Revistanchikta leeqkunam tapukunku
Jehová Diospa testigonkunaqa, ¿paykunalla salvakunankutachu piensanku?
Jehová Diospa testigonkunaqa cheqap religionpi kasqankutam yachanku. Mana chayqa cambiarunmankuñach religionninkuta. Sapaq religionkunapi kaqkuna hinam paykunapas salvakuyta munanku. Ichaqa manam yachankuchu pikuna salvakunankutaqa. Alto-altopi kaq Diosmi, chaytaqa yachan (Isaias 33:22).
Bibliam niwanchik salvakunapaqqa manam salvakuy munayllachu aswanqa Salvawaqninchik Jehová Diospa kamachisqankunatawanmi kasukuna, nispa. Rikchanachisunchik: huk runa llumpa-llumpayta onqospanqa, ¿imatataq ruranman? ¿Kikillanmanta sanoyaruytachu suyanan, icha doctorpa nisqantachu kasukunan?
Chaynallataqmi salvakuyta munaspanchikqa Jehová Diospa nisqantam kasukunanchik. Lliw salvakunankuta Dios munaptinpas manam lliwchu salvakunqaku. Diospa churin Jesusmi nirqa: “Manam: “¡Señorlláy, Señorlláy!” nispa llapallan niwaqniykunachu Diospa munaychakusqanmanqa yaykunqa aswanqa hanaq pachapi kaq Taytaypa munasqan ruraqllam”, nispa (Mateo 7:21).
Jehová Diospa testigonkunaqa yachankum Jesuspa wañusqanpi iñiqkunallata hinaspa paypa yachachisqanta kasukuqkunallata Dios salvananta (Hechos 4:10-12). Salvacionta chaskinapaq kimsa ruraykunamantayá Bibliapi qawasunchik.
(1) Jesusmi nirqa: “Kuyanakuptikichikqa llapallan runakunam yachanqa discipuloykuna kasqaykichikta”, nispa (Juan 13:35). Jesusqa rantinchikpi wañusqanwanmi qawachirqa kuyakuyqa ancha valorniyoq kasqanta. Chaymi salvakunapaqqa runamasinchikta kuyananchik.
(2) Taytanta mañakuspanmi Jesusqa kaynata nirqa: “Yachachirqanim pim kasqaykita”, nispa (Juan 17:26). Jesusqa yacharqam taytanpa Sutin ancha valorniyoq kasqanta. Chaymi “sutiki yupaychasqa kachun” nispan mañakurqa (Mateo 6:9). Diospa sutinta yupaychanapaqqa reqsinanchikmi hinaspapas respetananchikmi. Salvakuyta munaqkunaqa Jesus hinam Diospa sutinta rimananku. Chaymantapas huk runakunatam Diospa sutinmantawan sumaq kayninkunamanta yachachinanku (Mateo 28:19, 20). Chaymi Biblia niwanchik Diospa sutinta rimaqkunalla salvakunankumanta (Romanos 10:13, NM).
(3) Jesusmi Pilatota nirqa: “Munaychakuyniyqa manam kay pachamantachu”, nispa (Juan 18:36). Kunan tiempopiqa as runakunallam Diospa Munaychakuyninpi iñisqankuta qawachinku, chaypiqa Jesusmi Kamachinqa. Chay Gobiernopi mana iñisqankum qawachin runamasillankupi confiasqankuta. Ichaqa Diospa Gobiernonman sayapakuqkuna hinaspa chay gobiernopi sumaq kawsaymanta runamasinkuman willakuqkunallam salvakunqakuqa (Mateo 4:17).
Salvakunankupaq ima ruranankuta yacharuspankum Jesusta qatiqninkuna tapurqaku “¿pitaq salvakuytaqa atinman?”, nispa. Hinaptinmi pay nirqa: “Runakunaqa manam atinmanchu, Diospaqmi ichaqa tukuy imapas atinallan”, nispa (Lucas 18:18-30). Jehová Diospa testigonkunaqa sonqonkumantam kallpanchakunku Diospa nisqanta kasukuspa salvakunankupaq, runamasinkutapas yanapankum chayta ruranankupaq.