Adanwan Eva Diosta mana kasukusqankumanta

Sapallan kachkaptinmi Evata culebra rimapayayta qallaykuspan tapurqa: “Sachakunapa rurunta mikunaykichiktaqa manam Diosqa munanchu ¿aw?”, nispa. Evañataqmi nirqa: “Sachakunapa ruruntaqa mikuymankum. Ichaqa chullalla sachapa ruruntam manaqa mikunaykuchu, mikuruspaykuqa wañuruymankum”, nispa. Culebrañataqmi nirqa: “Manam wañunkichikchu, aswanqa Dios hinam rikurirunkichik”, nispa. Chayna nisqan llulla kachkaptinpas Evaqa creerurqam, hinaspam chay sachapa rurunta qawapayaspan mikururqa, Adanmanpas quykurqam. Adanqa yacharqam Diosta mana kasukuspankuqa wañurunankuta, chaywanpas mikururqam.

Hina chay punchawllam Adantawan Evata Jehova Dios tapurqa imanasqa mana kasukusqankumanta. Chaymi Adanqa Evaman tumparqa, Evañataqmi culebraman. Mana kasukuptinkum Diosqa Eden huertamanta qarqururqa, hinaspam linwachkaq espadayuq angelkunata churarqa Eden huertaman manaña yaykunankupaq.

Jehova Diosqa nirqataqmi Evata pantachiqtapas castigananmanta. ¿Pitaq Evata rimapayarqa? Manam culebrachu karqa. Diosqa manam animalkunataqa rimaqtachu unancharqa. Evataqa rimapayarqa mana allin angelmi, chay angeltam sutichanku satanaswan utaq diablowan. Paytam Jehova Diosqa hamuq tiempopi chinkachinqa, hinaptinmi runakunataqa manaña pantachinqañachu.