Wawa wañuchiqmantam ayqikurqaku

Joseytam Diospa angelnin musquyninpi rikuriykuspan nirqa: “Hatariy, hinaspa wawachata mamantinta ayqichiy Egiptoman, hinaspa chaypi qipakamuy willanaykama, Herodesmi wawachata maskachkan wañuchinanpaq”, nispa (Mateo 2:13). Hinaptinmi Joseyqa Mariata utqayman rikchachispan chayta willarqa.

Chaymi Joseywan Mariaqa Jesusta ayqichispanku chay tutalla pasakurqaku. Pasakusqanku qipallantam Herodesñataq yacharurqa adivinaq runakunaqa willaqnin mana rispanku huk lawnintaña kutikusqankuta, hinaspanmi rabiawan wañurqa. Chaymi Jesusta wañuchinanpaq Belenpi hinaspa muyuriqnin llaqtachakunapipas kamachirqa iskay watachanmanta urayman qari wawakunata lliwta wañuchinankupaq. Jesuspa hayka watachayuq kasqantaqa adivinaq runakunapa willasqanwanmi tantearurqa.

Herodespa tantearusqanqa ancha llakikuypaqmi karqa. Hayka wawakuna wañusqanta mana yachaptinchikpas, mamankupa waqallasqanqa Jeremiaswan Diospa willachisqanman hinam karqa (Jeremias 31:15).

Joseywan Mariam ichaqa Egiptoman ña ripukurqakuña. Chaymantam huk kutipiña Diospa angelninqa Joseyman tuta musquyninpi rikuriykuspan nirqa: “Hatariy, hinaspa wawata mamantinta pusarikuspa kutiy Israel nacionman, wañurunñam wawata wañuchiy munaqkunaqa”, nispa (Mateo 2:20). Chaymi Joseyqa Jesusta mamantinta pusarikuspa Israel nacionman kutirqa. Chayqa “churiytam Egipto nacionmanta qayamurqani” nispa Diospa willachisqanman hinam karqa (Oseas 11:1).

Joseyqa yaqachusmi Judea law Belenman kutiyta munarqa ñawpaqta chaypi yachasqanrayku. Ichaqa Herodespa rantinpi mana allin churin Arquelaoña kamachisqanta yacharuspanmi manchakurqa, chaymantapas musquyninpim Dios nirqa Judeaman ama rinanpaq. Chaymi paykunaqa Galilea lawmanña pasakuspa Nazaret llaqtapi yacharqaku. Chaypi Jesuspa wiñasqanqa “Nazaret llaqtayuqwanmi sutichasqa kanqa” nispa Diospa willachisqanman hinam karqa (Mateo 2:23).