¿Imaynatataq Jesusqa salvawanchik?
¿Imatam bibliaqa yachachin?
Jesusqa achka runakunata salvawananchikpaqmi wañukurqa (Mateo 20:28). Chaymi bibliapipas nin “runakunata salvananpaq” Jesusqa kay pachaman hamusqanta (1 Juan 4:14). Chaymi bibliapiqa kaynataraq nin: “Jesusmanta hukpiqa manam salvacionqa kanchu, salvawananchikpaqqa manamriki kay pachapiqa kanchu runakunamanta Diospa akllasqan huk runaqa”, nispa (Hechos 4:12).
Jesusqa wañukurqa ‘haykam paypi iñiqqa mana wañuchisqa kananpaqmi’ (Hebreos 2:9; Juan 3:16). Kimsa punchaw wañusqa kachkaptinmi Jehova Diosqa kawsariykachirqa hinaptinmi Jesusqa hanaq pachaman kutikurqa (Hechos 3:15). Kunanqa hanaq pachapim kachkan “Diosman asuykuqkunapa rantinpi rimananpaq” (Hebreos 7:25).
¿Imanasqataq Jesusqa rantinchikpi rimanan?
Llapallanchikmi huchayuq kanchik (Romanos 3:23). Huchayuq kasqanchikraykum wañunchik, huchanchikraykutaqmi Diosmanta karunchasqa kachkanchik (Romanos 6:23). Jesusñataqmi llapallan paypi iñiqkunata Dioswan allinyachiwananchikpaq wañukurqa (1 Juan 2:1). Chaymi Jesusqa favorninchikpi rimarin Dios mañakusqanchikta uyariykuwananchikpaq hinaspa huchanchikta pampachaykuwananchikpaq (Mateo 1:21; Romanos 8:34). Diosmi Jesustaqa kay pachaman kachamurqa ‘paynintakama runakuna salvakunankupaq’ (Juan 3:17). Chaymi favorninchikpi rimariptin Diosqa Jesuspa nisqanta uyariykun.
¿Jesuspi iñispallachu salvasqaqa kanchik?
Manam. Salvasqa kanapaqqa manam Jesusllapichu iñina (Hechos 16:30, 31). Bibliapim nin: “Cuerponchikpas mana samayninchik kaptinqa wañusqam kachkan, chaynam iñiyninchikpas wañusqa kachkan allin kaqkunata mana ruwaptinchikqa”, nispa (Santiago 2:26). Arí, salvasqa kanapaqqa:
Jehova Diosmantawan Jesusmantam yachananchik (Juan 17:3).
Paykunapim iñinanchik (Juan 12:44; 14:1).
Paykunapi iñispapas kamachikuyninkunatam kasukunanchik (Lucas 6:46; 1 Juan 2:17). Jesusmi nirqa: “ Manam ‘¡señorlláy, señorlláy!’ nispa llapallan niwaqniykunachu hanaq pachapi Diospa munaychakuyninmanqa yaykunqa, aswanqa hanaq pachapi taytaypa munasqanta ruwaqkunallam”, nispa (Mateo 7:21).
Sasachakuypi kaspapas hinallam Diospi hapipakunanchik. Jesusmi nirqa: “Tukupaykama takyaqmi salvasqaqa kanqa”, nispa (Mateo 24:13).