34 KAQ YACHACHIKUY
Jesusmi 12 apostolninkunata akllarqa
JESUSPAQA 12 APOSTOLNINKUNAM KARQA
Bautizaq Juanqa wata parten ñawpaqtaraqmi willakurqa Jesusqa Diospa malta carneron kasqanmanta. Chay pachaqa asllaraqmi Jesuspa punta qatiqninkunaqa karqa. Paykunam karqa Andres, Simon Pedro, Juan, paypa wawqin Santiago, Felipe hinaspa Bartolomey. Paypa huknin sutinmi Natanael karqa. Chaymanta qipamanqa aswan achkaraqmi Jesuspa qatiqninkunaqa karqa (Juan 1:45-47).
Chaymantam Jesusqa wakin qatiqninkunamanta apostolninkuna kanankupaq akllarqa. Chay apostolkunaqa Jesusta tukuypi yanapanankupaqmi yachachisqa kananku karqa. Chaymi Jesusqa paykunata manaraq akllachkaspan taytanta mañakuq Capernaum lawpi urquman rirqa. Chaypim tukuy tuta taytanpa yanapakuyninta mañakurqa, hinaspa akllasqankunata yanapananpaqpas. Hinaspam paqarintinta lliw qatiqninkunata qayaspan 12 apostolkunata akllarqa.
Jesusqa puntatam suqtata akllarqa, paykunaqa punta qatiqninkunam karqaku, hinaspam autoridadkunapaq qullqi mañaypi llamkaq Mateota akllarqa. Chaymantapas akllarqam Judas Tadeota, Simon Cananitata, Tomasta, Alfeopa churin Santiagota hinaspa Judas Iscarioteta (Lucas 6:16; Mateo 10:2-4).
Chay 12 apostolkunataqa puriqmasinkuna kaptinmi Jesusqa sumaqta riqsirqa. Wakinqa ayllunmi karqaku. Santiagowan Juanqa yaqachusmi Jesuspa primonkuna karqa. Alfeopa churin Santiagopas primonchusmi karqa. ¿Imanasqa? Ichapas Alfeoqa Jesuspa taytan Joseypa wawqin kasqanrayku.
Jesusqa llapankupa sutintam sumaqta yacharqa. Qamqa, ¿yachankichu 12 apostolkunapa sutinkuta? Iskaymi Simon sutiyuq karqaku, iskaytaqmi Santiago sutiyuqpas karqaku, hinaspapas iskaymi Judas sutiyuqpas karqaku. Simon Pedrowan Andresñataqmi wawqintin karqaku, Zebedeopa churin Santiagopas Juanwanmi wawqintin karqaku. Chaykamaqa pusaqmantañam yachawaq. Wakin tawañataqmi autoridadkunapaq qullqi mañaypi llamkaq Mateo, qipakunaman Jesusmanta iskayrayaq Tomas, sachapa sikinpi tiyachkaqta Jesuspa qayasqan Natanael, hinaspa Natanaelpa puriqmasin Felipe.
Yaqa lliwmi Jesuspa wiñasqan Galilea lawmanta karqaku. Natanaelmi Cana llaqtayuq karqa. Felipewan, Pedrowan Andresñataqmi Betsaida llaqtayuq karqaku, ichaqa Mateopa llaqtan Capernaunmanmi Pedrowan Andresqa ripukurqaku. Chaypiqa yaqachusmi Santiagowan Juanpas yacharqaku, chaypim challwata hapispa llamkaqku. Judas Iscariotellam Judea lawmantaqa karqa, paymi Jesusta qipakunaman traicionarurqa.