¿Imaynatam Allpantinpi predicakunanpaq yanapaniku?

Sapa watam Testigonkunaqa wara-waranqantin Bibliakunata hinaspa qellqakunata aypuniku, ruranikutaqmi hinaspa allichanikutaqmi Huñunakuna Salonkunata chaynataq Betel wasikunatapas, chaymantapas Betel wasikunapi waranqantin yanapakuqkunatawan misionerokunatam yanapaniku, desgraciakuna pasaptinpas yanapakuykunatam apachiniku. ¿Imaynatam chaykunapaq qollqeta tariniku?

Manam diezmotaqa otaq qollqetaqa mañanikuchu. Allpantinpi predicayniyku achka qollqepaq kaptinpas, manam pitapas mañanikuchu. Yaqa pachak wata ñawpaqtaraqmi Willakuq revistapi Jehová Dios yanapananmanta nirqa: “[Organizacionniykuqa] manam haykapipas limosnakuq hinaqa pitapas qollqetaqa mañakunqachu”, nispa. Chay nisqanqa chaynapunim kachkan (Mateo 10:8).

Sonqomanta qosqaykuwanmi yanapaniku. Achka runakunam Bibliamanta yachachisqaykuta chaninchanku hinaspam sonqonkumanta qollqe churasqankuwan yanapawanku. Testigokunam tiempoykuwan kallpaykuwan hinaspa kapuqniykuwan Diospa munaynin Allpantinpi rurakunanpaq yanapakuniku (1 Cronicas 29:9). Salonkunapi hinaspa hatun huñunakuykunapim cajachakuna sutilla kachkan sonqonchikmanta qollqenchikta churanapaq. Yaqa llapanpiqa mana ancha kapuqniyoq iñiqmasiykum churanku, paykunaqa Jerusalen templonpi wakcha kayninmanta qoykuq viudamanmi rikchakunku (Lucas 21:1-4). Pipas qoy munaqqa qollqentam sapaqchanman ‘sonqonpi tanteasqanman hina’ qonanpaq (1 Corintios 16:2; 2 Corintios 9:7).

Seguropunim kachkaniku qoy munaqkunapa sonqonkuta Jehová Dios kallpanchananmanta chaynapi paypa Gobiernonmanta willakusqanchik cumplikunanpaq (Proverbios 3:9).

• ¿Imanasqam mana wakin religionkuna hinachu kaniku?

• ¿Imakunapaqmi qollqe churasqanchikqa servikun?