Jesusqa Diospa wasintam anchata kuyarqa

Cana llaqtapi casarakuy convidomantam Jesusqa maman Mariawan, wawqin Santiagowan, Joseywan, Simonwan hinaspa Judaswan Capernaum llaqtaman rirqaku.

Ichaqa, ¿imanasqataq chaymanqa rirqaku? Nazaret llaqtankumanta aswan allin llaqta kasqanraykum, chaymantapas yaqa lliw punta qatiqninkuna chay lawkunapi yachasqankuraykum. Chaynapi hina llaqtallankupi allinta yachachinanraykum.

Chay Capernaum llaqtapiqa Jesusqa imakunatapas ruwarqam. Chaymi achka runakuna riqsiyta qallarichkarqaku, ichaqa manapas unaymantam qatiqninkunawan kuska Jerusalenman rinanku karqa. Chaypim wakin runakuna hina 30 watapi kaq pascua fiestata ruwananku karqa.

Jerusalenpi kachkaptinkuñataqmi Jesusqa mana haykapipas qawasqankuta ruwarqa. Chaymi qatiqninkunaqa Jesuspa ruwasqanta qawaspanku uyarayarqakuraq.

Diospa kamachikuyninpim niq Israel runakunaqa Jerusalenpi Diospaq animalkunata kañanankumanta. Karumanta riqkunapas mikunankupaqmi imatapas ruwananku karqa. Diospa kamachikuyninpiqa nirqataqmi karumanta riqkunaqa vacakunata, ovejakunata, cabrakunata utaq ima uywatapas rantinankumanta (Deuteronomio 14:24-26). Chayraykum runakunaqa rantikuyta qallaykurqaku Diospa wasinpa pationpi tukuy rikchaq uywakunata. Wakinqa suwakuqkuraqmi llumpay qullqipaq rantikuspanku.

Tukuy chayta qawaspanmi Jesusqa llumpayta piñakurqa, hinaspanmi qullqita sencillaspa llamkaqkunapa qullqintapas chuqaspan chay wasimanta qarqurqa, hinaspam nirqa: “¡Kaykunata asuchiychik kaymanta! ¡Taytaypa wasintaqa amayá negocio ruwana wasita hinaqa ruwaychikchu!”, nispa (Juan 2:16).

Chayta qawaspam qatiqninkunaqa yuyarirurqaku “wasikita ancha kuyasqaymi rawrachkaq nina hinaraq sunquypi kanqa” nispa paymanta rimaq willakuyta. Judiokunañataqmi Jesusta nirqaku: “Ima milagrollatapas qawaykachiwaykuyá kaykuna ruwanaykipaq derechoyuq kasqaykita yachanaykupaq”, nispa. Jesusñataqmi nirqa: “Kay templota tuñirachiychik hinaptinmi kimsa punchawllapi hatarirachisaq”, nispa (Juan 2:17-19; Salmo 69:9).

Judiokunañataqmi Jerusalenpi Diospa wasinmanta rimasqanta piensaspanku nirqaku: “Kay temploqa tawa chunka suqtayuq watapim hatarichisqa karqa, ¿hinachkaptinchu qamqa kimsa punchawllapi hatarirachiwaq?”, nispa (Juan 2:20). Jesusmi ichaqa templomanta utaq Diospa wasinmanta rimaspanqa kikinmanta rimachkarqa. Chaytaqa qipakunatañam Jesus wañukusqanmanta kawsariruptin qatiqninkunapas entiendenanku karqa.