¿Imaynatam congregacionkunata watukuq ancianokuna yanapawanku?

Mateomanta-Apocalipsiskaman Diospa Palabranqa willawanchik Bernabeymantawan apostol Pablomanta. Paykunaqa congregacionkunatam watukuqku iñiqmasinkuta tukuy sonqonkuwan kuyasqankurayku. Pablom wawqe-paninkuna imayna kasqanta yachananpaq kaqmanta watukuyta munarqa. Karu-karuta rinan kaptinpas payqa hinallam watukurqa (Hechos 15:36). Chayna kuyakuyninkum kunanpas watukuq ancianokunata kallpanchan.

Kallpanchawananchikpaqmi hamunku. Yaqa 20 congregacionkunatam watukun congregacionkunata watukuq ancianoqa, sapa congregacionpim huk semana kallpanchan, chaytam ruran watapi 2 kutita. Dios serviyninkupi allin experienciayoq kasqankuraykum allinta yanapawanku chaynallataq señorankupas casado kaqkunapaqa. Paykunaqa lliw iñiqmasiykutam reqsiykuyta munanku, munankutaqmi ñoqaykuwan predicaytapas chaynataq Bibliamanta yachay munaqkunaman watukaysiwaykutapas. Iñiqmasiykuta kallpanchanankupaqmi ancianokunawan watukunku, kallpanchawananchikpaqmi huñunakuypipas asambleakunapipas yachachiwanchik (Hechos 15:35).

Llapanchikpim reparanku. Dios serviyniykupi allin kanaykuta munasqankuraykum watukamuwanku. Ancianokunawan hinaspa siervo ministerialkunawanmi huñunakun iñiqmasiyku imakunapi kallpanchakusqankumanta qawachinanpaq, chayman hinataqmi paykunata consejan imakunapi astawan kallpanchakunankupaq. Precursorkunatapas yanapanmi Dios serviyninkupi allinta ruraspa astawan kallpanchakunankupaq, kusikunkum huñunakuyman chayllaraq hamuqkunata reqsispanku hinaspa iñiyninkupi astawan ñawparisqankumantapas. Chay ancianokunaqa allinninchikpaq ‘llamkaqmasinchikmi’ (2 Corintios 8:23). Kallpanchakusunyá paykuna hina iñiyniyoq kanapaq chaynataq Diosman sonqo kanapaqpas (Hebreos 13:7).

• ¿Imapaqmi chay ancianokuna watukamuwanchik?

• ¿Imaynatam paykunaqa iñiyninchikpi yanapawachwan?