¿Imaynatam qellqaykuta ruraniku hinaspa tikraniku?

‘Allin noticiakuna llapallan ayllukunaman, tukuy rikchaq rimayniyoqkunaman hinaspa llapallan runakunaman’ chayananpaqmi yaqa 750 idiomakunapi qellqakunata ruraniku (Apocalipsis 14:6). ¿Imaynatam chay admirakuypaq kaqta ruraniku? Achka nacionkunamanta kaq qellqaqkunapa hinaspa yaqa 3.300 tikraqkunapa yanapakuyninwanmi, paykunaqa llapankum Jehová Diospa testigon kanku.

Ingles rimaypim qellqanku. Diospa Llaqtanpi Punta Apaqkunam oficina central nisqapi Yachachikuykunata Qellqaqkunapa rurasqankumanta cuentallikunku. Paykunam tanteanku chay oficina centralpi otaq wakin Betel wasikunapi imamanta qellqanankupaq. Chay yanapakuqkuna kasqanraykum qellqaykupi yachachikuykunaqa tukuy rikchaq runakunapaq sumaqllataña rurakun.

Tikraqkunamanmi apachinku. Yachachikuykuna lloqsinanpaqña kaptinqa Internetnintakamam Allpantinpi tikraqkunaman apachinku, paykunañataqmi chay chaskisqankuta tikranku. Kallpanchakunkutaqmi entiendenapaq kaq palabrakunawan rimasqanku idiomakunapi ingles rimaymanta imam kaqta tikranankupaq (Eclesiastes 12:10).

Computadorata servichikuspam chaylla ruranku. Computadoraqa manam qellqaqkunapa chaynataq tikraqkunapa rantinpiqa imatapas ruranmanchu. Ichaqa diccionariokunata hinaspa necesitasqanku qellqakunata chaylla maskanankupaqmi computadoraqa yanapan. Jehová Diospa testigonkunapa rurasqanku Sistema Electrónico de Edición Plurilingüe (MEPS) nisqantam computadorapi servichikunku, chaymi yanapan pacha-pachaknintin rimaykunapi qellqakunata horqonankupaq.

¿Imanasqam tukuy rikchaq rimaykunapi qellqakunata horqonaykupaq kallpanchakuniku? “Llapallan runakuna salvakunankuta hinaspa cheqap yachachikuy reqsinankuta” Jehová Dios munasqanraykum (1 Timoteo 2:3, 4).

• ¿Imaynatam ruraniku qellqakuna lloqsimunanpaq?

• ¿Imanasqam achka rimaykunapi tikraniku?