Jesusta Jehova Dios waqaychasqanmanta

Israel nacionmanta intipa lluqsimunan lawpi yachaq runakunam lucerowan pusachikuqku maymanpas. Chay runakunam huk tuta achkiq lucerota qatispanku Jerusalenman chayarurqaku, hinaspam runakunata tapurqaku: “¿Maypitaq kachkan judiokunata kamachinanpaq naceq wawaqa? Ñawpaqninpi kumuykuytam munaniku”, nispa.

Chayraykum Jerusalenta kamachiq Herodespas yacharurqa chay kamachiq nacerusqanmanta. Chaymi hukmanyaruspan riqsisqa sacerdotekunata tapurqa chay kamachiq maypi nacenanmanta. Paykunañataqmi nirqaku: “Diosmanta willakuqkunam nirqaku Belen llaqtapi nacenanmanta”, nispa. Chaynapim Herodesqa lucerowan pusachikuq runakunata kamachirqa chay wawata Belenpi maskamunankupaq, hinaspam llullakuspan nirqa: “Tariruspaqa willawankichikmi, ñuqapas ñawpaqninpi kumuykamunaypaq”, nispa.

Chaymantam luceroqa Belenman riyta qallaykurqa, chaymi chayta qatispa chay runakunaqa Belenman chayarurqaku. Chay luceropa sayasqan lawpim Jesustawan maman Mariata tarirurqaku, hinaspam wawapa ñawpaqninpi kumuykuspanku qurqaku qurita, inciensota hinaspa miski asnaq sachakunapa wiqinta. Ichaqa chay lucerowan pusachikuq runakunataqa manam Jehova Dioschu kacharqa.

Chay tutam Joseyman sueñoyninpi Dios willarqa: “Herodesmi wawata wañuchiyta munachkan, chayraykuyá wawata mamantinta Egipto nacionman ayqichiy. Amam kutimunkichikchu willanaykama”, nispa. Chaymi Joseyqa chaylla kasukurqa.

Chaymantapas Diosqa chay lucerowan pusachikuq runakunatam nirqa Herodesman amaña kutinankupaq. Chaymi Herodesqa mana kutiptinku llumpayta piñakururqa, hinaspam kamachirqa Belen llaqtapi iskay watayuqmanta urayman lliw qari wawakunata wañuchinankupaq, chaynapi Jesuspas wañunanpaq. Chaywanpas Jesustaqa manam wañuchirqakuchu Egiptopi kasqanrayku.

Herodes wañuruptinmi Joseyta Jehova Dios nirqa: “Kunanqa kutiwaqchikñam”, nispa. Chaymi Joseywan Mariaqa Jesuspiwan kutispanku Nazaret llaqtapi yacharqaku.