¿Yanapawanmanchu bibliaqa?

¿IMATAM RUWAWAQ?

Huk kutipim David llamkasqanmanta wasinman kutisqanpi ñanllapiraq tutayarurqa. Hinaspanmi tutayaypi kasqanrayku ñanta wischuruspan mana mayman riytapas atirqachu.

¿Imatam qamqa David kaspaykiqa ruwawaq karqa?

KAYPI YUYAYMANAY

Mayqintataq ruwawaq:

1. ¿Wasikiman chayanaykipaqchu pitapas niwaq yanapaykusunaykipaq?

2. ¿Linternawan achkikuspachu yanapachikuwaq?

3. Icha, ¿hinallachu chinkarusqaykita yachaspapas tutayaypi puriwaq?

Manachá chinkarusqaykita yachaspaqa hinallachu puriwaq ¿aw?

Linternaykiwan achkikuymi allintaqa yanapasunki mana chinkaruspalla wasikiman chayanaykipaqqa.

Chay achki hinam bibliapas yanapasunkiman.

Bibliaqa yanapasunkimanmi:

• Sasachakuykunapi kaptiki allinta tanteanaykipaq.

• Allin runaña kanaykipaq.

• Allintaña kawsakunaykipaqpas.

BIBLIAQA IMAMANTAPAS ALLINTAM YACHACHIN

Runaqa rimayta yachasqanchikmantapacham tapukuqllaña kanchik:

• ¿Imanasqataq cieloqa azul?

• ¿Imamanta ruwasqataq lucerokunaqa?

Wiñaruspapas tapukunchikmi kay pachapi imapas pasakusqanmanta:

• ¿Imanasqataq mana allinkuna kan?

• ¿Imanasqataq wañuqlla kanchik?

¿Yacharqankichu bibliaqa kay tapukuykunamanta allinta yachachisqanta?

Achka runakunam ninku bibliapa yachachikuyninkunaqa cuentolla kasqanta, manaña kay tiemponchikpaq kasqanta utaq sasa entiendena kasqanta. Ichaqa bibliamanta chayna nisqankuqa, ¿chaynachu kanman icha yanqachu chaynakunata ninku?

Runakunaqa ninkum bibliapa yachachisqanman hinaqa, kay pachaqa Diospa makinpi kasqanta. Ichaqa, ¿chaynachu kanman? Enteron pachapim kachkan unquy, wañuy, ñakariy, wakchayay, nanay hinaspa hatun desgraciakuna. Kay pacha Diospa makinpi kaptinqa, ¿kanmanchu chay sasachakuykuna?

¿Yachayta munawaqchu kay pachaqa pipa makinpi kasqanta? Bibliaqa manam runakunapa nisqanman hinachu kay tapukuymantaqa yachachin.

Musyakurqankichá kay qillqapa yachachikuyninqa bibliamanta hurqusqa kasqanta. Jehova Diospa testigonkunaqa manam iskayrayankuchu bibliapa yachachikuyninkuna yanapawasqanchikmantaqa. Bibliaqa Diospa “yuyay qusqanwan qillqasqam kachkan, allinmi runakunata yachachinapaq, pantaypi kasqanta qawachinapaq, imatapas allichanapaq” (2 Timoteo 3:16, 17). Chaymi kallpanchaykiku bibliamanta astawan yachaykunaykipaq.