Mana qunqurakusqankumanta

Sueñokusqanmanta qipallamanmi kamachiq Nabucodonosorqa qurimanta hatu-hatun taytachata ruwarachispan Dura sutiyuq pampapi sayarachirqa, hinaspam ancha riqsisqa runakunata huñururqa. Chaypitaqmi karqa Sadrac, Mesac hinaspa Abednegopas. Nabucodonosormi nirqa: “Cornetata, arpata hinaspa tukuy rikchaq tocanakunata uyarispam taytachapa qayllanpi qunqurakunkichik. Mana qunquraqtaqa chaypunillam rupachkaq hornoman wischuykusaq”, nispa.

Tocasqankuta uyariruspankum llapallanku qunqurakurqaku. Sadrac, Mesac hinaspa Abednegom ichaqa mana qunqurakurqakuchu, chaymi runakunaqa kamachiqman willarqaku: “Taytacha ruwachisqaykitam kay musukuna mana yupaychankuchu”, nispa. Hinaptinmi musukunata Nabucodonosor nirqa: “Kaqmanta mana qunqurakuptikichikqa rupachkaq hornomanmi wischusqaykichik. Manam pipas makiymantaqa librasunkichikchu”, nispa. Musukunañataqmi nirqaku: “Yupaychasqayku Diosmi libraykuwanqaku. Diosniyku mana librawaptinkupas ñuqaykuqa manapunim taytachaykitaqa yupaychasaqkuchu”, nispa.

Nabucodonosorñataqmi soldadonkunata piñasqallaña nirqa: “¡Qanchis kutikamaraq hornota rupachiychik, hinaspayá kay musukunata chaqnaruspa wischumuychik!”, nispa. Horno llumpa-llumpayta rupasqanraykum soldadokunaqa wañururqaku. Wischusqanku musukunam ichaqa mana ruparqakuchu. Chaymanta Nabucodonosor hornota qawaykuptinmi tawa runakunataña rikururqa, chaymi llumpayta mancharikuspan runankunata nirqa: “Kimsa runakunatam wischurqanchik ¿aw? Kunanqa tawatañam qawachkani. ¡Angelchusmi hukninqa!”, nispa.

Chaymantam Nabucodonosorqa hornoman asuykuspan qaparispan nirqa: “¡Hanaq pacha Diospa runankuna, hawaman lluqsimuychik!”, nispa. Lluqsiramuptinkum pachankupas nitaq chulla chukchallankupas mana kañakusqachu, manataqmi qusnimanqa asnariyllapas-asnarisqakuchu, chaymi lliw runakuna qawarayarqaku.

Nabucodonosormi nirqa: “¡Sadracpa, Mesacpa, Abednegopa Diosninyá hatunchasqa kachun! Paymi angelninta kachamurqa yanapaykunanpaq. Paykunapa Diosnin hinaqa manam kanchu”, nispa.

Imaña kaptinpas chay musukunaqa Jehova Diosllatam kasukurqaku. Qampas, ¿paykuna hinachu kanki?