Ima qullqiwantaq Diospa llaqtanpi tukuy imata ruwanchik

1, 2. (1) ¿Imamantam iñiqmasinchik Russellta huk pastor tapurqa, hinaspa ima nirqataq iñiqmasinchikqa? (2) ¿Imamantam kay yachachikuypi yachasunchik?

HUK kutipim iglesia reformada nisqa religionmanta kaq pastor iñiqmasinchik Charles Russellta tapurqa: “¿Ima qullqiwantaq Diosmanta willakunaykichikpaq tukuy imata ruwankichik?”, nispa.

Iñiqmasinchik Russellñataqmi nirqa: “Manam haykapipas qullqitaqa mañakunikuchu”, nispa.

Pastorñataqmi tapurqa: “Chaynaqa ¿Maymantataq qullqita hurqunkichik?”, nispa.

Iñiqmasinchikñataqmi nirqa: “Huñunakuyniykupiqa manam qullqi churanankupaq platotaqa, wayqataqa nitaq llikllatapas haywanikuchu, ichaqa chayllam sapakama musyanku gastokuna kasqanmanta. Chaymi kikinku ninku: ‘Huñunakuna wasi kayna sumaq kananpaqqa mayna gastopaqchá. ¿Imaynatam yanapakuyman?’”, nispa. Chayta uyarispanmi chay pastorqa chayna kasqanmanta iskayrayastin qawarirqa. Iñiqmasinchik Russellñataqmi nirqa: “Imam kaqtam willachkayki. Kikinkum tapuwanku: ‘¿Imaynatam qullqiwan yanapakuyman Diosmanta hinalla willakunaykichikpaq?’, nispa. Diospa bendicionnin chaskiq runakunaqa kapusqanman hinam Diospaq quykuyta munanku. Mana kapuptinqa ¿Imaynataq mañaymanku?”, nispa.a

² Iñiqmasinchik Russellqa imam kaqtam willachkarqa. Diospa llaqtanpi kaqkunaqa kapuqninkuta sunqumanta quspankum Diosmanta hinalla willakunapaq yanapanku. Kay yachachikuypim yachasunchik bibliata qillqasqanku tiempopi hinaspa kay tiempopipas Dios yupaychaqkuna imayna yanapanakusqankumanta. Allintaqmi kanman yachamusqanchikman hina kayna tapukuyninchik, ¿imata ruwaspaymi qawachiyman kamachiq Jesucristoman sayapakusqayta?, nispa.

‘Voluntadniyuq kaqmi apamunqa ñuqapaq’

3, 4. (1) ¿Imatam Jehova Diosqa yachan paypi iñiqkunamanta? (2) ¿Imaynatam Israel casta runakunaqa Dios yupaychana karpata ruwanankupaq yanapakurqaku?

³ Jehova Diosqa yachanmi paypi iñiqkuna kapuqninkuta sunqumanta qunankutaqa. Qatiqninpim yachasun ñawpa Israel nacionpi Diospi iñiqkuna kapuqninkuta imayna qusqankumanta.

⁴ Egipto nacionmanta hurquspanmi Israel casta runakunaman Jehova Diosqa kamachirqa payta yupaychanapaq karpata ruwanankupaq, ichaqa chay karpata hinaspa chaypi tukuy imankunata ruwanankupaqmi mana imapas karqachu. Chaymi Jehova Diosqa Moisesta kamachirqa Israel casta runakunata rimapayananpaq, ‘sunqunkumanta voluntadniyuq kaqmi apamunqa ñuqapaq’, nispa (Ex. 35:5). Pasaq killakunallapim Egipto nacionpi runakunaqa paykunata maqa-maqarispa servichikurqaku (Ex. 1:14). Ichaqa chayna kasqankumanta chayraq librasqa kachkaspankupas ¿Aparqakuchu kapuqninkuta? Arí, mana iskayrayaspam qurinkuta, qullqinkuta hinaspa imapas kapuqninkuta aparqaku, tukuy chaykunaqa Egipto nacionpi patronninkupa qusqankuchá karqa (Ex. 12:35, 36). Mañasqankumantapas astawan achkataraqmi aparqaku, chaymi nirqaku amaña masta apanankupaq (Ex. 36:4-7).

5. ¿Imatam Israel casta runakunaqa ruwarqaku kapuqninkuta qunankupaq David kallpanchaykuptin?

