Leeqkunapa tapukuyninkuna

¿Huk cristiana umanta tapakunanchu huñunakuypi otaq asambleakunapi discursokunata señas rimayman tikraspan?

Lliw cristianakunam umankutaqa tapakunanku qosanpa otaq huk cristianopa rurananta ruraspanqa. Kayqa Pablopa nisqanman hinam, paymi nirqa: “Sichu huk warmi qala umalla Diosta mañakunqa otaq Diosmanta willakunqa hinaspaqa umantam penqayman churan”, nispa. ¿Imanasqa? ‘Qariqa warmipa umanmi’ (1 Cor. 11:3-10). Chaykunata ruraspan umanta tapakuq warmiqa, Diospa nisqanta congregacionpi kasukusqantam qawachin (1 Tim. 2:11, 12).a

¿Umanta tapakunanchu mana señaswan rimana huk idiomaman cristianopa discurso qosqanta tikraspan? Cristianaqa discurso qoqpa yachachisqallantam tikrachkan, manam yachachichkanchu. Huk idiomakunaman tikraptinqa, uyariqkunaqa rikunkum discurso qoqta hinaspa tikraqtapas uyarinkum. Cristianataqa manam yachachiqta hinachu qawanku. Wakinpiqa tiyaspallam tikranman, sayanpa kaspanpas discurso qoqtam qawan, manam huñunakuypi kaqkunatachu. Chaymi umantaqa mana tapakunanchu. Ichaqa, señasman tikrayqa manam chaynallachu huk idiomaman tikraywanqa.

Aparatokunata servichikusqankuraykum señasman tikraq cristianata huñunakuqkunaqa astawan qawanku hatun televisionpi, discurso qoqtañataqmi wakinpiqa mana rikunkuchu. Chaymi, allin kanman cristianakunapa umanku tapakuyninkuqa, chaynatam tikraqlla kasqankuta qawachinqaku.

¿Umankuta tapakunankuchu Diosmanta Yachachinapaq Escuelapi, Diosta Servinapaq huñunakuypi discursokunata otaq demostracionkunata tikraspanku, chaynataq Biblia Estudianapaq Huñunakuypi otaq Llaqta Cuidaq revistamanta estudiopi kaqkunapa rimasqankuta tikraspanku? Wakinpiqa manapaschá tapakunankuchu kanqa. Huñunakuqkunam cuentata qokunqaku hukkunapa rimasqankuta, cristianakunapa discurso qosqankuta otaq demostracionkuna rurasqankuta tikraqlla kasqankumanta, manam yachachisqankutachu. Ichaqa tapakunankum chay huñunakuykunapi hermanokunapa discursonta otaq Llaqta Cuidaq revistamanta estudiopi hinaspa Biblia Estudianapaq Huñunakuypi yachachisqankuta tikraspanku chaynataq huñunakuypi takikunata tikraspankupas. Huñunakuypiqa tikranqakuchá warmakunapa, hermanokunapa, hermanakunapa hinaspa congregacionpi ancianokunapa nisqankutapas. Chaymi allin kanman huñunakuy tukunankama umanku tapakuyninkuqa.

[Willakuy]