¿Macedoniaman riwaqchu?

PABLOM tarikuchkarqa buquekunapa kanan Troas llaqtapi (Asia Menor), chaypim Dios revelaptin rikurqa Macedonia law runapa kayna nisqanta: “Macedonia lawman hamuspayá yanapaykuwayku”. Pablowan puriqmasinkunam nirqaku: “Cheqaptapunim yacharqaniku [. . .] allin noticiata willakamunaykupaq Diospa qayawasqankuta”, nispa. ¿Imapim tukurqa chaypi predicasqanku? Achkam Diospi iñirqaku, paykunamantam karqa Lidia hinaspa ayllunpas, paykunaqa yacharqaku huk llaqtakunamantapas ancha reqsisqa Filipos llaqtapim (Hech. 16:9-15).

Kunanpas Jehová Diospa testigonkunaqa chaynatam predicanku. Achkam kikinkupa qollqenkuwan rinku predicaqkunapa necesitakusqan nacionkunaman. Chaynatam rurarqa Lisa sutiyoq iñiqmasinchik, paymi astawan predicananpaq Canadamanta Kenia nacionman rirqa. Trevorwan Emilypas Canadamantam Malaui nacionman rirqaku chaynata ruranankupaq. Paulwan Maggiepas jubilakusqankuta servichikuspankum Inglaterramanta África orientalman rirqaku. ¿Paykuna hinachu qampas kanki? ¿Atiwaqchu huk nacionman riyta? Qawasun Bibliapa nisqanta hinaspa huk consejokunatapas huk nacionman rispayki allin kanaykipaq.

Yachanaykim imarayku riy munasqaykita

Puntataqa yachanaykim imarayku riy munasqaykita. Punta kaq hatun kamachikuymantam Jesus nirqa: ‘[Jehová] Diostam kuyanayki tukuy sonqoykiwan, tukuy vidaykiwan hinaspa tukuy yuyaynikiwan’. Huk nacionman rinapaqqa kallpanchawananchik Diosta kuyasqanchik hinaspa runakunata yachachiy munasqanchikmi. Qatiqnin kamachikuymantam Jesus nirqa: “Kuyankim runamasikita kikikita hina”, nispa. Runamasinchikta kuyaspaqa yanapaytam munasun (Mat. 22:36-39; 28:19, 20). Hinaptinqa, kuyakuymi tanqawananchik huk nacionman rinapaqqa manam reqsiy munaychu, chaypaqqa imatapas saqespam kallpanchakuna. Remcowan Suzannem Países Bajos nisqamanta Namibia lawman risqankumanta ninku: “Kuyakuymi kaypi qepachiwanku”, nispa.

Namibia nacionpi congregacionkunata watukuq Willie sutiyoq ancianom nin: “Kay nacionpi qepaqkunaqa manam atiendechikuyta piensaspachu hamurqaku, aswanqa predicaypi yanapanankupaqmi”, nispa.

Imarayku riy munasqaykita yacharuspaykiqa tapukuy: “¿Ima ruray yachasqaytam allinta servichikuyman? ¿Sumaq noticiamanta allin yachachiqchu kani? ¿Huk idioma rimayta yachanichu? ¿Munanichu huk idioma yachayta?”, nispa. Señorayki hinaspa churikikuna kaptinqa paykunawan allinta rimay. Congregacionpi ancianokunatapas tapukuy. Astawanqa, Jehová Diosta mañakuy. Kaykunata ruraspaykim yachanki huk nacionpi serviy atinaykimanta otaq manapas (qaway kayna niq recuadrota: “¿Allintachu reqsikunki?”).

