Jesusqa manam satanaspa nisqantaqa kasurqachu

Bautizakurusqan qipallatam Jesustaqa Diospa chuya espiritun Judea law chunniqman pusarqa. Jesusqa bautizakusqan punchawmantapacham “hanaq pacha kicharikuykuptin” chaypi tukuy ima yachasqankunata yuyarirurqa, chaymi Judea law chunniqpiqa tukuy ima yuyarirusqanpi yuyaymananan karqa (Mateo 3:16).

Chay chunniqpim payqa tawa chunka punchaw hinaspa tawa chunka tuta karqa. Chaymi imallatapas mana mikusqanrayku puraminti yarqaymanta kachkarqa. Chayta yachaspanmi diabloqa asuykuspan nirqa: “Diospa churin kaspaykiqa kay rumikunatayá niy tantayarunanpaq”, nispa (Mateo 4:3). Jesusñataqmi mana kasurqachu. Paypaqqa mana allinmi karqa kikinpa munasqanta ruwananpaq atiyninta servichikuyqa.

Chaywanpas diabloqa yapatawan pantachiyta munaspanmi nirqa Diospa wasinpa alto patanmanta pawaykunanpaq, chaynapi pawaykuptin angelkuna salvananpaq. Chaypipas manam Jesusqa kasurqachu, hinaspanmi bibliapa nisqanman hina nirqa Diosta pruebaman churayqa mana allin kasqanmanta.

Diablom ichaqa hinallaraq pantachiyta munarqa, chaymi musquyninpi hina “kay pachapi gobiernokunatawan sumaq kayninkunatapas qawachirqa”. Hinaspanmi nirqa: “Tukuy kaykunatam qusqayki qunqurakuykuspa huk kutillatapas yupaychawaptikiqa”, nispa. Jesusmi ichaqa chaylla qipanchaspan nirqa: “¡Kaymanta pasaway satanas!”, nispa (Mateo 4:8-10). Kay kimsa kaq kutipipas Jesusqa manam diablotaqa kasurqachu Jehova Dioslla yupaychana kasqanrayku. Jesusqa Diosman sunqu kaytam munarqa.

¿Imatam diablomanta kayqa qawachiwanchik, hinaspa imatam yachachwan Jesusqa Diosta kasukuq kasqanmanta? Kay willakuymi qawachiwanchik diabloqa chiqaptapuni Jesusta pantachiy munasqanta, chaynataq mana rikuptinchikpas chiqaptapuni enemigonchik kasqanta. Qawachiwanchiktaqmi kay pachapi tukuy imapas paypa makinpi kasqanta. Mana chayqa hukchus Jesusman munachinman karqa, ¿aw?

Chaymantapas diabloqa Jesustam nirqa huk kutillatapas yupaychaptinqa kay pachapi gobiernokunata qunanmanta. Chaynam ñuqanchikmanpas tukuy imata munachiwanchik apu kayta maskanapaq utaq allin riqsisqa kayta maskanapaq. Ichaqa imataña munachiwaptinchikpas Jesusta qatipakuspam hinalla Diosman sunqu kananchik. Diabloqa manam saqiwasunchu, kaqmantam imawanpas Jesusta hina pantachiwayta munawanchik (Lucas 4:13). Chayraykum ima tuqllanmantapas qawan-qawanlla kananchik.