Chaylla entiendenapaq Llaqta Cuidaq qellqaqa ¿Imanasqataq rurakurqa?
CHUNKANTIN watakunañam enteron Pachapi runakunaqa Llaqta Cuidaq qellqapi lloqsimuq yachachikuykunawan yanapachikurqaku. Ichaqa, 2011 watapa julio killanpim lloqsimurqa ingles rimaypi chaylla entiendenapaq Llaqta Cuidaq qellqa, chaymi lloqsimurqa huk watallapaq imayna kasqanmanta yachanapaq.
Ancha kusikuywanmi willamuykiku hinalla chayna lloqsinanpaq tantearusqaykumanta, lloqsimunqataqmi español, francés hinaspa portugués rimaykunapipas.
ANCHA AGRADECEKUSQANKUMANTA
Ingles rimaypi chaylla entiendenapaq Llaqta Cuidaq qellqata chaskiruspankum, Pacífico sur nisqamanta wakin Testigokuna kaynata nirqaku: “Kunanqa aswan allintañam iñiqmasinchikkunaqa entiendenku Llaqta Cuidaq qellqapa ima nisqantaqa”, nispa. Huk cartapas nintaqmi: “Sasa palabrakunata hinaspa wakin rimaykunapa ima nisqanta allinta entiendenaykupaq tiempochakunaykumantaqa, kunanqa tiempochakuniku textokunata Bibliapi maskanaykupaqwan chay nisqankuna ima yachachiwasqankuta tarinaykupaqñam”, nispa.
Estados Unidos nacionniyoq universidadninta tukuq huk cristianam nin: “Chunka pusaqniyoq watañam sasa entiendena palabrakunawan rimarqani hinaspa qellqarqanipas. Imayna piensasqaywan rimasqayqa sasamá karqa. Hinaptinmi musyakururqani cambianaypaq”, nispa. Chaylla entiendenapaq Llaqta Cuidaq qellqam anchata yanaparurqa Bibliamanta allin yachachiq kananpaq. Paymi nin: ‘Imayna rimaykunawan qellqasqa kasqanmi yanaparuwan chaylla entiendenapaq hina rimaykunallawan rimanaypaq’, nispa.
1972 watapi bautizakuq, Inglaterra nacionniyoq huk cristianam nin: “Chayllaraq lloqsimuq qellqata leeruspaymi sientekurqani kikin Jehová Dios marqakuykuwaspan leepuwachkanmanpas hina, imaynam huk taytapas warmachanpaq cuentota leepuchkanmanpas hina”, nispa.
Estados Unidos Betel wasipi llamkaq 40 masnin bautizasqa cristianam nin chaylla entiendenapaq Llaqta Cuidaq qellqa Bibliamanta wakin yachachikuykunata chayraq allinta entiendenanpaq yanaparusqanmanta. 2011 watapi 15 de septiembre Llaqta Cuidaq qellqapa recuadronpim yachachirqa Hebreos 12:1 nisqanpi “puyu hinaña [. . .] testigokuna” nisqanqa, mana yupay atina testigokuna kasqanmanta. Paymi nin: “Kay versiculopa ima ninanmantam chayraq allintapuni entienderurqani”, nispa. Congregacionpi Llaqta Cuidaq qellqata estudiaymantañataqmi nirqa: “Tapukuykunata kutichispan chaylla entiendenapaq Llaqta Cuidaq qellqamanta huk warmacha leeptinpas, lliw uyariqkunam allinta entiendenku”, nispa.
Betelpi llamkaq huk cristianapas nintaqmi: “Huñunakuykunapi warmachakunapa rimarisqankutam uyariyta munani. Chaylla entiendenapaq Llaqta Cuidaq qellqam warmachakunata yanapan mana iskayrayaspa rimarinankupaq. Chayna rimasqankum anchata kallpanchawan”, nispa.
1984 watapi bautizakuq huk cristianam agradecekuspan kaynata nirqa: “Ñoqapi piensaspa qellqasqa hinam. Mana sasachakuspallaymi leesqaykunata entiendeni hinaspapas mana iskayrayaspaymi Llaqta Cuidaq Revistamanta Estudiopi rimarini”, nispa.
TAYTA-MAMAKUNAPAQMI ANCHA ALLIN
Qanchis watachayoq warmachapa mamanmi nirqa: “Llaqta Cuidaq Revistamanta Estudiopaq preparakuspa sasa entiendena palabrakunamanta warmachayman entiendechispaymi achka tiempota pasaq kani”, nispa. ¿Imaynatam yanaparurqa chaylla entiendenapaq Llaqta Cuidaq qellqaqa? Kikinmi nin: “Admirakunapaqmi warmachay parrafokunata leespan allinta entiendesqanqa. Pisi rimayllapi hinaspa mana sasa entiendenapaq hina rimaykunallawan kasqanraykum allinta entiendespan kusisqa tarikun. Kikillanñamá huñunakuykunapaqpas preparakun hinaspapas chay qellqamanta estudio apakuptinmi tukunankama allinta uyarin”, nispa.
Huk cristianam pusaq watachayoq warmi warmachanmanta kaynata nin: “Manañam yanapaniñachu tapukuykunapa kutichiyninkunata maskaypiqa. Wakin kutikunallapiñam allinta entiendenanpaqqa yanapaniku. Chaylla entiendenanpaq hina kasqanraykum, Llaqta Cuidaq Revistamanta Estudiopipas allinta entienden”, nispa.
¿IMA NINKUTAQ WARMACHAKUNAQA?
Achka warmachakunam ninku paykunapaq hina qellqasqa kasqanmanta. 12 watachanpi kaq Rebecam nirqa: “¡Ama hina kaspayá hinalla ruramuychik! Anchatam gustawan palabrakunapa ima ninan kasqanmanta recuadrokunapi hamusqan. Warmachakuna entiendenaykupaq hinallam”, nispa.
Qanchis watachayoqllaraq Nicolette sutiyoq warmachapas pay hinam nin: “Ñoqapaqqa Llaqta Cuidaq revistaqa sasa entiendeymi karqa. Kunanmi ichaqa kikillaymanta tapukuykunatapas astawanraq kutichini”, nispa. Isqon watachayoq Emma sutiyoq warmachapas nintaqmi: “Ñoqatawan soqta watachanpi kaq sullkachaytam anchata yanaparuwanku allinta entiendenaykupaq. ¡Anchatam agradecekuni!”, nispa.
Qawasqanchikman hinaqa, achkam yanapachikuchkanku chaylla entiendenapaq Llaqta Cuidaq qellqawanqa. Chay qellqa necesitakusqanqa sutillatamá qawakun, chaymi hinalla lloqsimunqa achka runakunata yanapaq 1879 watapi lloqsimuq qellqapiwan kuska.