Maymantaq riwaq

Pablotam Dios revelaspan nirqa Macedoniaman rispam yanapananpaq, kunanqa manañam chaytaqa ruranchu. Ichaqa, kay revistawan hinaspa huk qellqakunawanmi willawanchik mayqen nacionkunapi predicaqkuna necesitakusqanta. May nacionkunaman riy munasqaykita qellqay. Huk idiomata rimanaykipaq sasachakuspayki otaq huklawman rispa chaypi mana qepakuyta piensaspaqa, rimasqayki idioma rimaq nacionkunaman rinaykipaq tanteay. Chaymantañataq, piensasqayki nacionmanta allinta yachay: ima documentoyoq yaykunaykimanta, chirisqanmanta otaq rupasqanmanta, huk sitiomanta huklawman imakunapi rinamanta, peligro kasqanmanta, qollqemanta hinaspa hukkunamantapas. Tapukuy huk nacionman predicaq riqkunata. Amataq qonqaychu Diosman orakuyta. Ichapas mana chayllachu tanteanki mayman rinaykipaqqa. Macedoniaman rinankupaq manaraq kamachisqa kachkaptinkum, Pablotawan riqmasinkunata ‘chuya espiritu harkarurqa Asia lawpi ama willakunankupaq’ hinaspa ‘Bitinia lawman riyta munaptinkupas Jesuspa espiritunmi harkarurqa’ (Hech. 16:6-10).

Maykunaman rinaykipaq tantearuspaqa, qellqanaykim chay nacionkunapi Betelman. Willanaykitaqmi ñawpaqta hinaspa kunanpas Diosta imayna servisqaykita, tapukuytaq imapas yachay munasqaykimanta: wasimanta, qollqemanta, hospitalkunamanta hinaspa llamkaymantapas. Chay qellqasqaykita qoy congregacionpi ancianokunaman. Paykunam qosqayki cartatawan kuskata huk cartata qellqaspanku akllasqayki nacionkunapi Betelman apachinqaku. Qellqasqaykita contestamusqankum yanapasunki maypi allinta servinaykimanta tanteanaykipaq.

Willieqa nintaqmi: “Mayman risqankupi kusisqa kaqkunaqa puntatam reqsiq rirqaku maypi servinankuta. Warmi-qari iñiqmasinchikmi cuentata qokurqaku karupi yachay sasa kasqanmanta, chaymi qeparqaku yanapanata necesitaq huk llaqtapi, chaypiqa chayllam costumbrarurqaku”, nispa.

Mosoq sasachakuykuna

Manam facilchu nacionninchikta saqespa huk nacionpi yachayqa, kanmi sasachakuykuna. Lisa sutiyoq iñiqmasinchikmi kaynatawan nin: “Manam facilchu sapallayki kasqaykita venceyqa”, nispa. ¿Imaynatam chayna sientekusqanta atipan? Congregacionpi cristianokunawanmi allin amistadta ruran. Ejemplopaq, tantearurqam llapallanpa sutinta yachananpaq, chaypaqqa huñunakuy manaraq qallarichkaptin hinaspa tukuruptinmi iñiqmasinkunawan riman. Chaymantapas, paykunawanmi predican hinaspa wasinmanpas pusan. Chaynatam amistadkunata ruran. Paymi nin: “Manam ñakakunichu tukuy kaykuna rurasqaymanta, Jehová Diosqa anchatam bendeciwarqa”, nispa.

Paulwan Maggiepas warmankuta vida pasanankupaq yanaparuspankum tantearqaku huk nacionman riyta, chaypaqqa 30 wata yachasqanku wasitam saqerqaku. Paulmi nin: “Manam sasachu karqa imapas kapuqniyku saqeyqa. Sasaqa karqa familiayku saqeymi. Avionpi waqasqaykum mayu hinaña karqa. Ichapas piensaymanku karqa kay ruray llumpay sasa kasqanta. Ichaqa Jehová Diospim confiarqaniku. Chaynataq, mosoq amistadkunatam rurarqaniku chaymi kallpanchawarqaku puntaman rinaykupaq”, nispa.

Canadamanta Gregwan Crystalmi rirqaku Namibia nacionman, kay nacionpiqa paykuna hinam inglesta rimanku. Ichaqa tiempo pasaptinmi cuentata qokurqaku chaypi rimasqanku huk idiomatapas yachanankumanta. Paykunam ninku: “Wakinpim hukmanyasqa tarikurqaniku. Ichaqa cuentatam qokurqaniku rimasqanku idiomata yachaspalla paykunata entiendenaykumanta. Iñiqmasinchikwan amistad rurasqaykupas yanapawarqakum costumbranaykupaq”, nispa.

