¿Riwaqchu Macedoniaman?

1. ¿Imanasqataq Pablowan riqmasinkuna Macedoniaman rirqaku?

¹ Apostol Pablom 49 watapi Antioquía de Siria nisqa llaqtamanta misionero hina iskay kaq viajenpi watukurqa Efeso hinaspa Asia Menor law llaqtakunata. Ichaqa chuya espirituntakamam yacharqa ‘Macedonia lawman’ rinanpaq. Paywan riqmasinkunam kusisqa rirqaku, hinaspam chaypi congregacionta qallarichirqaku (Hech. 16:9, 10; 17:1, 2, 4). Kay tiempopipas enteron Pachapim achka llaqtakunapi necesitakun predicaqkunata (Mat. 9:37, 38). ¿Munawaqchu yanapakuyta?

2. ¿Imakunata piensaspankum wakinqa mana rinkuchu huklaw nacionman?

² Yaqapaschá qampas munanki apostol Pablo hina predicayta, ichaqa manaraqpaschá tantearqankichu huklaw nacionman rinaykipaqqa. Ichapas Galaad Escuelaman riyta mana atinkichu imapas harkasusqaykirayku, manapaschá rinaykipaq wataykipichu kanki, solteraraq kanki otaq warmaykikunataraq uywachkanki. Manapaschá huklaw nacionman riytaqa piensankichu huk rimay yachayqa sasa kasqanta piensaspa, otaq nacionnikipi qollqemanta sasachakuy kasqanrayku huklaw nacionpiña tarikunki, kunanñataq sasachakunki nacionnikiman kutiyta. Ichaqa Diosta mañakuspa hinaspa yuyaymanaspaykim tanteawaq huklaw nacionpi yanapakunaykipaq.

3. ¿Misionero kaqkunallachu huklaw nacionpi allinta yanapakunmanku? ¿Imanasqa?

³ ¿Misioneroraqchu kananchik? Pablowan riqmasinkunaqa allintam yanapakurqaku Jehová Diospi hinaspa chuya espiritunpi confiasqankurayku (2 Cor. 3:1-5). Galaad Escuelaman riyta mana atispapas huklaw nacionpiqa allintam yanapakuwaq. Chaymantapas Diosmanta Yachachinapaq Escuela hinaspa Diosta Servinapaq Huñunakuymi yanapasunki. Galaad Escuelaman otaq huk escuelaman rinaykipaq tanteakuptikipas huklaw nacionpi yanapakusqaykiqa misionero kay imayna kasqanta yachanaykipaqmi yanapasunki.

4. ¿Imanasqam machuyaq otaq payayaqkunapas tanteanmanku huklaw nacionpi yanapakunankupaq?

⁴ Machuyaq otaq payayaq iñiqmasinchikkuna. Machuyaq otaq payayaq iñiqmasinchikkunapas iñiyninpi allin takyasqa hinaspa saludninpi allin kaqkunaqa allintam yanapakunmanku huklaw nacionpipas. ¿Jubilasqañachu kachkanki? Wakinqa pisi qollqellawanmi allinta kawsanku yanapakusqanku wakin nacionpiqa, chaypiqa doctorkunapas manam llumpaytachu cobranku, manataqmi wakin gastokunapas llumpaychu.

5. Jubilakuruspa huklaw nacionman riqpa experiencianta willay.

⁵ Warmacha kasqanmanta ingles rimaq anciano hinaspa precursor iñiqmasinchikmi jubilakuruspan tantearqa Asia lawpi turistakunapa rinan sitiopi ingles rimaq 9 predicaqkunata yanapananpaq, chaypim huk law nacionniyoq 30.000 runakunaman predicarqa. Iskay watallapim 50 runakunaña huñunakurqaku. Paymi nin: “Chay sitioman rispaymi tukuy bendicionkunata chaskirqani. Manam tiempoypas haypanmanchu tukuy chaykunamanta willakunaypaqqa”, nispa.

6. ¿Imatam nichwan soltera iñiqmasinchik huklaw nacionman predicaq risqanmanta?

⁶ Soltera iñiqmasinchikkuna. Soltera iñiqmasinchikkunatam Jehová Dios admirakuypaq servichikun, predicaqkunapa mana achka kasqan nacionkunapi allin noticiamanta willakunankupaq (Sal. 68:11). Iñiqmasinchik sipasmi tantearqa huklaw nacionman rispa astawan predicananpaq, ichaqa tayta-mamanmi preocupakurqaku imayna tarikunanmanta. Chaymi akllarqa qollqemanta mana sasachakuq hinaspa chaqwapi mana kaq nacionta, hinaspam chaypi Betel wasiman cartarqa, paykunañataqmi yanapananpaq kaqkunata qellqaspa kutichirqaku. Chay nacionpi 6 wata kaspanmi achka bendicionkunata chaskirqa. Paymi willakun: “Nacionniypiqa manachá tariymanchu karqa Biblia estudiay munaqkunataqa. Predicaqkuna pisilla kasqanman rispaymi estudiay munaqkunata achkata tarirqani, chaypim allin yachachiyta yacharqani”, nispa.