⁵ Yaqa tawa pachak qanchis chunka pichqayuq watakuna pasaytam Israelpi kamachiq Davidqa, Diosta yupaychanapaq punta kaq wasita ruwanankupaq kikinpa kapuqninmanta qurqa. Chaymantapas llaqtamasinkunatam qunankupaq kaynata nispa kallpancharqa: ‘¿Pitaq kikillanmanta ofrendata quykunman tayta Diosman?’, nispa. Hinaptinmi ‘paykunaqa tukuy sunqunkuwan kapuqninkuta tayta Diosman qurqaku’ (1 Cron. 29:3-9). Diospa bendecisqanrayku kapuqniyuq kasqanta riqsikuspanmi Davidqa Jehova Diosta mañakuspan nirqa: ‘Tukuy imapas qanmantam hamun. Ñuqaykuqa quchkaykiku qanmanta chaskisqallaykutam’, nispa (1 Cron. 29:14).

6. ¿Imanasqataq Diosmanta enteron allpapi willakunapaqqa qullqita necesitanchik, chaynaqa imatam tapukunanchik?

⁶ Moisespas nitaq Davidpas manam llaqtamasinkunataqa obligarqakuchu kapuqninkuta qunankupaqqa. Paykunaqa tukuy sunqunkumantam qurqaku. ¿Kay tiempopipas qunchikchu? Awriki. Yachanchikmi Diosmanta enteron allpa pachapi willakunapaq qullqi necesitasqanchikta. Bibliakunatawan qillqakunata ruwayqa achka qullqipaqmi, chaynataqmi huñunakunanchik wasikunata, hatun huñunakuna localkunata hinaspa betel wasikunata ruwanapaqwan allichanapaqpas, chaynallataqmi hatun desgraciakuna pasaptin iñiqmasinchikkunata yanapanapaqpas. Chaynaqa tapukunchikchá: ¿Maymantam chaykunata ruwanapaq qullqita hurqunchik? ¿Pipas obligawanchikchu kapuqninchikta qunapaq?, nispa.

“Manam haykapipas limosnakustinqa nitaq pimantapas qullqita mañakustinqa purinqakuchu”

7, 8. ¿Imanasqataq Jehova Diospa llaqtanqa mana haykapipas limosnakustinqa nitaq pimantapas qullqita mañakustinqa purinqachu?

⁷ Iñiqmasinchik Russellwan yanapaqninkunaqa manam wakin religionkuna hinachu arteykuspa qullqitaqa huñuqku. Qallariyllanpim Wllakuq qillqapa huk kaqnin yachachikuyninpi nirqa: “Kay qillqata ruwanapaqqa Jehova Diosmi yanapamuchkan, chaymi kay qillqata ruwaqkunaqa mana haykapipas limosnakustinqa nitaq pimantapas qullqita mañakustinqa purinqakuchu. Jehova Diosmi nin: ‘Ñuqapam qullqipas chaynataq quripas’, nispa. Kay qillqa ruwananchikta manaña munaspanqa sutillachá manaña yanapawasunchu”, nispa (Hageo 2:7-9). Kunankamaqa pachak kimsa chunka wata masninñam pasarun, ichaqa Willakuq qillqam ima qillqamantapas astawanqa enteron allpa pachapi aypukuchkan, hinaspapas hinallam Jehova Diospa llaqtanqa Diosmanta willakuypi kallpanchakuchkanchik.

⁸ Jehova Diospa testigonkunaqa manam huñunakuyninkupiqa qullqita mañakunapaq platota, wayqata nitaq llikllatapas haywankuchu nitaqmi cartantakamaqa pimantapas qullqitaqa mañankuchu. Manataqmi imatapas rantikunkuchu qullqita huñunankupaqqa. Astawanmi Ñawpa watakunapi Willakuq qillqapa nisqanta kasukunku, chaypim nirqa: “Manam allinchu wakin religionkuna hina señorninchikpaq qullqi mañakuyqa. Arteykuspa limosnakustin Diospa sutinpi qullqi mañakuyqa señorninchiktam pinqaypi churan. Manam qullqi quqtapas nitaq chay qullqiwan ima ruwasqankutapas Diosqa bendecinchu”, nispa.b

“Sapakamayá quchun sunqunpi tanteasqanman hina”

9, 10. ¿Imanasqataq kapuwaqninchikkunataqa tukuy sunqunchikmanta qunchik?

⁹ Diosta kasukuqkunaqa manam kapuwaqninchikta qunapaq obligawananchiktaraqchu munanchik. Astawanmi kusikuyllawanña qullqinchiktawan imapas kapuwaqninchiktaqa qunchik, Diosmanta willakuypi enteron allpa pachapi yanapanapaq. ¿Imanasqataq kikillanchikmanta quyta munanchik? Chaymantayá qatiqninpi yachasun.

