Iñinapaq, imayna kawsanapaq hinaspa kuyanapaq consejokuna

SANTIAGO hinaspa Judasqa Jesuspa wawqenkunam karqaku, Pedrowan Juanñataqmi apostolninkuna. Tawankum Diospa yanapakuyninwan Griego rimaypi 7 cartakunata qellqarqaku, sapakama cartakunam qellqaqninpa sutinta apan. Qellqarqakuqa cristianomasinkunata yanapanankupaqwan Jehová Diospa Gobiernonpi hinalla hapipakunankupaqmi.

Iñiyninchiktam qawachina. Manam iñiyniyoq kasqallanchiktachu ninanchik, qawachinanchikmi ruraypipas. Santiagopa nisqanman hinam ‘iñiyninchikqa mana valenchu allinkunata mana ruraptinchikqa’ (Santiago 2:26). Iñiywan sasachakuykunata atipaqqa astawanmi iñiyninta kallpanchan. Chaymantapas uyarinanta suyaspanmi Diosmanta yachayta mañakunman. Diosman sonqo kaspanqa paypa agradonpaqmi kanqa (Santiago 1:2-6, 12). Diosqa yanapanpunim payman sonqo kaqkunataqa. Chaymi Santiago niwanchik: “Diosman asuykuptikichikqa paypas asuykusunkichikmi”, nispa (Santiago 4:8).

Cristianokunaqa iñiyninkutam kallpanchananku tentacionkunatawan mana allin amistadkunata qepanchanankupaq. Judasmi millakuypaq tiempokunapi kawsasqanrayku nin ‘iñiyninkuta defiendenankupaq’ (Judas 3).

Chuyam kananchik. Jehová Diosqa munanmi imapipas chuya kananchikta. Apostol Pedrom nin: ‘Kawsaychik chuyakuna hina. Bibliam nin: Chuya kaychik ñoqa [Jehová Diospas] chuya kasqayrayku’, nispa (1 Pedro 1:15, 16). Chaypaqqa Cristopa ejemplontam qatipakunmanku, Pedropa nisqanman hinaqa Jesusqa hamurqa ‘ejemplonta qatinanchikpaqmi’ (1 Pedro 2:21). Diospa kamachisqankunata llapanpi kasukuy sasa kaptinpas, aswan allinmi ‘allin concienciayoq’ kayqa (1 Pedro 3:16, 17). Pedroqa yuyarichiwanchikmi chuya kawsakuy ancha allin kasqanta hinaspa iñiyninchikta ruraywan qawachinapaqpas, chaynam kananchik Diospa juicionta chaynataq mosoq pachata suyaspanchik, chaypim “tukuy imapas allin arregloman hina rurasqa kanqa” (2 Pedro 3:11-13).

Kuyakuyniyoqmi kananchik. Apostol Juanmi nin: “Diosqariki kuyakuqllañam”, nispa. Jehová Diosqa kuyawasqanchiktam qawachirqa Churinta ñoqanchikrayku wañunanpaq kachamuspan. ¿Imapaqmi chayna kuyakuynin kallpanchawananchik? Apostol Juanmi nin: “Kuyasqallaykuna, sichum chaynata Diosninchik kuyawachkaptinchikqa ñoqanchikpas kuyanakuytam debenchik”, nispa (1 Juan 4:8-11). Arí, iñiqmasinchikta kuyasqanchiktam qawachichwan chaskikuq kaspa (3 Juan 5-8).

¿Imaynatam cristianokuna qawachinku Jehová Dios kuyasqankuta? Juanmi nin: “Diosta kuyaspanchikqa kamachikuyninkunatapas kasukunchikmi, kamachikuyninkunaqa manam llumpay sasachu”, nispa (1 Juan 5:3; 2 Juan 6). Diosta kasukuqkunaqa yachankum Dios kuyasqanta hinaspa ‘wiñay kawsanapaq’ suyakuyniyoq kasqankutapas (Judas 21).

(Santiago; 1 Pedro; 2 Pedro; 1 Juan; 2 Juan; 3 Juan; Judas.)