7. Huklaw nacionman riq tayta-mamamanta willakuy.

⁷ Wawa-churiyoqkuna. Wawa-churiyoq kaspaqa, ¿manachu atiwaq huklaw nacionman predicaq riyta? Iskay warmayoq tayta-mamam chaypaq tantearqaku. Señoranmi nin: “Kusikunikum iskaynin warmayku precursor especialkunawan hinaspa misionerokunawan amistadta ruraspa wiñasqankumanta. Predicaqkuna mana ancha kasqanpi Diosta servisqaykum kusichiwanku”.

8. ¿Atichwanchu huk idiomata mana yachaspapas huklaw nacionpi yanapakuyta? ¿Imanasqa?

⁸ Huk idioma yachay sasa kaptin. ¿Huk idioma yachaywanchu harkachikunki? Yaqapasmi rimasqayki idiomata rimanmanku predicaqkunapa mana ancha kasqan nacionpipas. Ingleslla rimaq casarasqa iñiqmasinchikkunam castellano rimaq nacionman rirqaku, chaypim ingles rimaq runakuna achka karqaku. Chay nacionpi Betel wasim ingles rimaq mayqen congregacionkunapi predicaqkuna necesitakusqanmanta listata apachirqaku. Hinaptinmi paykuna hukninta akllarqaku hinaspam iskay kutikama rirqaku. Chaymantam nacionninkuman kutispanku sapa killa gastonkuta menosyachispa huk watantin qollqeta huñurqaku. Astakunankupaq listo kaptinkum iñiqmasinchikkuna maskapurqaku pagay atinanku wasita arriendanankupaq.

9, 10. ¿Imatam tanteanmanku nacionninkuta saqeqkuna, hinaspa imanasqa?

⁹ Huklaw nacionmanta kaspa. ¿Nacionnikimantachu ripukurqanki Diosta manaraq reqsichkaspa? Ichapas nacionnikipiqa predicaqkunata necesitachkanku. ¿Tantearqankichu predicacionpi yanapakuq kutinaykipaq? Kutispaykiqa manam sasachakuwaqchu huklaw nacionniyoqkuna hinaqa: llamkayta, samanaykipaq wasi tariypi nitaq idiomawanpas. Chaymantapas llaqtamasikikunaqa allintapasmi uyarisunki huklaw nacionniyoqkunata uyarinanmantaqa.

¹⁰ Albania nacionmantam huk runa Italia nacionman amparakunanpaq rirqa. Chaypim allin llamkayta tarirurqa familianman qollqeta apachinanpaq. Tiempo pasaytam testigoña karurqa, hinaptinmi italiano rimaq precursor especialkunaman albanes idiomata yachachirqa Albania nacionman rinankupaq. Paymi nin: “Paykunaqa saqesqay llaqtakunaman rinankumantam kusisqa tarikurqaku, chay idiomata mana yachaspankupas. Ñoqaqa chay llaqtayoq hinaspa chay idioma rimaq kachkaspayqa, ¿imatataq Italiapiqa rurachkarqani?”. Chaymi payqa tantearurqa nacionninman kutispan allin noticiamanta willakuypi yanapamunanpaq. “Manam haykapipas pesakurqanichu Italiapi llamkayniytawan qollqe ganayniyta saqesqaymantaqa. Allin llamkayniytaqa tarirqani Albaniapim, ñoqamantaqa Jehová Diosta tukuy sonqowan serviymi wiñaypaq kusikuytaqa qokun”.

11, 12. ¿Imakunatam rurananku huklaw nacionman riy munaqkunaqa?

¹¹ Imakunatam rurana. Macedonia lawman manaraq richkaspankum Pablowan riqmasinkunaqa intipa seqaykunan lawman riyta munarqaku. Chay lawman rinankuta chuya espiritu mana munaptinmi, norte lawman pasarqaku (Hech. 16:6). Jesusmi harkarurqa Bitinia llaqtapa hichpanpi kachkaptinku (Hech. 16:7). Kay tiempopipas Jehová Diosmi predicacionta dirigen Jesusnintakama (Mat. 28:20). Chaymi huklaw nacionman riyta piensaspaqa Jehová Diospa yanapakuyninta mañakuna (Luc. 14:28-30; Sant. 1:5; qawariy recuadrota “¿Imaynatam yachayman yanapakuy maypi necesitakusqanta?”).

¹² Riy munasqaykimanta imam piensasqankuta tapukuy congregacionpi ancianokunata hinaspa iñiyninpi takyasqa iñiqmasinchikkunatapas (Pro. 11:14; 15:22). Huklaw nacionkunapi predicacion imayna kasqanmanta qellqanchikkunata leey, averiguaytaq riy munasqayki nacionmantapas. ¿Riwaqchu riy munasqayki nacionman pisi tiempollapas? Astakunaykipaqña tantearuspaqa, chay nacionpi Betel wasiman qellqay allinta tanteaypi yanapasunaykipaq. Direccionninta maskay kay watapaq Anuario libropi. Betel wasiman cartanaykitaqa ancianokunaman qoy, paykunañam imatawanpas nispanku apachinqaku (qaway Organizados para hacer la voluntad de Jehová nisqa librota, 111-112 paginankunata).

