80 KAQ YACHACHIKUY
Jesuspa 12 apostolninkunamanta
Jesusqa yaqa wata partenña Diosmanta willakuchkaspanmi akllanan karqa pikuna payta yanapanankupaq hinaspa qatiqninkunata pusanankupaq. Chaypaqmi urquman rispan Diospa yanapakuyninta mañakurqa tukuy tuta. Paqarintinñataqmi lliw qatiqninkunata huñuruspan 12 qarikunata akllarqa, paykunatam suticharqa “apostolkuna” nispa. Chay apostolninkunapa sutinmi: Pedro, Andres, Santiago, Juan, Felipe, Bartolomey, Tomas, Mateo, Alfeopa churin Santiago, Tadeo, Simon hinaspa Judas Iscariote.
Andres, Pedro, Felipe, Santiago
Jesusqa illasqankupim apostolninkunaman yachachirqa allinta willakunankupaq, chaynapim sapallankuña willakurqaku. Chaymantapas Diosmi atiyninta apostolkunaman qurqa demoniokunata qarqunankupaq hinaspa unquqkunata sanoyachinankupaq.
Juan, Mateo, Bartolomeo, Tomas
12 apostolninkunatam Jesusqa anchata kuyarqa, hinaspapas amistadninkunam karqaku. Fariseo runakunam Jesuspa apostolninkunataqa mana kaqpaqpas hapirqaku. Jesusmi ichaqa mana chaynatachu qawarqa. Willakunankupaqmi payqa allinta yachachirqa. Chay apostolninkunaqa Jesuswan kuskam karqaku manaraq wañukuchkaptinqa chaynataq kawsarimusqan qipatapas. Yaqa llapankum karqaku Galilea llaqtamanta, wakinkuñataqmi casarasqaña karqaku.
Alfeopa churin Santiago, Judas Iscariote, Tadeo, Simon
Apostolkunaqa pantaq runakuna kaspankum wakinpiqa mana allinta tantiaqku, llutanpi rimaqku utaq mana pacienciakuqkuchu, hinaspapas atipanakuqkum mayqanninku aswan riqsisqa kasqankumanta. Chaywanpas Jehova Diostaqa kuyaqkum. Hanaq pachaman Jesus ripukuptinqa apostolkunañam llapallan iñiqkunata yanapananku karqa.
“Qamkunataqa sutichaykichik ‘amistadniykuna’ nispañam, taytaymanta tukuy ima uyarisqaykunata qamkunaman willasqayrayku” (Juan 15:15).