Revistanchikta leeqkunam tapukunku
¿Rimanachu warmanchikkunawan warmi kayninmanta otaq qari kayninmanta?
▪ Achka tayta mamakunam anchata kallpanchakunku wawa-churinkuta ima onqoymantapas cuidanankupaq. Chaynatataqmi kallpanchakunanku mana allinninkupaq yachachikuykunamanta cuidanankupaqpas. Chaymi yanapananku qari kayninku otaq warmi kayninku imapaq kasqanmanta sumaqllata willaspanku (Proverbios 5:3-23). Chaykunamantam warmachankuman yachachinanku chayman hina allinta portakunankupaq hinaspa cuidakunankupaq televisionpi, Internetpi, librokunapi, revistakunapi warmi-qari puñuymanta rimasqankuwan mana engañachikunankupaq.
Huk profesoram nin: “Warmachakuna warmi-qari puñuymanta yachayninkuchuqaya mana allinqa, aswanqa ima yachasqankum, hayka watanpi hinaspa pimanta yachasqankum”, nispa. Televisionpi qawasqankum otaq runakunapa imayna rimasqankum warmi kayninkumanta otaq qari kayninkumanta pantasqata yachachin.
Mana allin yachachikuykunamantam warmachanchikkunata cuidana (Proverbios 5:1; Efesios 6:4). Paykunaqa yachanankum cuerponku imanasqa cambiasqanta, imanasqa cuidakunankupaq chaynataq abusaq runakunamanta imayna cuidakunankupaqpas. Manaraq sipascha kachkaspanmi warmi warmachaqa cuerpon imanasqa cambiasqanta chaynataq imanasqa killanwan onqosqanmantapas yachanan. Qari warmachakunapas yachanankum puñuptinku qari kayninmanta imanasqa imapas lloqsisqanmanta. Taksachankumantapacham yachananku cuerponkupa partenkuna ima sutiyoq kasqanta. Kuyakuq tayta-mamakunaqa warmachankumanmi kaykunamanta yachachinanku: 1) warmi kayninkumanta otaq qari kayninkumanta respetowan rimanankupaq, 2) pipas mana qawananpaq otaq mana llachpananpaq. Wiñasqankuman hinataqmi explicana warmikuna imayna wiksayakusqankumanta.a
¿Haykapimantataq chaykunamanta yachachiyta qallarina? Tayta-maman manaraq cuentata qokuchkaptinkum warmi warmachaqa 10 watayoq kaspan otaq menospipas wakinqa killanwan onqoytaña qallarinku. Qari warmachapapas puñuptinmi qari kayninmanta imapas lloqsinmanña 11 otaq 12 watanmantapacha. Cuerponkupa chayna cambiasqanmanta mana yachaspankuqa hukmanyasqam tarikunmanku. Tiempowanmi explicana cuerponku imayna cambiasqanmanta. Chaymantapas yachachinataqmi imayna kawsanapaq Bibliapa yachachisqan ancha valorniyoq kasqanta chaykunamantaqa escuelakunapiqa manam allintachu explicanqaku (Proverbios 6:27-35).
[Willakuy]
a Kaykunamanta imayna yachachinaykipaq consejokunatam tarinki ¡Despertad! (g-S 5/06 págs. 10-13) revistapi: “Prepare a su hija para la primera menstruación”; Lo que los jóvenes preguntan. Respuestas prácticas (volumen 2) niq libropa 6 kaq yachachikuyninpi: “¿Qué le pasa a mi cuerpo?”; hinaspa 2011 watapi enero-marzo Llaqta Cuidaq revistapa 12-14 paginankunapi “Familiapaq consejokuna: ¿Imaynatam rimawaq warmi-qari puñuymanta churi-wawaykiwan?” niq yachachikuykunata. Kaykunaqa Jehová Diospa testigonkunapa rurasqanmi.