¿Kasukunachu Bibliapa nisqanta?

“10 watayoq kachkaspallayraqmi mozokunawan lloqsiyta qallaykurqani. Qallariypiqa makillaykumantam hapinakuq kaniku hinaspa muchanakuq kaniku ichaqa pisi-pisimantam warmi-qari kayniykutaña llachpanakuq kaniku. 15 wataypiqa llamkarqaniñam hinaptinmi qarikuna, puñunaykupaq niwaq. Amistadniykuna hinam imatapas rurayta munaq kani. Chaymi amistadninku kanayrayku paykunawan huchapakuq kani.” (AUSTRALIAMANTA, SARA)a

BIBLIAPA yachachisqanman hinam Saraqa uywasqa karqa. Tayta-maman Diospa nisqanman hina uywachkaptinpas kikinmi tanteakurqa munasqanman hina kawsananpaq.

Ichapas achka runakuna Sara hina piensanku, warmi-qariwan puñuymanta Bibliapa nisqanqa ñawpa tiempopi runakunallapaq kasqanta. Hukkunapas piensankum religionniyoq kaspapas piwanpas puñuyqa mana hucha kasqanta.

Ichaqa, ¿allinchu kanman warmi-qari puñuymanta Bibliapa nisqanta yachaspa kasukuyqa? Bibliapunim nin, ‘Bibliapi llapallan qellqasqa kaqkunaqa Diospa espiritunpa qosqanmi’, nispa (2 Timoteo 3:16). Dios tukuy imapas Unanchaq kasqanta hinaspa Bibliapas Palabran kasqanta reqsikuspaqa yachananchikmi ima niwasqanchikta.

Warmi-qari puñuymanta Bibliapa ima nisqantam achka runakuna mana allintachu yachanku. Religionpi umalliqkunapas Bibliapa nisqanta respetaspankupas sapakamam piensanku hukniraqta. Chayna piensasqankuwanmi achka religionkuna rakinakurunku.

Hukkunapa nisqanman hina piensanamantaqa, ¿manachu allin kanman kikinchik chaykunamanta yachayninchik? Qatiqnin yachachikuypim kachkan sapa kuti tapukusqanku 10 tapukuykuna, chaykunamantam Biblia contestachkan. Qatiqnin yachachikuypiñataqmi willawachkanchik imanasqam sapakama imayna kawsanapaq tanteakunanchikmanta.

[Willakuy]