¹⁰ Punta kaq: Kikillanchikmantaqa qunchik Jehova Diosta kuyasqanchikrayku hinaspa ‘paypa munasqanta ruway munasqanchikraykum’ (1 Juan 3:22). Yupaychaqninkuna sunqumanta qusqankuwanmi Jehova Diosqa anchata kusikun. Apostol Pablom chayna qunamanta rimaspan qillqarqa (leey 2 Corintios 9:7). Jesucristota qatikuq runaqa manam manay munastinchu nitaq obligasqachu kapuqnintaqa qun, aswanqa ‘sunqunpi tanteasqanman hinam’.c Imapas necesitakusqanta qawaykuspam tantean imaynata yanapakunanpaq hinaspam kapuqninwan yanapakun. Chayna ‘kusikuywan quqtam’ Jehova Diosqa kuyakuywan qawan.

11. ¿Imataq kallpanchawanchik kapuwaqninchikmanta allinnin kaqta qunapaq?

¹¹ Iskay kaq: Kikillanchikmantaqa qunchik achka bendicionkuna quwasqanchikmanta agradecekusqanchikraykum. Chayna agradecekuq kanapaqmi Moisesman Diospa qusqan huk kaqnin kamachikuy yuyaymanachiwanchik (leey Deuteronomio 16:16, 17). Watapi kimsa kutikama hatun huñunakuykunaman rispankum qarikunaqa, “Diospa bendecisqanman hina” sapakama kapuqninkumanta Diosman qunankupaq apaqku. Chaypaqqa Diosmanta bendicionkuna chaskisqankupim puntata yuyaymanananku karqa, hinaspam tanteananku karqa allin kaqninta qunankupaq. Ñuqanchikpas Diosmanta chaskisqanchikkunapi yuyaymanaspaqa, kapuwaqninchikmanta allinnin kaqta qunapaqmi kallpanchasqa tarikunchik. Kapuwaqninchikkunata hinaspa qullqinchikta tukuy sunquwan qusqanchikmi qawachin, tukuy ima quwasqanchikmanta agradecekusqanchikta (2 Cor. 8:12-15).

12, 13. (1) ¿Imaynatam Jesucristo kuyasqanchikta qawachinchik? (2) ¿Haykatataq sapakama qunanchik?

¹² Kimsa kaq: Kikillanchikmantaqa qunchik kamachiwaqninchik Jesucristota kuyasqanchikraykum (leey Juan 14:23). ¿Imaynatam kapuwaqninchikwan Jesucristo kuyasqanchikta qawachinchik? Kikinmi nirqa: “Kuyawaqniyqa kasukunmi nisqaykunata”, nispa. Chay ‘nisqankunaqa’ enteron allpa pachapi Diospa munayninmanta willakuymi (Mat. 24:14; 28:19, 20). Chay ‘nisqankunatam’ kasukunchik Diosmanta enteron pachapi willakunapaq tiemponchikta, kallpanchikta hinaspa kapuwaqninchikta quspanchik. Chaykunata ruwaspam kamachiwaqninchik Jesucristo kuyasqanchikta qawachinchik.

¹³ Chaymi Diosmanta enteron allpa pachapi willakusqa kananpaqqa qullqinchikta quspa yanapakuyta munanchik. Chaypaqqa kapuwasqanchikman hinam sapakama tanteakunanchik. Wakiqninchikqa wakchataqmá kanchik (Mat. 19:23, 24; Sant. 2:5). Chayna kaptinpas Jehova Dioswan Jesucristoqa allinpaqmi qawanku sunqunchikmanta aschallatapas quptinchikqa (Mar. 12:41-44).

¿Maymantam qullqita hurqunchik?

14. ¿Imaynatam ñawpa watakunapi qillqanchikkunata munachiq kanchik?

¹⁴ Jehova Diospa testigonkunaqa ñawpa watakunapim qillqanchikkunata munachispa niq kanchik tanteasqankuman hina haykallatapas qunankupaq, chaynapim mana ancha qullqiyuq kaqkunamanpas quq kanchik. Diosmanta yachay munaqkunaman qillqanchikkuna chayananta munaspam mana qullqinku kaptinpas leey munaqkunamanqa saqiq kanchik.

15, 16. (1) ¿Imapaqmi enteron pachapi Diospa llaqtanpi punta apaqkuna 1990 watapi tantearurqaku? (2) ¿Imaynatam qullqi quy munaqkunaqa qunmanku? (qawaytaq 226 paginapi “¿Imakunapim yanapan kapuwaqninchik qusqanchikqa?”, niq yachachikuytapas).

