Diospa Palabranmanta yachay
¿Imaynatam akllachwan allin amistadkunata?
Kay yachachikuymi kikikipa Bibliaykiwan wakin tapukuynikita contestasunki. Munaptikiqa Jehová Diospa testigonkunam kay tapukuykunamanta yachanaykipaq yanapasunkiman.
1. ¿Imanasqam amistadninchikkunata allinta akllananchik?
Yaqa llapanchikmi munanchik amistadninchikwan allin kayta chaymi qatipakunchik paykunapa imayna kasqanta. Hinaptinmi kawsanchik amistadninchikkunapa imayna kawsasqanman hina. Amistadninchikkunaqa yanapawanchikmi imayna runa kananchikpaq. (Leey Proverbios 4:23; 13:20.)
Bibliapi huknin librota qellqaq rey Davidmi akllarqa allin amistadkunata. Juntakuqmi Diosman sonqo kananpaq yanapaqnin amistadkunawan (Salmo 26:4, 5, 11, 12). Jonatanwanmi amistad karqa Jehová Diospi confiananpaq kallpanchasqanrayku. (Leey 1 Samuel 23:16-18.)
2. ¿Imaynatam atiwaq Diospa amistadnin kayta?
Jehová Dios tukuy atiyniyoq kaptinpas atichwanmi amistadnin kaytaqa. Bibliam willawanchik Diospa amistadnin Abraham kasqanmanta. ¿Imanasqa? Jehová Diospi confiasqanrayku hinaspa kasukusqanrayku (Genesis 22:2, 9-12; Santiago 2:21-23). Ñoqanchikpas Jehová Diospi confiaspa hinaspa kamachisqankunata kasukuspaqa amistadninmi kachwan. (Leey Salmo 15:1, 2.)
3. ¿Imaynatam yanapawanchik allin amistadkunaqa?
Yanapawanchikmi allin kaqkunata ruranapaq (Proverbios 17:17; 18:24). Jonatanpi piensay. Payqa Davidpa 30 wata mayorninmi hinaspa Israelpi reymi kanan karqa. Ichaqa Diosmi Davidta nombrarurqa rey kananpaq, chayna kaptinpas Jonatanqa tukuy sonqonwanmi Davidta yanaparqa. Allin amistadkunaqa valorchakuspam corregiwanchik mana allinta ruraptinchikqa (Salmo 141:5). Diosta kuyaspankuqa yanapawasunmi allin kaq ruraykunata rurananchikpaq. (Leey 1 Corintios 15:33.)
Jehová Diospa testigonkunapa huñunakunanku Salonpim tariwaq qam hina allin ruraqkunata. Chaypi amistadkuna armasqaykiqa yanapasunkim Diospa munasqanman hina kawsanaykipaq. (Leey Hebreos 10:24, 25.)
Chaywanpas wakinpiqa Diosta kuyaq amistadkunapas hukmanyachiwachwanmi. Chaynaqa amayá chayllaqa piñakuruychu (Eclesiastes 7:9, 20-22). Manam kanchu mana pantaq amistadqa, ichaqa reqsikunanchikmi Diosta kuyaq amistadkuna necesitasqanchikta. Diospa Palabranmi kallpanchawanchik iñiqmasinchikkuna imawanpas sientichiwaptinchikqa pampachanapaq. (Leey Colosenses 3:13.)
4. ¿Imatataq rurawaq amistadnikikuna contraykipi kaptin?
Achkam cuentata qokunku Biblia estudiayta qallaykuptinkuqa amistadninkuna contrankupi kasqankuta. Ichapas mana entiendenkuchu Bibliapa consejasqan chaynataq suyakuy qosqan allin kasqanmanta. Chayna kaptinpas yachasqaykikunamantam willawaq. (Leey Colosenses 4:6.)
Paykunaqa Diospa nisqan allin noticiakunamantapas burlakunmankum (2 Pedro 3:3, 4). Wakinqa asipayasunkipaschá allin kaqkunata ruranaykipaq kallpanchakuptiki (1 Pedro 4:4). Chayna kaptinqa akllanaykipaschá kanqa paykunapa amistadninta otaq Diospa amistadninta. Diospa amistadninta akllaspaqa aswan allin amistadtam akllachkanki. (Leey Santiago 4:4, 8.)
Astawan yachayta munaspaqa qawariy ¿Imatapunim Bibliaqa yachachin? libropa 12 hinaspa 19 kaq yachachikuyninkunata, kay libroqa Jehová Diospa testigonkunapa rurasqanmi.