Jehova Diosta kasukunankupaq nisqankumanta

Egiptomanta lluqsimusqanku iskay killamantam Israel runakunaqa Sinai urquman chayarurqaku, hinaspam chaypi samarqaku. Hinaptinmi Jehova Diosqa Moisesta urquman qayaruspan nirqa: “Ñuqam Egiptomanta Israel runakunata hurqumurqani. Kamachisqaykunata kasukuspankuqa akllakusqay runaykunam kanqaku”, nispa. Chayna nimusqantam Moisesqa Israel runakunaman willarqa, hinaptinmi paykunaqa nirqaku: “Jehova Diospa imapas niwasqankutaqa ruwasaqkupunim”, nispa.

Chaymantam urquman Moisesqa kaqlla qispirurqa, chaypim Jehova Dios nirqa: “Kimsa punchawmantam paykunata rimapayasaq, amam Sinai urqumanqa qispimunqakuchu”, nispa. Chaymi Moisesqa Israel runakunaman willarqa Diospa econta uyarinankupaq.

Kimsa punchawmantam runakunaqa urqupi tutayay puyutawan wakrimuqta qawarqaku. Uyarirqakutaqmi tunrururumun llipyakunata hinaspa cornetakunata waqasqantapas. Urqupa hawanman Jehova Dios ninapi uraykamuptinmi urquta qusni taparurqa, hinaspam mancharikuypaqta katkatatarqa. Cornetapa waqasqanpas aswanraqmi uyarikurqa. Chaymi Israel runakunaqa llumpa-llumpayta mancharikurqaku. Hinaptinmi Dios nirqa: “Ñuqallam Jehova Diosqa kani, amam huk dioskunataqa yupaychankichikchu”, nispa.

Kaqllamanta urquman Moises qispiruptinmi Jehova Diosqa imaynata yupaychanankupaq hinaspa imaynata kawsakunankupaq kamachikuykunata qurqa. Chaytam Moisesqa qillqaspan runakunapaq leepurqa. Paykunañataqmi nirqaku: “Jehova Diospa imapas niwasqankutaqa ruwasaqkupunim”, nispa. Chaynata nispankupas, ¿kasukurqakuchu?