Paykunapa humilde hinaspa hukkunapaq allin munasqankumantaqa, chay llaqtapi iñiqmasinchikkunapas cuentatam qokunku. Irlandamanta Jennym kusikuywan yuyarin predicanankupaq nacionninman hamuq familiakunata. Ninmi: “Serviqmi hamurqaku manam servichikuqchu. Paykunam hukkunata chaskiykuqku. Admirakurqanim kusisqa kasqankumanta, ñoqapas chayna kaytam munarqani”, nispa. Kunanqa, Jennyqa qosanwanmi Gambia nacionpi misionero kanku.

Diospa bendicionninmi apuyachiwanchik

Macedoniapi yanapasqanmi Pablopaqqa ancha allin karqa. Yaqa 10 wata pasaruptinmi Filipos llaqtapi iñiqkunaman qellqarqa: “Sapa kuti yuyarispaymi qamkunamanta Diosninchikman graciasta qoni”, nispa (Fili. 1:3).

Trevorwan Emilym manaraq Galaadman rispanku Malaui nacionpi karqaku, ninku: “Wakinpiqa tapukurqanikum Malaui nacionman hamusqaykumanta. Ichaqa kusisqam karqaniku. Hamusqaykum casado vidaykupi aswan yanapawarqaku hinaspa Jehová Diospa bendicionnintapas chaskirqaniku”. Gregwan Crystalpas kaynatawanmi ninku: “Manachá hukta ruraspaqa vidaykuta allinta servichikuymankuchu”, nispa.

Manam llapallanchikchu huk nacionman rispa servinchikman. Chaymi wakinkuqa nacionninpi predicaqkunapa necesitakusqan lawman rinku. Hukkunañataq yanapanku hichpallanpi tarikuq congregacionpi. Ancha allinqa Jehová Dios serviypi tukuy atisqanchikta ruraymi (Col. 3:23). Chaynapim ñoqanchikpaqpas cheqap kanqa Bibliapa kayna nisqan: ‘[Jehová] Diospa bendicionninmi apuyachin runataqa [. . .], bendicionninqa manam apamunchu llakikuytaqa’ (Pro. 10:22).

[5 kaq paginapi dibujo hinaspa recuadro]

¿Allintachu reqsikunki?

Qatiqninpi tapukuykunawanmi yachanki huklaw nacionpi serviy atisqaykita otaq manapas. Jehová Diosta mañakuy hinaspa allinta tanteay huk nacionman riy piensasqaykimanta. Chaynataq, allinmi kanman qatiqninpi La Atalaya revistapa nisqankunata qawaypas.

• ¿Dioswan amistadniy allinchu kachkan? (“Medidas que conducen a la felicidad”, 15/10/1997, 6 paginata.)

• ¿Diospa Palabranmanta allin yachachiqchu kani? (“El camino al éxito en el ministerio de precursor”, 15/05/1989, 21 paginata.)

• ¿Atiymanchu familiaymantawan amistadniykunamanta rakikuyta? (“Cómo enfrentarse a la nostalgia en el servicio de Dios”, 15/05/1994, 28 paginata.)

• ¿Atiymanchu huk idioma rimayta? (“El reto de servir en una congregación de habla extranjera”, 15/03/2006, 17 paginata.)

• ¿Kachkanchu qollqey huklawman rinaypaq chaynataq mantienekunaypaqpas? (“¿Puede usted servir en el extranjero?”, 15/10/1999, 23 paginata.)

[6 kaq paginapi dibujo]

Humilde kaspa hukkunapaq allin munasqankumantaqa, chay llaqtapi iñiqmasinchikkunapas cuentatam qokunku

[7 kaq paginapi dibujo]

Diosta serviyta munaspa huklawman riqkunaqa kusisqam tarikunku