Jehova Diosllata Moises yupaychasqanmanta

Jacobpa mirayninkunatam Egipto nacionllapiraq kachkaptinku “Israel runakuna” nispa suticharurqaku. Jacobwan Josey wañukuptinkum Israel runakunaqa astawan mirarurqa. Chaymi Egipto nacionpi kamachiqqa utaq faraonqa, Israel runakuna aswan atiyniyuq kananta manchakuspa sirvientenkuna kanankupaqña tantiarurqa. Chay kamachiqqa manam Jacobta hinaspa Joseytaqa riqsirqachu, chaymi Israel runakunata ladrillo ruwaypi hinaspa chakrakunapi llumpayta llamkachirqa. Chaywanpas aswanraq miraptinkum faraonqa tantiarurqa chayllaraq naceq qari wawachakunata wañuchinankupaq. ¡Mayna llakipichá tarikurqaku!

Jokebed sutiyuq Israel warmim kuyayllapaq wawata wachakururqa, hinaspam mana wañuchinankurayku tuturakunapa kasqan Nilo mayuman canastapi churaykurqa. Wawachapa panin Miriamñataqmi pakanpalla qawarqa.

Faraonpa warmi churinñataqmi Nilo mayuta bañakuq rirqa, hinaspanmi chay wawata waqachkaqta tariruspan llakikururqa. Miriamñataqmi tapurqa: “Kay wawata ñuñupusunaykipaq, ¿qayarapamuykimanchu Israel warmita?”, nispa. Faraonpa churinñataqmi “arí” nirqa, chaymi Miriamqa wawapa mamallanta qayaramurqa. Paytam faraonpa warmi churin nirqa: “Apay kay wawata hinaspa ñuñupamuway. Ñuqam pagapusqayki”, nispa.

Chay wawacha wiñaruptinmi Jokebedqa faraonpa warmi churinman aparqa. Payñam Moiseswan sutichaspa wawanta hina uywakurqa. Chaynapim Moisesqa kamachiqpa wasinpi suma-sumaq uywasqa wiñarqa, Jehova Diostam ichaqa mana qipancharqachu. Moisesqa yacharqam Israel kasta kasqanta, chaymi Jehova Diosllata yupaychananpaq tantiakururqa.

Moisesqa 40 watanpi kachkaspanmi Israel runamasinkunata yanapayta munarqa. Huk punchawmi Israel runata Egipto runa maqachkaqta rikururqa. Moisesñataqmi chay maqaq runata wañurachispan aqupi pamparurqa. Faraonñataqmi chayta yacharuspan Moisesta wañuchiyta munarqa, chayraykum Moisesqa Madian llaqtaman ayqikurqa. Chaypim Jehova Dios payta cuidarqa.