Jesuspa ancha riqsisqa yachachikuyninmanta

Jesusqa 12 apostolninkunata akllaruspanmi urqumanta uraykuspan achkallaña runakunapa kasqanman rirqa. Chay runakunaqa hamurqaku Galileamanta, Judeamanta, Tiromanta, Sidonmanta hinaspa Siria lawmantam. Hamurqakutaqmi Jordan mayupa waklawninmantapas. Chaypim Jesusqa unquqkunatawan demoniopa ñakarichisqankunata sanoyachirqa. Chaymantapas, urqupa waqtanpi tiyaykuspanmi yachachirqa Jehova Dioswan imaynata kuyachikunamanta, Diosta maskanamanta hinaspa Diosta kuyaspaqa kusisqa kawsakunamanta. Yachachirqataqmi runamasinchikta hinaspa chiqniwaqninchikkunata kuyanamantapas. Arí, runamasinchikta mana kuyaspaqa manam Jehova Dios kuyaytaqa atichwanchu.

Jesusqa nirqataqmi: “Chiqnisuqnikichiktapas kuyanaykichikmi, hinaspam sunqumanta pampachanaykichik. Pipas qamkunawan piñakuruptinqa chayllam allinyanakunaykichik. Imaynam qamkunapas munankichik runamasikichik qamkunapaq imapas ruwanankuta, chaynatayá qamkunapas paykunapaq ruwaychik”, nispa.

Jesusqa nirqaraqmi: “Jehova Diosta kuyaymi aswan allinqa qullqilla maskaymantaqa. Qullqitaqa suwapas qichurusunkichikmanmi, Jehova Dios kuyasqaykichiktam ichaqa pipas mana qichusunkichikchu. Diosmi alton pawaqkunaman mikuchin, chaynaqa amayá llakikuychikchu mikunaykichikmantawan pachaykichikmantaqa. Llumpayta llakikuspapas manam una-unay wata kawsakuytaqa atinkichikchu. Diosqa yachanmi imaykichikpas pisipususqaykichikta. Chaymi pisipususqaykichikman hina imatapas qusunkichik”, nispa.

Jesusqa allin yachachiqmi karqa, pay hinaqa manam pipas yachachirqachu nitaq religionpi punta apaqkunapas. ¿Imanasqataq Jesusqa sumaqta yachachirqa? Jehova Dios yachachisqanraykum.