Chuya espirituta Cornelio chaskisqanmanta

Roma soldadokunapa capitannin Corneliom Cesarea llaqtapi yacharqa. Paytaqa judiokunapas respetaqkum llaqtamasinku mana kachkaptinpas. Cornelioqa wakchakunatam yanapaq, Jehova Diostapas sapa kutim mañakuq. Huk punchawmi mañakuchkaptin Diospa angelnin rikuriykuspan nirqa: “Mañakusqaykikunatam Dios uyariykun. Runaykikunata Jope llaqtaman kachaspayá Pedrota qayachimuy”, nispa. Hinaptinmi Cornelioqa chaylla kimsa runankunata Jope llaqtaman kacharqa. Cesareaqa Jope llaqtamantaqa yaqa iskay punchaw puriypim karqa (50 kilometro).

Chay ratom Pedroqa Jope llaqtapi musquyninpi hina qawachkarqa judiokunapa mana mikunanku animalkunata. Chaypim uyarirqa “chayta nakaspayki mikuy” niqta. Pedroñataqmi nirqa: “Manam haykapipas millakuypaq animalkunataqa mikurqanichu”, nispa. Hinaptinñataqmi nimurqa: “Amaña millakuypaq niyñachu, Jehova Diospaqqa manañam millakuypaqñachu”, nispa. Pedroqa uyarirqataqmi: “Wasi punkumantam kimsa runakuna qayamuchkasunki, paykunawanyá riy”, niqtapas. Chay runakunam Pedrota nirqaku: “Roma soldadokunapa capitannin Corneliom qayachkasunki. Cesarea llaqtapi wasinmansi rinki”, nispa. Hinaptinmi Pedroqa runakunata chay wasiman yaykuchispa samachirqa. Paqarintinñataqmi paykunawan rirqa, Jope llaqtapi wakin iñiqmasinkunapas Pedrowanmi rirqaku.

Corneliopa wasinman Pedro chayaruptinmi Cornelioqa qunqurakuykurqa. Pedroñataqmi nirqa: “¡Sayariy! Ñuqapas qam hina runallam kani. Judiokunaqa manam mana judiokunapa wasinkumanqa yaykunikuchu, chayna kaptinpas Diosmi kachamuwarqa wasikiman hamunaypaq. Chaynaqa, niykuwayá imapaq qayachimuwasqaykimanta”, nispa.

Hinaptinmi Pedrota Cornelio nirqa: “Tawa punchaw ñawpaqtaraqmi Diosta mañakuchkaptiy huk angel niwarqa qayachimunaypaq. Chaynaqa Jehova Diosmantayá yachaykachillawayku”, nispa. Pedroñataqmi nirqa: “Kunanqa yacharuniñam Diosqa pimanpas mana sayapakuq kasqanta. Diosqa chaskinmi payta yupaychay lliw munaqkunataqa”, nispa. Hinaspam Pedroqa Jesusmanta sumaqta yachaykachirqa. Chayna yachachichkaptinmi Corneliowan chaypi kaqkunaqa chuya espirituta chaskirqaku, hinaspam bautizachikurqaku.