11 YACHACHIKUY
¿Pikunataq Jesusmanta qellqarqaku?
Qaway dibujopi rikuriq runakunata. ¿Yachankichu pikuna kasqankuta? . . . Sutinkum Mateo, Marcos, Lucas, Juan, Pedro, Santiago, Judas hinaspa Pablo. Paykunaqa Jesuspa tiemponpim kawsarqaku, chaymi Jesusmanta qellqarqaku. ¿Munawaqchu paykunamanta astawan yachayta?
¿Pikunataq paykunaqa kanku?
Kimsa apostolninkunam Jesuswan Diosmanta willakuqku. ¿Yachankichu pikuna kasqankuta? . . . Paykunaqa Mateo, Juan hinaspa Pedrom. Mateowan Juanmi Jesuspa vidanmanta qellqarqaku. Juanqa qellqarqataqmi Apocalipsis librotapas hinaspa kimsa cartakunatapas. Punta kaq, iskay kaq hinaspa kimsa kaq Juan sutiyoqta. Pedroñataqmi qellqarqa iskay cartakunata: punta kaq hinaspa iskay kaq Pedro sutiyoqta. Iskay kaq cartanpim qellqarqa hanaq pachamanta Jehova Dios churin Jesusta, kaynata niptin: “Paymi kuyasqay Churiy, payraykum kusisqa kachkani”, niqta.
Dibujopi wakin rikuriq runakunapas Jesusmantaqa qellqarqakum. Huk kaqninmi karqa Marcos. Yaqachusmi pay rikurqa Jesusta presochaptinku. Hukñataqmi Lucas. Payqa doctormi karqa, yaqachusmi Jesuspa wañukusqan qepata paypa qatiqnin rikurirurqa.
Jesuspa sullka wawqenkunapas paymantam qellqarqaku. ¿Yachankichu paykunapa sutinta? . . . Paykunapa sutinqa Santiago hinaspa Judasmi. Qallariypiqa manam creerqakuchu Jesuspa yachachisqantaqa. Piensarqakum loco kasqanta. Ichaqa chaymanta qepatam paypi iñirqaku hinaspa qatiqnin karqaku.
Kunanñataq rimasun Pablomanta. ¿Rikuchkankichu dibujopi? Jesusta manaraq qatichkaptinmi Saulowan suticharqaku. Payqa cristianokunata cheqnispanmi mana allinkunata ruwaq. ¿Imaynataq Jesuspa qatiqninqa rikurirurqa? . . . Huk punchawmi payqa ñanninta richkaspan cielomanta rimamuqta uyarirurqa. ¿Pitaq karqa? Jesusmi, paymi tapurqa: “¿Imanasqataq qatiqniykunata ñakarichinki?”, nispan. Chaymantam Pabloqa cambiarurqa hinaspa qatiqninña karqa. Payqa 14 librokunatam Bibliapi qellqarqa, Romanos libromanta Hebreos librokama.
Sapa punchaw Bibliata leeyqa sumaqmi ¿aw? . . . Chaypim Jesusmanta astawan yachanchik. ¿Munachkankichu Jesusmanta hinalla yachayta? . . .