaspa chayna hucha ruraqkunapas, mana wanakuspankuqa ‘manam yaykunqakuchu Diospa munaychakusqanmanqa’ (Galatas 5:19-21; 1 Corintios 6:9-11). Diospa serviqninkunaqa manam cheqninakunankuchu huk nacionniyoq kaspankupas (Romanos 2:11; Efesios 4:1-6). Imapas qokuq kaspankum iñiqmasinkunatapas yanapananku (2 Corintios 9:7). Pabloqa kallpanchanmi tukuy sonqowan Diosta mañakunapaq, consejantaqmi: “Tukuy tiempoyá Diosta mañakuychik”, nispa (1 Tesalonicenses 5:17; 2 Tesalonicenses 3:1; Filipenses 4:6, 7). Ichaqa Dios uyarinanpaqqa, iñiywanmi mañakunanku karqa (Hebreos 11:6).

¿Ima consejokunatam Pabloqa familiakunapaq qorqa? Qosakunaqa kuyakusqankuman hinam señorankuta kuyananku. Señorakunañataqmi sonqomanta qosankuta respetananku. Chaymantapas, Diosqa munanmi warmakuna tayta-mamankuta kasukunankuta, paykunañataqmi kuyakuywan hinaspa Bibliapa nisqanman hina yachachinanku (Efesios 5:22–6:4; Colosenses 3:18-21).

Diospa munasqanmanta. Moisesman qosqan Leyqa israelitakunatam pusarqa prometesqa Mesias chayamunankama, cristianokunam ichaqa mana obligasqañachu karqaku kasukunankupaq (Galatas 3:24). Judiokunaman otaq Hebreo kaq cristianokunaman cartasqanpim Pablo yachachirqa imapaq Ley kasqanta, chaynataq Diospa munaynin cumplikunanpaq Cristo ima rurayniyoq kasqanmantapas. Yachachirqam Leypa yaqa llapallan nisqankuna cumplikunanpaq kasqanta. Qawasun, animalkunata wañuchisqankuqa qawachirqam Cristopa wañukuyninta, chaywanmi huchanchik wiñaypaq pampachasqa kanan karqa (Hebreos 10:1-4). Chaynaqa, Cristopa wañukusqanmi chay Leyta mawkayarachirqa (Colosenses 2:13-17; Hebreos 8:13).

Congregacionkuna imayna kananmanta. Cristianokuna congregacionpi imapas rurayniyoq kanankupaqqa, Bibliapa nisqanman hinam allintapuni kawsananku (1 Timoteo 3:1-10, 12, 13; Tito 1:5-9). Chaymantapas Diospa serviqninkunapaqqa ancha allinmi sapa kuti huñunakuyninkuqa chaynapi yachachikuyta chaskinankupaq hinaspa kallpanchanakunankupaqpas (1 Corintios 14:26, 31; Hebreos 10:24, 25).

Tukunanpaqña 2 Timoteo librota qellqaspanmi kaqmanta Pabloqa Romapi tarikurqa, kunanqa preso kaspanmi sentencianta suyachkarqa. As cristianokunallam vidankuta peligropi churaspanku watukurqaku. Wañukunantaña yachaspanmi, Pabloqa qellqarqa: “Allin peleachkaq hinam llapa mana allinkunata venceruni, gananakuypi kallpachkaq hinam chayaruniña maymi chayanayman, manataqmi kachakuykurqanichu iñisqaymantaqa”, nispa (2 Timoteo 4:7). Yaqachá kay qepallanta wañurachirqaku. Ichaqa cheqap cristianokunatam cartankunaqa hinalla yanaparqa, chaynallataqmi kunan tiempopipas.

(Romanos; 1 Corintios; 2 Corintios; Galatas; Efesios; Filipenses; Colosenses; 1 Tesalonicenses; 2 Tesalonicenses; 1 Timoteo; 2 Timoteo; Tito; Filemon; Hebreos.)