Kallpanchanakunanchikpaq
1. ¿Imata rurananchikpaqmi allinpuni kanman congregacionta watukuq wawqenchik watukamuwaptinchik?
1 Roma kaq congregacionmanmi apostol Pabloqa kaynata qellqarqa: “Llumpaytam qamkunawan tupaykuyta munachkani Chuya Espiritupa qokuyninta qamkunaman qoykunaypaq chaynapi aswan qaqa hina sayanaykichikpaq hinaspa iñisqanchikwan kallpanchanakunanchikpaq” nispa (Rom. 1:11, 12). Kunanpas congregacionta watukuq wawqenchik watukamuwaptinchikqa ‘kallpanchanakunanchikpaqmi’ hamun.
2. ¿Imanasqataq ñawpaqmantaraq willakamun congregacionman watukuq wawqenchik hamunanmanta?
2 Congregacionpi kaqkuna: Congregacionta watukuq wawqenchik hamunantaqa yaqa kimsa killa ñawpaqtaraqmi willakamun watukunanta chayman hina tiempowan allin arreglokunata ruraspa chay semanapi allinta kallpanchanakunanchikpaq (Efe. 5:15, 16). Llamkaspaykiqa patronnikimanta permisota mañakuwaqpas predicacionman lloqsinaykipaq. Chay watukuwasqanchik killapiqa precursor auxiliar nisqa hina kawaqpas. Chay semanapi illanayki kaptinqa, ¿manachu haykapi illanaykita cambiaruwaq watukuq wawqenchikwan kananchikpaq?
3. ¿Imatataq sapakamaqa rurachwanchik congregacionta watukuq wawqenchikwan kallpanchanakunanchikpaq?
3 Congregacionkunata watukuq wawqenchikqa watukuntaqmá congregacionpi kaqkunata kallpanchananpaq chaynataq predicasqankupi yanapananpaq. ¿Imanasqataq mana arreglota rurankichu paywan otaq warminwampas casado kaptinqa predicacionman lloqsinaykipaq? Wawqenchikqa kusikunmi wawqe-paninchikunamanta piwanpas predicaspa maskiña chayllaraq predicayta yachachkaptinku otaq allin predicaq kanankupaq yanapanan kaptinpas. Llapallanchikmi predicacionpi runakunawan rimayta imayna qallarisqanmanta yachachwan hinaspa allinninchikpaq consejokuna qowasqanchikmantapas yachachwanmi (1 Cor. 4:16, 17). Wasinchikman mikuykunanpaq invitaykuspaqa paywanmi kallpanchanakuchwan (Heb. 13:2). Chaymantapas discursokunata qospan congregacionpaq hina yachachiptinmi atencionwan uyarinanchik.
4. ¿Imaynatam congregacionkunata watukuq wawqenchikta kallpanchachwan?
4 Congregacionkunata watukuq wawqenchik: Apostol Pabloqa manamá sapaqchasqachu watusqan wawqe-panikunamantaqa karqa. Paykuna hinam sasachakuqpas chaynataq preocupakuqpas. Paytapas kallpanchananku karqa chaynataq kallpanchaptinkupas agradecekuqmi karqa (2 Cor. 11:26-28). Roma llaqtapi kaq congregacionpi kaqkuna apostol Pablo chay llaqtaman presochasqa chayamunanmanta yacharuspanku wakinkunaqa 15 legua chaychaytam purirqaku Apio sutiyoq plazakama paywan tupaykunankupaq. “Paykunata Pablo rikuykuspanmi Diosman graciasta qospan aswanraq kallpanchakurqa.” (Hech. 28:15.) Ñoqanchikpas hinallataqmi watukuq wawqenchikta kallpanchachwanmi. ¿Imaynata? Paykuna watukamuwaptinchikmá ‘allinpaq hapispa’ kusikuywan yanapasunchik (1 Tim. 5:17). Paykunapa ñoqanchikpaq rurasqankumanta sonqomanta agradecekusqaykita rimaspapas chaynataq ruraspapas qawachiy. Warminpiwan wawqenchikqa kusikunqakum iñisqanchikta, kuyakuyninchikta chaynataq aguantasqanchiktapas qawaspanku (2 Tes. 1:3, 4).
5. ¿Imanasqataq llapallanchikqa kallpanchawananchikta munanchik?
5 ¿Pimá kay ‘tukupay tiempokunaqa sasallaña kaptin’ mana munanmanchu kallpanchanankuta? (2 Tim. 3:1.) Kunanmantayá kallpanchakuy congregacionkunata watukuq wawqenchik watukuwaptinchik tukuy ima arreglo rurakusqanpi yanapakunaykipaq. Llapallanchikmá watukuq wawqenchikpas chaynataq wawqe-panikunapas kusikuywan chay semanapi kallpanchanakuchwan. Chaynata ruraspam llapallanchik hinalla kallpanchanakusunchik hinaspa yanapanakusunchikpas (1 Tes. 5:11).