13. ¿Imapim yanapasunkiman Betel wasimanta hinaspa imakunataq kikikimanta kanqa?

¹³ Chay nacionmanta yachanaykipaqmi Betel wasi yanapasunki allinta tanteakunaykipaq. Ichaqa manam qosunkichu ima documentotapas, visa nisqankuta hinaspa chay nacionpi kanaykipaq permisota horqonaykipaqqa, manataqmi cartawanchu invitasunki nitaq maypi yachanaykipaq wasitapas maskapusunkichu. Kikikim ima documentotapas horqonayki manaraq astakuchkaspa. Kikikitaqmi embajada otaq consulado nisqanpi tapukunayki imakuna necesitakusqanta, visa nisqan documentota hinaspa llamkanaykipaq permisota horqonaykipaqpas. Huklaw nacionman riy munaqqa kikinmi documentonkunata horqonan chaynataq ima necesitasqantapas (Gal. 6:5).

14. ¿Imatataq ruranayki predicacionta harkakuq nacionman riyta otaq astakuyta piensaspaqa?

¹⁴ Predicacionta harkaq nacionkuna. Wakin nacionkunapiqa mana musyachikuspallam predicanku (Mat. 10:16). Wakinpim huklaw nacionmanta predicaq riqkunaqa musyarachikunmanku hinaspam sasachachinman chay nacionpi predicayta chaynataq iñiqmasinchikkunatapas. Chay nacionman rinaykipaq tanteaspaqa congregacionpi ancianontakama Betel wasiman cartay.

15. Huklaw nacionman riyta mana atispaqa, ¿imatam rurawaq astawan predicanaykipaq?

¹⁵ ¿Astakuyta mana atispaqa? Huklaw nacionman astakuyta kunan mana atispaqa ama hukmanyaychu. Ichapas ‘punku hina kicharayachkan [Diosmanta] aswan willakunapaq’ nacionllaykipi (1 Cor. 16:8, 9). Congregacionta watukuq iñiqmasinchikmi yachachkan mayqen congregacion yanapanapaq kasqanta. Ichapas yanapakuwaq huk idioma rimaq congregacionta otaq grupota. Congregacionnikipipas kallpanchakuwaqmi Diosta astawan servinaykipaq. Maypi kaspaykipas Jehová Diosta tukuy sonqoykiwan serviynikim aswan allinqa (Col. 3:23).

16. ¿Ima nichwanmi pipas huklaw nacionman riy munasqanmanta willawaptinchik?

¹⁶ ¿Reqsinkichu iñiyninpi allin takyasqa mayqen iñiqmasinchikpas huklaw nacionman riy piensasqanta? Hinaptinqa, kallpanchay hinaspa yanapay. Apostol Pablom ripukurqa Antioquía de Siria llaqtamanta, chay llaqtaqa Roma nacionpi kimsa kaq hatun llaqtam karqa. Chay llaqta predicananpaq hatun kasqanraykum Pablopa pasakuyninqa mana allinchu kanman karqa. Chaywanpas, Bibliapiqa manam ninchu Pablota iñiqmasinkuna harkakusqanmantaqa. Manam llaqtallankupichu piensarqaku, aswanmi reqsikurqaku predicanapaq ‘chakraqa’ enteron Pacha kasqanta (Mat. 13:38).

17. ¿Imanasqataq allin kanman ‘Macedoniaman’ riyniki?

¹⁷ Pablowan riqmasinkunam achka bendicionkunata chaskirqaku Macedoniaman risqankupi. Filipos llaqtapim Lidia sutiyoq warmita reqsirqaku ‘hinaptinmi paypa sonqonta [Jehová Dios] kichaykurqa Pablopa nisqanta kasukunanpaq’ (Hech. 16:14). Maynataraq kusikurqaku Pablopas chaynataq riqmasinkunapas Lidia hinaspa wasinpi kaqkuna bautizakuruptinku. Achka nacionkunapim Lidia hina llampu sonqo runakuna Diospa gobiernonmanta manaraq uyarinkuchu. Qampas ‘Macedoniaman’ rispaqa atiwaqmi achka runakuna yanapayta.

[5 kaq paginapi recuadro]

“¿Imaynatam yachayman yanapakuy maypi necesitakusqanta?”

• Chayraq chaskisqayki Anuario librota leey hinaspa qaway chay nacionpi huk iñiqmasinchik hayka runaman predicananpaq kasqanta.

• Índice nisqanpi chay nacionmanta willakuykunata maskay.

• Chay nacionta reqsiq otaq chaypi yachaq iñiqmasinchikkunata tapukuy.

• Rimasqayki idiomapi predicayta munaspaqa Internetpi maskay, haykam chay nacionpiqa rimasqayki idiomata rimasqankuta yachanaykipaq.