Moisespa lluptisqanmanta

QAWAY, Egipto nacionmanta Moisesqa lluptichkan. ¿Rikuchkankichu wañuchinankupaq qatichkaq runakunata? ¿Yachankichu imanasqataq Moisestaqa wañurachiyta munachkanku? Kaymanta yachasunchik.

Moisesqa Egipto nacionpi kamachikuq Faraonpa ayllunwanmi wiñarqa. Chaymi yachayniyoq reqsisqa runam karqa. Hinaptinpas mana Egipto casta runa kasqantam yacharqa, yacharqataqmi taytanwan mamanpas Israel casta runakuna kaspanku sirvientekuna kasqankutapas.

Moisesqa 40 watayoq kachkaspa llaqtamasinkuna imayna kasqankuta yachananpaq watukuq riptinmi paykunataqa Egipto runakunam ñakarichichkasqaku. Hinaptinmi Israel runata maqachkaq Egipto runatapas qawarurqa. Chaymi Moisesqa kaylawninta-waklawninta qawaykacharikuspa mana pipas qawasqanta musyakuruspa Egipto runata maqaspa wañurachirqa. Hinaspam Moisesqa aqopi wañusqata pamparurqa.

Paqarinnintinta Moisesqa llaqtamasinkunata kaqllamanta watukuq rirqa. Paymantaqa tanteakururqa llaqtamasinkuna manaña sirviente kanankupaq yanapay atisqanta. Ichaqa iskay llaqtamasinkunata maqanakuchkaqta rikuruspa maqaqta nirqa: ‘¿Imanasqataq castamasillaykita maqachkanki?’ nispa.

Chay runañataqmi nirqa: ‘¿Pitaq qamtaqa churasurqanki jefeyku hinaspa juezniyku kanaykipaq? ¿Egipto runata wañurachispachu ñoqatapas wañurachiwayta munachkanki?’ nispa.

Hinaptinmi Moisesqa Egipto runata wañuchisqanta runakuna yacharusqankumanta musyakuruspan mancharikurqa. Chayta yacharuspanmi Faraonqa runakunata kamachirqa Moisesta wañuchinankupaq. Chaymi Moisesqa Egiptomanta lluptispan pasakurqa.

Moisesqa Egiptomanta pasakuspanmi karu llaqtaman Madian lawkama rirqa. Chaypim Jetropa ayllunta reqsirqa, hinaspa Sefora sutiyoq huknin warmi churinwan casarakurqa. Hinaspa Jetropa ovejankunataña Moisesqa michirqa. Hinaptinmi 40 watata Madian lawpi yacharqa, 80 watankama. Huk punchawmi Jetropa ovejankunata michichkaspa Moisesqa rikururqa admirakunapaq kaqta, chaymantapacham vidanqa manaña ñawpa hinañachu karqa. Qatiqnin willakuypim qawasunchik imataq chay admirakunapaq qawasqanqa karqa.