1 YACHACHIKUY
Bibliaqa allinta kawsakunapaqmi yachachiwanchik
Llapallanchikmi sapa punchaw imamantapas llakikunchik. Munanchikmi kikinchikpas ayllunchikpas mikusqa, pachasqa hinaspa kusisqa kanankuta. Chaymantapas yachaytam munanchik imanasqa ñakarisqanchikmanta, imanasqa wañusqanchikmanta hinaspa hamuq tiempopi imakuna kananmantapas. Chaykunamantam achka runakuna bibliapi yacharunku, yacharunkutaqmi kusisqa kawsakunankupaq biblia yanapasqanmantapas. Chaynaqa, ¿allinchu kanman bibliamanta yachayninchikqa?
1. ¿Imakunamantataq bibliaqa yachachin?
Bibliaqa willawanchikmi runakuna imayna rikurimusqanchikmanta, imapaq kawsakusqanchikmanta, imanasqa ñakarisqanchikmanta, wañukuspa imayna tarikusqanchikmanta hinaspa imanasqa allinlla kawsakuyta munachkaspapas runakuna chiqninakusqanchikmanta. Chaymantapas bibliaqa willawanchiktaqmi kay allpa pachanchik qipa punchawkunaman imayna kananmanta. Achka runakunam bibliata estudiaspanku tukuy chaykunamanta yacharunku.
2. ¿Bibliaqa yanapawachwanchu kusisqa kawsakunapaq?
Arí yanapawachwanmi, bibliam yachachiwanchik casado vidapi kusisqa kawsakunapaq hinaspa churi-wawakunatapas allinta uywanapaq. Yachachiwanchiktaqmi runamasinchikkunawan hawkalla kawsakunapaqpas hinaspa imamantapas llumpayta mana llakikunapaq. Kay qillqawanmi chaykunamanta hinaspa huk yachachikuykunamanta yachanki yachachisuqnikiwan kuska. Hinaspam qampas cuentata qukunki bibliapi yachachikuykunaqa allinninchikpaq kasqanta (2 Timoteo 3:16).
Kay qillqaqa yanapasunkim bibliamanta yachanaykipaq. Chaymibibliapi textokunataqa llapallanta maskaykuspa leeykuwaq.
ASTAWAN YACHAYKUSUN
Kaypim yachaykusun bibliamanta yachasqanku achka runakunata yanapasqanmanta. Chaymantapas yachaykusunmi biblia leeyta mana amirunanchikpaq chaynataq bibliamanta yachanapaqqa hukkunawan yachaykachikunamanta.
3. Bibliamanta yachayqa allinninchikpaqmi
Bibliaqa achki hinam. Yanapawanchikmi imatapas allinta tantianapaq, willawanchiktaqmi hamuq tiempopi imakuna kananmantapas.
Leeychik Salmos 119:105 hinaspa qatiqninmanta rimariychik:
Salmos qillqaqqa, ¿ima nirqataq bibliamanta?
Qamqa, ¿ima niwaqtaq bibliamanta?
4. Bibliapiqa tarichwanmi imapas yachay munasqanchikmanta
Huk warmim imanasqa runakuna ñakarisqanchikmanta yachayta munarqa, bibliapim chaymanta yacharurqa. VIDEOTA qawaykuychik hinaspa qatiqninmanta rimariychik:
Qawasqanchik videopi warmichata, ¿imakunataq llakichirqa?
¿Imatataq payqa bibliapi yacharurqa?
Imamantapas yachayta munaspaqa tapukunaykim, hinalla tapukuspaykiqa yachay munasqaykimantam yachanki. Leeychik Mateo 7:7 hinaspa qatiqninmanta rimariychik:
¿Imamantataq qampas yachayta munawaq? ¿Yaqachu chaymanta biblia willakunman?
5. Bibliata leeyqa allinninchikpaqmi
Achka runakunam willakunku bibliata leeyqa allinninkupaq kasqanta. VIDEOTA qawaykuychik hinaspa qatiqninmanta rimariychik:
Qawasqanchik videopi musu-sipaskuna, ¿imatataq ninku librokuna leeymanta?
Ichaqa, ¿imanasqataq bibliataqa leenku?
Bibliapi yachasqanchikkunaqa sunqunchiktam tiyaykachin. Hinaspapas bibliapiqa hamuq tiempopi kusisqa kawsakunamantam yachasun. Leeychik Romanos 15:4 hinaspa qatiqninmanta rimariychik:
¿Munawaqchu bibliamanta astawan yachayta?
6. Bibliamanta yachaqwan yachaykachikusun
Bibliamanta sapallanchik yachananchikmantaqa, hukwan yachaykachikuymi aswan allinqa kanman. Leeychik Hechos 8:26-31 hinaspa qatiqninmanta rimariychik:
¿Imaynatataq bibliamanta allinta yachachwan? (Kaqmanta leeykuychik 30 hinaspa 31 versiculokunata).
Etiopia nacionniyuq runapas hukwanmi bibliamanta allinta yachaykachikurqa. Chaynallataqmi kunanpas bibliamantaqa yachaykusunchik huk yanapaykuwaptinchik.
WAKIN RUNAKUNAM NINKU: “Bibliamanta yachayqa tiempota usuchiymi”, nispanku.
¿Ima niwaqtaq qamqa? ¿Imanasqataq chaynata ninki?
YUYARIYKUSUN
Bibliaqa yanapawanchikmi kusisqa kawsakunapaq. Willawanchiktaqmi imanasqa sasachakuykuna kasqanmanta, hinaspapas niwanchikmi hamuq tiempopiqa kusisqaña kawsakunanchikmanta.
¿Ima niwaqtaq?
¿Imayna kawsakunanchikpaqtaq bibliaqa yachachiwanchik?
¿Ima yachachikuykunatataq bibliapiqa tarinchik?
Qamqa, ¿imamantataq yachayta munawaq?
ASTAWAN YACHANAYKIPAQ
Kunanpas bibliapa yachachikuyninkunaqa yanapawanchikmi.
“Bibliapa yachachikuyninkunaqa tukuy tiempopaqmi” (Willakuq, 2018-1 kaq)
Warmacha kasqanmanta ñakariq runatam bibliamanta yachasqan yanaparqa. Qawaykuy videota.
Bibliaqa yanapasunkim warmi-qari chaynataq wawa-churikikunawan kusisqa kawsakunaykipaq.
“12 yachachikuykunam yanapasunki aylluykipi kusisqa kanaykipaq” (¡Rikchariy!, 2018-2 kaq)
Bibliapim willawanchik kay allpa pacha satanaspa makinpi kasqanmanta. Qawaykuy videota.