¿Imanasqam kasukuna Bibliapa nisqanta?
¿MANAÑACHU kay tiempopi yanapawachwan warmi-qari puñuymanta Bibliapa consejasqankuna? Yanapawanchikmi. Bibliapa nisqanta kasukuqkunaqa kayna sasachakuykunamantam librakunku:
▪ Huchapakusqankurayku onqoykunamanta
▪ Mana munachkaspa wiksayakuymanta
▪ Casado vidanta yanqachaspa llakikuymanta
▪ Conciencianpi mana allin tarikuymanta
▪ Mana allinpaq hapikuyninmantapas
Jehová Diosqaa unanchawasqanchikraykum qowasqanchikkunawan kusisqa kawsakunanchikta munan. Payqa yachachiwanchik allinninchikpaqmi chaytam Isaias 48:17 nin. Chaymi Bibliapa nisqanta kasukuq runaqa kaykunawan kusikun:
▪ Diospa favorecesqan kaspan
▪ Sonqonpi hawkayayta tarispan
▪ Vidapasaqmasinwan hawkalla kaspan
▪ Allin runa kasqanrayku respetachikuspan
▪ Vidanta allinpaq qawasqanwanpas
Diospa kamachisqanman hina mana kawsaspaqa, ¿atichwanchu chayna kawsayninchik cambiayta? ¿Diosqa juzgawasunchu kamachisqanman hina mana kawsasqanchikmanta?
Piensarisun apostolkunapa tiemponpi cristianokunapi. Wakinqa manaraq cristiano kachkaspankum huchapakurqaku, casado kachkaspa hukwan pierdekurqaku, qarimasillanwan otaq warmimasillanwan huchapakurqaku ichaqa chayna vidankuta cambiaptinkum huchankumanta Dios pampacharqa (1 Corintios 6:9-11). Chaynam kay tiempopipas allpantinpi runakuna vidankuta cambiachkanku hinaspam Bibliapa nisqanman hina kawsachkanku warmi-qari puñuyqa casado vidallapi kasqanta respetaspa. Kay yachachikuypa qallariyninpi Saramanta willakuyman hinam Bibliapa nisqankunaqa allinpaq kasqanta reparanku.
“Chayllam hawkayayta tarirqani”
Saraqa musyakurqam munasqanman hina kawsayqa yanqapaq kasqanta hinaspa kusikuypas mana tarisqanta. “Conciencianmi mana allinñachu karqa. Ichaqa manchakuqmi kani wiksayakuruspa penqaypi tarikunaymanta otaq ima onqoywanpas hapirachikuymanta. Chaywanpas Diostaqa manam qonqarqanichu, musyakurqanim mana allin kawsasqaywan sonqon nanachisqayta. Chayna kawsasqaywanmi llumpayta hukmanyarqani.”
Tiempo pasasqanman hinam Saraqa kallpanchakurqa vidanta cambiananpaq. Yanapasqa kananpaqmi asuykurqa Jehová Diospa testigon tayta-mamanman hinaspa congregacionninpi ancianokunaman. Saram nin: “Tayta-mamaypas chaynataq ancianokunapas kuyapayaywan chaskiykuwasqankum anchata kusirichiwarqa. Chayllam hawkayayta tarirqani”, nispa.
Kunanqa 2 wawayoqñam Saraqa. Ninmi: “Kikiymi wawaykunaman ñawpa vidaymanta willarqani. Entiendenankutam munani, Bibliapa nisqanman hina warmi-qari puñuyta mana kasukuyqa sasachakuypi tarichiwasqanta hinaspa kasukuyqa aychanchikpi hinaspa vidanchikpi allinpaq kasqanta. Convencesqam tarikuni mana ñakarinanchikrayku Diosqa kamachikuyninkuna qowasqanchikmanta”, nispa.
Llapanchikmi bendicionkunata tarisun kuyakuq Diospa consejonkunata kasukuspaqa. Bibliaqa ninmi: ‘Diospa lliw [kamachisqankunaqa] mana pantaqmi. [. . .] Runakunapa sonqontam kusirichin’. Hinaspa ‘Diospa kamachikuyninkunaqa [. . .] chuyam’. Chaymantapas, paypa kamachikuyninkunata kasukuqqa ‘hatun premiotam’ chaskinqa, nispa (Salmo 19:8, 11).b
[Willakuykuna]
a Bibliam yachachin Diospa sutinqa Jehová kasqanta.
b Bibliapa consejonkunamanta astawan yachayta munaptikiqa kallpanchaykikum Jehová Diospa testigonkunata llaqtaykipi maskanaykipaq. Watukamusunaykita munaspaqa qellqawaqmi 4 kaq paginapi direccionman otaq Internetpi: www.watchtower.org/qua nisqanmanpas.
[15 kaq paginapi suti rikuylla kaq willakuy]
Bibliapi kamachikuykunata mana kasukuqqa vidankupim ñakarinku
[16 kaq paginapi suti rikuylla kaq willakuy]
Diospa nisqankunata kasukuqqa conciencianpim hawka tarikun hinaspa vidapasaqmasinwanpas hawkam kawsakun