Satanasta Jesus qipanchasqanmanta

Bautizakusqan qipallamanmi Jesustaqa Diospa chuya espiritun chunniqman pusarqa, chaypim Jesusqa 40 punchaw mana imatapas mikurqachu. Hinaptinmi satanas diabloqa pantarachiyta munaspan nirqa: “Diospa churin kaspaykiqa, kay rumikunatayá tantayarachiy”, nispa. Jesusmi ichaqa Diospa palabranpi nisqanman hina satanasta nirqa: “Qillqasqam kachkan: ‘Runaqa kawsan manam mikuyllawanchu aswanqa Jehova Diospa lliw rimasqankunawanmi’”, nispa.

Kaqmantam satanasqa Jesusta nirqa: “Diospa churin kaspaykiqa Diospa wasinpa hawanmantayá pawaykuy. Qillqasqam kachkan: ‘Jehova Diosmi angelninkunata kachamunqa hapisunaykipaq’”, nispa. Jesusñataqmi kaqmanta Diospa palabranpi nisqanman hina nirqa: “Qillqasqam kachkan: ‘Amam Jehova Diosta pruebaman churankichu’”, nispa.

Yapamantam satanasqa kay allpa pachapi gobiernokunata hinaspa sumaq kayninkunata qawachispan Jesusta nirqa: “Tukuy kaykunatam qusqayki huk kutillatapas yupaychawaptikiqa”, nispa. Chaynata niptinpas Jesusqa nirqam: “¡Pasaway satanas! Qillqasqam kachkan: ‘Jehova Diosllatam yupaychanaykiqa’”, nispa.

Chaynapim satanasqa pasakurqa. Chay qipallamantaqmi angelkuna Jesusman mikuchiq hamurqaku. Chaymantam Jesusqa Diospa gobiernonmanta willakuytaña qallaykurqa, chaymanta willakunanpaqmi Diosqa kay pachaman kachamurqa. Runakunam yachachisqanta uyariyta munaspanku qatirqaku.