¹⁵ Enteron pachapi Diospa llaqtanpi punta apaqkunam 1990 watapi tantearurqaku, qillqanchikkunata manaña ñawpa watakunapi hina munachinapaq. Estados Unidospim chayna aypuytaqa qallaykurqaku. Sapa llaqtapi iñiqmasinchikkunaman cartata apachispankum imayna ruwanankumanta willarqaku, chaypim nirqa: “Iñiqmasinchikkunamanpas hinaspa leey munaq runakunamanpas mana qullqillapaqmi qillqanchikkunataqa qunkichik, manataqmi ninaykichikchu haykallatapas qunanpaqqa. Pipas Diosmanta willakuypi yanapakunanpaq qullqi quyta munaspanqa qunmanmi, ichaqa manam qunantaraqchu suyananchik mayqan qillqanchiktapas munaptinqa”, nispa. Diosmanta willakusqanchikwanqa manamá ‘negociotachu ruwanchik’, chaytam qawachirqa chayna tanteasqankuwanqa (2 Cor. 2:17). Tiempo pasasqanman hinam enteron pachapiña mana qullqillapaq qillqanchikkunata qunchik.

¹⁶ ¿Imaynatam qullqi quy munaqkunaqa qunmanku? Huñunakunanchik wasikunapim kachkan qullqi churanapaq cajachakuna, chaymanmi churanmanku. Bancontakamapas apachinmankum Jehova Diospa testigonkunapa sutinpi (Asociación de los Testigos de Jehová). Willakuq qillqapim sapa wata huk kutita lluqsimun kapuqninchikkunawan imayna yanapanapaq niq yachachikuy.

¿Imakunapim yanapakun qullqi qusqanchikqa?

17-19. (1) ¿Imakunapim Diosmanta willakunapaq qullqi qusqanchikta sevichikunku? (2) ¿Imakunapim huñunakunanchik wasikunata ruwanapaq qullqi qusqanchikta sevichikunku? (3) ¿Imakunapim huñunakunanchik wasipi gastokunapaq qullqi qusqanchikta sevichikunku?

¹⁷ Diosmanta willakunapaq. Chaypaq qullqi churasqanchiktam servichikunku enteron pachapi Diosmanta willakunapaq, qillqakunata ruwanapaq, betel wasikunata ruwanapaq, betel wasipi gastokunapaq hinaspa Diospa llaqtanpi escuelakuna kananpaq. Chaymantapas misionerokunata, precursor especialkunata hinaspa iñiqmasinchikkunata llaqtan-llaqtan watukuq ancianokunata yanapanankupaqpas. Chay qullqiwantaqmi hatun desgraciapi ñakariq iñiqmasinchikkunatapas yanapanku.d

¹⁸ Huñunakunanchik wasikunata ruwanapaq. Chaypaq qullqi churasqanchikqa enteron pachapi huñunakunanchik wasikunata ruwanapaq hinaspa allichanapaqmi yanapakun. Churasqanchikkunatam huñunku huk law llaqtapi kaq iñiqmasinchikkunapaqpas huñunakunanku wasikunata ruwanankupaq.e

¹⁹ Huñunakusqanchik wasipi gastokunapaq. Chayman qullqi churasqanchikqa huñunakusqanchik wasipi imapas allichanapaq, limpianapaq, hinaspa luzmantawan yakumanta paganapaqmi yanapawanchik, chaynataq huk gastokunapaqpas. Wakinpiqa Diosmanta willakuypi yanapanankupaqmi ancianokuna tanteanku wakin qullqita betel wasiman apachinankupaq, chaypaqqa chaypi huñunakuq iñiqmasinchikkunatam tapunku haykata apachinankupaqpas. Sapa killataqmi qullqi waqaychaq iñiqmasinchikqa huñunakunanchik wasipi gastokunapaq hayka qullqi qusqanchikta, hinaspa hayka gastokuna kasqanta yupaspan papelpi qillqan, chaymantam huñunakuypi willawanchik.

20. ¿Imaynatam kapuqninchikkunawan Jehova Diosta hatunchachwan?

²⁰ Qawamusqanchikman hinam, Diosmanta enteron allpa pachapi willakunapaqqa tukuy imakunapi yanapakunapaq kachkan, ¿manachu chayqa kallpanchawanchik kapuwaqninchikunawan Diosta hatunchanapaq? (Prov. 3:9, 10). Jesucristo kamachiwaqninchik kasqanmanta willakunapaqmi tukuy kallpanchikwan, tukuy yachayninchikwan hinaspa tukuy sunqunchikwan servinapaq kallpanchakuyta munanchik. Ichaqa manam qunqanachu kapuqninchikkunawan yanapakuytapas. Qullqi qusqanchikqa Jehova Diostam hatunchan hinaspapas kamachiwaqninchik Jesucristoman sayapakusqanchiktam qawachin.