Cana llaqtapim kaqmanta milagrota ruwarqa

Samariamantam Jesusqa wiñasqan Galilea lawman pasakurqa. Payqa Judea lawpi anchata Diosmanta willakuspanpas manam samakuqchu Galileamanqa kutirqa, aswanqa astawanraq Diospa munayninta ruwaqmi. Ichaqa mana kusikuywan chaskinankumanta musyaspanmi kikin nirqa ‘Diosmanta willakuqqa llaqtanpipuni mana respetasqa kananmanta’ (Juan 4:44). Qatiqninkunañataqmi wasinkuman hinaspa llamkayninkuman kutikurqaku.

Galileapim Jesusqa kaynata willakurqa: ‘Diospa munaychakuyninmi hichparamunña. Chaynaqa wanakuychikyá hinaspa iñiychik sumaq willakuykunapi’, nispa (Marcos 1:15). Chaynata willakusqanraykum hinaspa Jerusalenpi pascua fiestapi imakunapas ruwasqanta rikusqankuraykum achka runakuna Jesustaqa kusikuywan chaskirqaku (Juan 2:23).

Jesuspa Galilea lawpi Diospa munayninta astawan ruwasqanqa yaqachusmi Cana llaqtapi qallarirqa. Chay llaqtapim ñawpaqtapas yakuta vinoyarachirqa. Kutisqanpiñataqmi yacharurqa unqusqanrayku wañuy patanpiña kaq warmamanta. Chay warmaqa Herodes Antipaspaq llamkaq runapa churinmi karqa, chay Herodesqa qipakunamanmi bautizaq Juanta wañuchirqa. Chay warmapa taytanqa Cana llaqtapi Jesus kasqanta yacharuspam Capernaunmanta chayman rirqa. Hinaspanmi Jesusta llakisqallaña nirqa: “Señor hakuyá manaraq warmachay wañuruchkaptin”, nispa (Juan 4:49).

Jesusñataqmi nirqa: “Pasakuy, churikiqa kawsachkanmi”, nispa (Juan 4:50). ¡Maynataya chay runaqa uyarayarqa chaynata Jesus niptinqa! Chaywanpas Jesusta kasukuspanmi wasinman kutikurqa. Ichaqa ñanllataraq richkaptinmi serviqninkuna paywan tupaq kusikuyllawanña rispanku nirqaku warmanqa allinyarusqanmanta. Chay runañataqmi imay hora allinyarusqanmanta tapurqa Jesuspa nisqanman hina kasqanta yachananpaq.

Serviqninkunañataqmi nirqaku: “Qayna punchawmi, chawpi punchaw pasayllata fiebrenqa chinkarurqa”, nispa (Juan 4:52).

Chaywanmi musyakurqa churillantaqa Jesus hampirusqanmanta chay horata Jesuswan tupasqanrayku. Chaymi chay apullaña runaqa llapallan wasinpi kaqkunawan kuska Jesuspa qatiqninkuna rikurirurqaku.

Chay Cana llaqtapim Jesusqa yakuta vinoyarachirqa hinaspa karu-karupi kaq warmatapas rimaykuspallan hampirurqa. Chay warmata hampisqan punchawmantam Jesusqa Galilea lawpi Diospa munayninta astawan ruwayta qallaykurqa. Tukuy chaykuna ruwasqanqa Diosmanta willakuq kasqantam qawachirqa. Ichaqa, ¿imaynatam Nazaretpi kaqkunaqa chaskirqaku?

Chaymantam qatiqnin yachachikuypi astawan yachasun.